प्रकाशकीय/सम्पादकीय : सूचनाको सशक्तीकरणतर्फ हाम्रो यात्रा

---

आज कुशे औँशी तथा बुबाको मुख हेर्ने दिनमात्रै नभई नेपाली पत्रकारिताको सुरुआत गर्ने युवाकवि मोतिराम भट्टको पनि जन्मजयन्ती । आजको मितिबाट हामीले हाम्रो समाचारमूलक अनलाइन लोकसूचना डट कम प्रकाशन (सार्वजनिक) गरेका छौँ । सूचना पाउने अधिकार कुनै विशेष वर्गको होइन, सबै नागरिकको हो र यही अधिकारलाई व्यवहारमा उतार्ने हाम्रो प्रयास हो लोकसूचना । हामीले यो अनलाइन सुरु गर्दा एउटा स्पष्ट दृष्टिकोण बोकेका छौँ । मिडियाको सङ्ख्या बढाउने होडमा छैनौँ । मिडियाको गुणस्तर, विश्वसनीयता र सामाजिक योगदानमा ध्यान केन्द्रित गर्ने सोचका साथ हामी आएका छौँ ।

लोकसूचनाले राजनीति, शिक्षा, स्वास्थ्य, अर्थ, पर्यटन, संस्कृति, प्रविधि, कृषि, युवा आवाज, महिला सशक्तीकरणलगायत सबै क्षेत्रका विषयवस्तुहरुलाई सन्तुलित, तथ्यपरक र जनउत्तरदायी ढङ्गले समेटेर अगाडि बढ्नेछ । सूचनाको पहुँचले नागरिकलाई सशक्त बनाउनेमा हामी विश्वस्त छौँ । जब जनताले सत्य, सन्दर्भयुक्त र समयसापेक्ष समाचार पाउँछन्, तब उनीहरु निर्णय गर्न सक्षम हुन्छन् । यही विश्वासलाई आधार बनाएर हामीले लोकसूचना डट कमको निर्माण गरेका छौँ ।

नेपालमा अझै पनि धेरै नागरिकहरु सरकारी निर्णय, बजेट, नीति वा सेवा प्रक्रियाबारे अनभिज्ञ छन् । सूचनाको अभावले नागरिकका प्रश्नहरु हराउँछन्, जवाफहरु गुम्छन् र सुशासन कमजोर हुन्छ । लोकसूचना अनलाइन यही खाडललाई पूर्ति गर्ने प्रयास हो । हामीले यहाँ केवल कागजी दस्तावेजहरु डिजिटल बनाउने छैनौँ, हामीले नागरिकमाझ विश्वास बनाउने छौँ । हामीले पारदर्शिता र जवाफदेहिताको बीउ रोप्ने प्रयत्न गर्ने छौँ । लोकसूचना अनलाइनले शिक्षक, विद्यार्थी, पत्रकार, नीति निर्माता र आम नागरिक सबैलाई सशक्त बनाउनेछ । किनभने जब सूचना खुला हुन्छ, तब लोकतन्त्र बलियो हुन्छ ।

पाठकहरुको विश्वास नै हाम्रो प्रेरणा हो । विज्ञापनदाता र शुभचिन्तकहरुको साथले हामीलाई निरन्तरता र विस्तारको सम्भावना दिन्छ । हामी तपाईंहरुसँग मिलेर एक उत्तरदायी, समावेशी र सशक्त मिडिया संस्कृतिको निर्माण गर्न चाहन्छौँ । लोकसूचना डट कम तपाईंको आवाज हो, तपाईंको सवाल हो र तपाईंको समाधानको खोजी पनि हो । अतः सधैँ यहाँहरुको साथ र सहयोगको हामीले अपेक्षा गरेका छौँ ।