‘अङ्कुरम् जुनियर म्याथ च्यालेन्ज’मा बाल्मीकि पहिलो

---

चितवन। विद्यार्थीको गणितीय क्षमता अभिवृद्धि गर्ने उद्देश्यले ‘जुनियर म्याथ च्यालेन्ज १.०’ प्रतियोगिता आयोजना गरिएको छ । प्राथमिक तहका बालबालिकामा गणितप्रतिको रुचि बढाउने, तार्किक सोचको विकास गर्ने तथा स्वस्थ प्रतिस्पर्धाको भावना जागृत गराउँदै विद्यार्थीमा समस्या समाधान गर्ने क्षमता अभिवृद्धि गर्ने उद्देश्यले आयोजित उक्त प्रतियोगितामा चितवनका विभिन्न स्कुलका २५ समूहको सहभागिता रहेको थियो ।

भरतपुर–७, कृष्णपुरस्थित अङ्कुम् एकेडेमीको आयोजनामा सम्पन्न प्रतियिोगिताको मुख्य उद्देश्य विद्यार्थीहरूमा समस्या समाधान गर्ने सीपको विकास गराउनु रहेको विद्यालयको गणित विभागका हेड अफ डिपार्टमेन्ट विनोद अधिकारीले जानकारी दिनुभयो । उहाँले भन्नुभयो, ‘सहभागी विद्यार्थीको स्तरअनुसार प्रश्नहरू तयार पारिएको थियो जुन प्रश्नले प्रतियोगीलाई सोच्न, विश्लेषण गर्न र समाधान खोज्न प्रेरित गर्यो ।’ प्राथमिक तहका गणितीय अवधारणाहरूलाई विद्यार्थीले व्यावहारिक र सिर्जनात्मक तरिकाले बुझ्न सकून् भन्ने उद्देश्यले प्रश्नहरू तयार पारिएको उहाँले बताउनुभयो ।

प्रतियोगितामा भरतपुरको बाल्मीकि शिक्षा सदनका रिदम सापकोटा र प्रिसा अधिकारीको टिम पहिलो, डन एकेडेमीका विधान दुवाडी र स्मारिका डल्लाकोटीको टिम दोस्रो र स्मल हेभन मोडल स्कुल आँपटारीका स्वर्णिमा पन्त र रिजन गाहामगरको टिमले तेस्रो स्थान हासिल गरे । पहिलो, दोस्रो र तेस्रो हुने टिमले क्रमशः नगद पुरस्कार रु. सात हजार ५००, पाँच हजार र तीन हजार तथा मेडल र प्रमाणपत्र पाए ।

कार्यक्रममा निर्णायकको भूमिका निर्वाह गर्नुभएका गणित शिक्षक माधव पोखरेलका अनुसार प्राथमिक तहको कार्यक्रमले विद्यार्थीहरूमा स्वस्थ प्रतिस्पर्धात्मक भावना र सामूहिक भावना विकास गर्न महत्त्वपूर्ण भूमिका खेलेको बताउनुभयो । प्रतिस्पर्धाबाट विद्यार्थीहरूले नियमको पालना गर्न, एकाआपसमा सदासयता दर्शाउन, सफलतामा खुशी हुन र असफलतामा धैर्य गर्न सिकेको उहाँले बताउनुभयो ।

यसले बालबालिकामा सकारात्मक सोच र आत्मविश्वास बढाउन सहयोग पुर्याएको तहप्रमुख अर्जुन जी शर्माले जानकारी दिनुभयो । प्रतिस्पर्धाबाट विद्यार्थीमा आत्मअनुशासन, समय व्यवस्थापन तथा आत्ममूल्याङ्कनजस्ता जीवनोपयोगी सीपको विकास गर्न सहयोग पुगेको उहाँले बताउनुभयो । सीमित समयमै प्रश्न समाधान गर्नुपर्ने नियमका कारण विद्यार्थीहरूमा समयको सदुपयोग गने सीपको विकास भएको उहाँको भनाइ थियो ।