३ मंसिर २०८२, बुधबार २०:५५
चितवन । हिन्दुहरुको पवित्र धार्मिक तीर्थस्थल देवघाटधाममा बालाचतुर्दशीको अवसरमा बुधबार बिहानैदेखि श्रद्धालु भक्तजनहरूको ठूलो भीड लागेको छ । मार्गशीर्ष कृष्ण त्रयोदशीको साँझदेखि नै दिवंगत पितृहरूको शान्तिको कामना गर्न स्नान, दियो सेलाउने र शतबीज छर्ने क्रममा भक्तजनहरूको आवत–जावत बढेको हो ।
दामोदर कुण्डबाट बग्दै आएकी कालीगण्डकी र गोसाइँकुण्डबाट बग्दै आएकी त्रिशूली नदीको संगमस्थल रहेको देवघाटमा बुधबार बेलुकीसम्म भीड रहेको र सुरक्षा व्यवस्था कडा पारिएको देवघाट क्षेत्र विकास समितिले जनाएको छ । शतबीज छर्न नदी किनारमा पुगेका भक्तजनले दिवंगत आत्माको सद्गति र आगामी जन्मको कल्याणको कामना गरेका छन् । देवघाट क्षेत्र विकास समितिका कार्यकारी निर्देशक सदन बरालका अनुसार यस वर्ष भक्तजनको उपस्थिति बाक्लो रहेको छ ।
शतबीज छर्नका लागि गत वर्षझैँ यस वर्ष पनि करिब एक लाख भन्दा बढी भक्तजन आएका उहाँले बताउनुभयो । ‘अघिल्लो दिन रातभर जाग्रम बस्ने र बिहानै आउने भक्तजनहरू यहाँ हुनुहुन्छ’ उहाँले भन्नुभयो, ‘हामीले रातभर करिब २० हजार भक्तजनका लागि आश्रम तथा त्रिपालको व्यवस्था गराएका थियौँ ।’ २० हजार भन्दा बढी भक्तजनले आफ्नै व्यवस्थापन गर्ने व्यवस्था पनि रहेको भन्दै उहाँले सुरक्षा र सहजताका लागि हाइमास्ट र सडक बत्ती व्यवस्थापन गरिएको बताउनुभयो ।
उनले स्थानीय प्रशासनले सडक तथा घाट क्षेत्रमा भीड व्यवस्थापनका लागि अतिरिक्त सुरक्षाकर्मी परिचालन गरेको र भक्तजनहरुको लागि स्वास्थ्यकर्मी तथा स्वयंसेवक पनि तैनाथ गरिएको बताउनुभयो । कार्यकारी निर्देशक बरालले सम्भावित दुर्घटना रोक्न ¥याफ्टिङ बोटसहित अन्य बोटहरू पनि तयारी अवस्थामा राखिएको बताउनुभयो । नदी पार गर्नका लागि झोलुङ्गे पुलमा लाइन बनाएर मात्र यात्रा गर्न लगाइएको छ भने ¥याफ्टिङ बोटको भाडा प्रतिव्यक्ति ५० रुपैयाँ तोकिएको उनले जानकारी दिनुभयो ।
हरेक वर्ष झैँ, शतबीजका रूपमा जौँ, धान, तिल, तोरी, मास, केराउ, मुला, पिँडालु, सखरखण्ड आदि छर्ने परम्परा निरन्तर छ । देशभर तथा छिमेकी देशबाट समेत भक्तजनहरू देवघाट आउने गर्दछन् । नवलपुर, तनहुँ र चितवनको संगमस्थल देवघाटमा कालीगण्डकी र त्रिशुली नदीको दोभानको पवित्रता भएकाले भक्तजनहरू यहाँ स्नान र पूजा गरी धार्मिक कार्य पूरा गर्छन् ।
प्रतिकृया दिनुहोस्