चितवन । अखिल नेपाल खेलकुद महासंघ चितवनको आयोजनामा भएको खुला पुरुष भलिबल प्रतियोगिता–२०८२ मा एक्सपर्ट एजुकेसन र एसीटी कन्सलटेन्सी फाइनलमा प्रवेश गरेका छन् ।
आज दिउँसो भएको पहिलो सेमीफाइनल खेलमा एसएसडब्लु कन्सलटेन्सीलाई २–० को सोझो सेटमा हराउँदै एसीटी कन्सलटेन्सी फाइनलमा प्रवेश गरेको प्रतियोगिताका रेफ्री रमेश विकले जानकारी दिनुभयो । त्यस्तै आज दिउँसो नै भएको दोस्रो सेमीफाइनल खेलमा अमेरिकन पेन्टस्लाई २–० कै सोझो सेटमा हराउँदै एक्सपर्ट एजुकेसन फाइनलमा प्रवेश गरेको उहाँको भनाइ छ । अखिल नेपाल खेलकुद महासंघ चितवनको प्रथम जिल्ला सम्मेलनको अवसरमा भलिबल प्रतियोगिताको आयोजना गरिएको थियो ।
प्रतियोगिताको फाइनल खेल नेपाल खेलकुद महासंघ चितवनको प्रथम जिल्ला सम्मेलनका दिन हुने महासंघका चितवन जिल्ला ईन्चार्ज विकास श्रेष्ठले जानकारी दिनुभयो । आज हुने भनिएको जिल्ला सम्मेलन विशेष कारणवस अर्को हप्ता हुने गरी स्थगित गरिएको श्रेष्ठको भनाइ छ । महासंघको जिल्ला समिति सर्वसम्मत चयन गर्ने तयारीमा आफूहरु लागीपरेको उहाँको भनाइ छ ।
जिल्लास्तरीय खुल्ला पुरुष भलिबल प्रतियोगितामा पहिलो हुने समूहलाई नगद १५ हजार रुपैयाँसहित ट्रफी, मेडल र प्रमाणपत्र दिइने उहाँले बताउनुभयो । त्यस्तै दोस्रो हुने समूहलाई नगद १० हजार रुपैयाँसहित ट्रफी, मेडल र प्रमाणपत्र प्रदान गरिने श्रेष्ठको भनाइ छ ।
सम्वन्धित समाचारहरु
प्रतिकृया दिनुहोस्