चितवन । नेपाल घरवहाल उपभोक्ता मञ्च चितवनको आ.व. २०८२/८४ को लागि दुई वर्षे कार्ययोजना गोष्ठी माडीमा सुरु भएको छ । मञ्चका अध्यक्ष विक्रम सापकोटाको अध्यक्षतामा सुरु भएको कार्यक्रममा माडी नगरपालिकाका नगर प्रमुख तारा कुमारी काजी महतो प्रमुख अतिथि रहनु भएको थियो ।
कार्यक्रममा बोल्दै प्रमुख अतिथि महतोले घरवहाल कर आम्दानी गर्ने (घरबेटी) ले नै तिर्नुपर्ने बताउनुभयो । ‘घरवहाल कर जसले आम्दानी गर्छ उसैले तिर्ने हो’ नगर प्रमुख महतोले भन्नुभयो, ‘माडीमा पनि घरवहाल कर संकलन गर्ने कुरामा नगरपालिकाले नीति निर्माण गर्ने तयारी गरेको छ ।’ माडीमा पनि घरवहाल उपभोक्ता मञ्च रहेको विषयमा आफू जानकार रहेको बताउँदै आगामी दिनमा आवश्यक सहकार्य गर्ने प्रतिबद्धता जनाउनुभयो ।
सोमबारसम्म चल्ने कार्ययोजना गोष्ठीले चालु आवको लागि मञ्चको नयाँ कार्यक्रम निर्माण गर्ने कार्ययोजना गोष्ठीका संयोजक एवं नेपाल घरवहाल उपभोक्ता मञ्च चितवनका वरिष्ठ उपाध्यक्ष सुरेन्द्र केसीले जानकारी दिनुभयो । कार्ययोजना तर्जुमा गोष्ठीमा मञ्चका कानुनी सल्लाहकार गोपिलाल देवकोटा, सल्लाहकार इमान्दु बराल र पूर्वअध्यक्ष प्रभात ढुंगानाले सहजीकरण गर्ने कार्यक्रम रहेको छ ।
यसैगरी सोही कार्यक्रममा नेपाल घरवहाल उपभोक्ता मञ्च माडी शाखाको नयाँ कार्यसमिति गठन गरिएको छ । समितिको अध्यक्षमा नारायण प्रसाद सुवेदी, वरिष्ठ उपाध्यक्षमा लक्ष्मण सदाशंकर, उपाध्यक्षमा आरती महतो, सचिवमा मित्रलाल चापागाई, कोषाध्यक्षमा केशव तिवारी, सहकोषाध्यक्षमा सिर्जना पौडेल, सदस्यहरुमा मुक्ति काफ्ले, डिल बहादुर जिसी, सम्भु शाह रहनुभएको छ ।
प्रतिकृया दिनुहोस्