२८ कार्तिक २०८२, शुक्रबार १५:४९
चितवन । विश्वकै लोकप्रिय मोटरसाइकल ब्रान्ड रोयल इनफिल्डको नयाँ भेरियन्ट ‘मेटिओर ३५०’ अब चितवनको बजारमा उपलब्ध भएको छ । भरतपुरस्थित सन अटो मोबाइल्सले शुक्रबारदेखि यसको औपचारिक बिक्री शुभारम्भ गरेको हो ।
सन अटोमोबाइल्सका सञ्चालक गोविन्दमान श्रेष्ठले मेटिओर ३५० लाई चितवनका बाइकप्रेमीहरूका लागि उपयुक्त विकल्प भएको बताउँदै लामो दूरीको यात्रालाई सहज बनाउने र क्लासिक लुकले युवाहरूलाई आकर्षित गर्ने विश्वास व्यक्त गर्नुभयो । मेटिओर ३५० मा ३५० सिसिको सिंगल–सिलिन्डर इन्जिन, पाँच–स्पीड म्यानुअल गियरबक्स, १५ लिटरको फ्यूल ट्यांकी र करिब ३३ किलोमिटर प्रतिलिटर माइलेज रहेको बताउनुभयो । उहाँकाअनुसार बाइकको तौल १९१ किलोग्राम र सिट हाइट ७६५ मिमी रहेको छ, जसले छोटो कद भएका चालकहरूका लागि पनि सहज सवारी अनुभव प्रदान गर्छ ।
सन अटो मोबाइल्सले टेस्ट राइड, फाइनान्स सुविधा, एक्सचेन्ज र सर्भिसिङको व्यवस्था पनि गरेको छ श्रेष्ठको भनाइ छ । चितवनमा पछिल्लो समय क्रूजर बाइकप्रतिको आकर्षण बढ्दो रहेको चितवन अटो मोबाइल्स एसोसिएसनका अध्यक्ष मोहन केसीले बताउनुभयो । मेटिओर ३५० को आगमनले स्थानीय बजारमा नयाँ विकल्प थपिएको उहाँको बुझाइ छ ।
अल्फा अटोमेटिभका एरिया सेल्स म्यानेजर उत्तम खनालले अपग्रेड गरिएको मेटिओर ३५० लाइनअपले स्टाइल, आराम र शुद्ध मोटरसाइकलिङ आकर्षणका साथ मध्यम आकारको क्रूजिङ अनुभवलाई नयाँ परिभाषा दिएको बताउनुभयो । फायरबल, स्टेलर, अरोरा र सुपरनोभा गरी चार भेरियन्टमा उपलब्ध यस मोटरसाइकलको मूल्य पाँच लाख ७७ हजारदेखि पाँच लाख ९७ हजारसम्म रहेको उहाँको भनाइ छ । फायरबल भेरियन्टको मूल्य पाँच लाख ७७ हजार, स्टेलर भेरियन्टको मूल्य पाँच लाख ८७ हजार, अरोरा भेरियन्टको मूल्य पाँच लाख ९१ हजार नौ सय तथा सुपरनोभा भेरियन्टको मूल्य पाँच लाख ९७ हजार रहेको खनालले बताउनुभयो ।
रोयल इनफिल्डले मध्यम आकारका मोटरसाइकल सेग्मेन्टमा विश्व अग्रणी ब्रान्डको रूपमा नेपालमा नयाँ मेटिओर ३५० सार्वजनिक गरेको हो । मनोरञ्जनात्मक यात्राहरू, घुमाउरा राजमार्गहरू र आरामदायी सवारीका लागि तयार गरिएको यस बाइकले विशिष्ट क्रूजर डिजाइन, उत्कृष्ट प्रदर्शन र सहज सवारी आसनसहित नयाँ मापदण्ड स्थापित गरेको सञ्चालक श्रेष्ठले बताउनुभयो । कम्पनीले ग्राहकलाई गुणस्तरीय र विश्वसनीय सवारी अनुभव दिने लक्ष्य राखेको उहाँको भनाइ छ ।
सन् २०२० मा सुरु गरिएको मेटिओर ३५० ले विश्वभरमा पाँच लाखभन्दा बढी चालकको सशक्त र सन्तुष्ट समुदाय निर्माण गरिसकेको बताइएको छ । अब यसको नयाँ रूपान्तरण ‘इजी क्रूजर’ को रूपमा चार भेरियन्टमा उपलब्ध छ, जुन खुला सडकमा सहज यात्राको जीवनशैली र स्मरणीय अनुभवको प्रतीक बनेको छ ।
अटो मोबाइल्सका सञ्चालक गोविन्दमान श्रेष्ठ, चितवन अटोमोबाइल एसोसिएसनका अध्यक्ष मोहन केसी, चितवन अटोमोबाइल्स एसोसिएसनका पूर्वअध्यक्ष अमृत जोशी, अल्फा अटोमोटिभका एरिया सेल्स म्यानेजर उत्तम खनाल, रिकण्डीसन एसोसिएसन चितवनका अध्यक्ष सूर्य अधिकारीसहितले शुक्रबार सन अटोमोबाइल्समा आयोजित भव्य समारोहका बीच मेटिओर ३५० को लन्च गर्नुभएको थियो ।
प्रतिकृया दिनुहोस्