वृद्धाको हत्या गरी लुटपाट गर्ने पाँच जना पक्राउ

---

चितवन । चितवनको रत्ननगरमा गत पुस २६ गते ६३ वर्षीया सुकमायादेवी तामाङको हत्या गरी फरार व्यक्तिहरु पक्राउ परेका छन् । घरमा एक्लै बस्दै आएकी रत्ननगर–४ सिनेमारोडकी तामाङ दिउँसोसम्म पनि घर बाहिर ननिस्किएपछि स्थानीयले खोजी गर्दा घरभित्रै मृत अवस्थामा फेला पारी प्रहरीलाई खबर गरेका थिए ।

तत्काल प्रहरी पुगेर मुचुल्का उठाउँदा वृद्धाको हत्या भएको हुनसक्ने देखिएपछि अनुसन्धान अघि बढाइएको १९ दिनमै प्रहरीले वृद्धाको हत्यामा संलग्नलाई पक्राउ गर्न सफल भयो । प्रहरीले बिहीबार पत्रकार सम्मेलन गरी सुकमायाको हत्यामा संलग्न पाँच जनालाई पक्राउ गरी सार्वजनिक गरेको छ । प्रहरीका अनुसार हत्यामा संलग्न बारा जितपुर सिमरा उपमहानगरपालिका–२२ स्थायी घर भई हाल रत्ननगर नगरपालिका–१० बस्ने ४६ वर्षीय मोटे र विजय भन्ने शुक्र बहादुर भोलन, बारा जितपुर सिमरा उपमहानगरपालिका–२२ चकरी घर भई हाल ललितपुर महानगरपालिका–१० च्यासल बस्ने ४२ वर्षीय सूर्यमान वाईवा, धादिङ थाक्रे गाउँपालिका–५ बस्ने ३२ वर्षीय बुद्धिमान लामा, स्याङ्जा बिरुवा गाउँपालिका–८ पेल्का स्थायी घर भई हाल चितवनको रत्ननगर नगरपालिका–४ सिनेमार बस्ने ३१ वर्षीय मिलन भन्ने कौ बहादुर गुरुङ र मकवानपुर थाहा नगरपालिका–१२ घर भई हाल काठमाडौँ थानकोट बस्ने ४७ वर्षीय हीराबहादुर स्याडस पक्राउ परेका छन् ।

उनीहरुलाई फरक–फरक समय र ठाउँबाट प्रहरीले पक्राउ गरेको हो । शुक्रलाई रत्ननगर–७, स्थित चित्रसारीबाट प्रहरीले पक्राउ गरेको थियो भने वाइवालाई रत्ननगर–१ सौराहा चोक, बुद्धिमानलाई नवलपरासी (बर्दघाट–सुस्तापूर्व) त्रिवेणी गाउँपालिका–४, सर्दी बगैँचाबाट, कौ बहादुरलाई इच्छाकामना गाउँपालिका–३ फिस्लिङ र हीरा बहादुरलाई काठमाडौँको थानकोटबाट पक्राउ गरिएको प्रहरीले जनाएको छ । सुरुमा घटनाका मुख्य योजनाकार मोटे र विजय भन्ने शुक्र बहादुर भोलनलाई प्रहरीले पक्राउ गरेको थियो ।

घटना भएको ३ दिन भित्रमै उनलाई पक्राउ गर्न सफल भएपछि अन्य अभियुक्त पक्राउ परेको जिल्ला प्रहरी कार्यालय चितवनका प्रमुख एंव प्रहरी उपरीक्षक गोविन्द पुरीले बताउनुभयो । ‘घटनास्थलमा प्रहरीले कुकुरको प्रयोगदेखि सबै प्रविधि प्रयोग गरेर अनुसन्धान अघि बढाएको थियो । हामीले घटना भएको केहीदिनमै एक जनालाई नियन्त्रणमा लिएपछि अन्य अभियुक्तलाई पक्रन सहज भयो’, उहाँले भन्नुभयो, ‘अन्तिम अभियुक्त बुधबार मात्रै पक्राउ गर्न सकिएपछि बिहीबार विवरण सार्वजनिक गरेका हौं ।’

शुक्रले घटनाबारे योजना बनाएपछि सूर्यमान र बुद्धिमान इनड्राइभ लेखिएको ट्याक्सी चढेर चितवन आएका थिए । उनीहरु दुवै जना ट्याक्सी चालक समेत रहेको खुलेको छ । सुरुमै पक्राउ परेका शुक्र पहिले वृद्धकै घरमा डेरामा बस्थे । उनले सबै अवस्था बुझेपछि अन्य साथीहरुको सहयोगमा घटना गराएको प्रहरीको भनाइ छ । उनीहरुले दोस्रो प्रयासमा लुटपाट र हत्या गर्न सफल भएको अनुसन्धानबाट खुलेको छ ।

‘उनीहरुले घटना भएको दुई दिन अघि पनि प्रयास गरेको खुलेको छ, घर बाहिरबाटै ताला लगाएको देखेपछि उक्त दिन भित्र पस्न मिलेन, २६ गते बिहानै पसेर लुटपाट र हत्या गरे’ प्रहरी प्रमुख पुरीले भन्नुभयो । पोष्टमार्टम रिपोर्ट अनुसार लुटपाटको क्रममा बृद्धलाई घाँटी थिचेर हत्या गरिएको खुलेको पुरीले बताउनुभयो । उहाँले पक्राउ परेकाहरु अन्य अपराधिक घटनामा पनि संलग्न हुन सक्ने देखिएकाले त्यतातर्फ पनि अनुसन्धान थालेको बताउनुभयो ।

‘हामी अरु जिल्लाहरुमा पनि बुझ्दै छौं, अन्य ठाउँमा पनि अपराधिक कार्यमा संलग्न हुन सक्ने आशंकामा अनुसन्धान गरिरहेका छौँ’ प्रहरी प्रमुख पुरीले भन्नुभयो । सुकमाया आफ्नै घरभित्रको कोठामा हात, खुट्टा र मुखमा कपडाले बाधिएको अवस्थामा मृत फेला परेकी थिइन् । कोठा र दराज छरपस्ट अवस्थामा देखिएपछि प्रहरीले अनुसन्धान अघि बढाएको थियो ।

प्रहरीले पक्राउ परेकाहरुको साथबाट पल्सर मोटरसाइकल, एउटा ट्याक्सी, मृतकको मोबाइल, मृतकले पैसा राखेको कपडाको पर्स र घटनामा संलग्नहरुको मोबाइल बरामद गरेको छ । मृतकका आफन्तले एक लाख नगद हराएको उल्लेख गरेका छन् । प्रहरीले अभियुक्तबारे पत्रकार सम्मेलन गर्दा पीडितहरु प्रहरी कार्यालय पुगेका थिए ।

पक्राउ परेका पाँच जनालाई नै कर्तव्य ज्यान, चोरी, डाँका कसुर सम्बन्धि मुद्दा चलाउने तयारी गरिएको बिहीबार आयोजित पत्रकार सम्मेलनमा जानकारी दिइएको छ । मुलुकी (अपराध) संहिता २०७४ अनुसार ज्यान मारेकोमा जन्मकैदसम्म सजाय हुने भएकाले सोही अनुसार अघि बढाइने प्रहरीले जनाएको छ । डाँका सजाय अनुसार ७ देखि १४ वर्षसम्म थप कैद सजाय माग गर्दै मुद्दा चलाइने प्रहरीले जनाएको छ ।