नवलपुरका मतदाता भन्छन् : चुनावी नारा, अझै छन् अधुरा

---

नवलपुर । फागुन २१ मा हुने प्रतिनिधिसभा सदस्य निर्वाचनको मिति नजिकिदै गर्दा नवलपुरका मतदाताहरु भने नेताहरुले गरेको चुनावी बाचा सम्झिन थालेका छन् ।

यस अघिका निर्वाचनमा उम्मेदवारहरुले गरेका चुनावी बाचा केही पूरा भए पनि धेरै अधुरा नै रहेका मतदाताहरु बताउँछन् । नवलपुरको प्रतिनिधिसभा सदस्य निर्वाचन क्षेत्र नम्बर २ मा रहेको नारायणी नदी कटान, मानव वन्यजन्तु द्वन्द्व, जग्गाको लालपुर्जा लगायत मुख्य समस्या समाधान गर्नेभन्दै यसअघि उम्मेदवारहरुले मतदाता समक्ष प्रतिबद्धता जारी गर्ने गरेका मध्यविन्दु–३ का मतदाता मित्र पौडेलले बताउनुभयो । “यहाँको मुख्य समस्यामा रहेको विषयमध्ये नारायणी नदीको कटान नियन्त्रणका लागि कामको थालनी भएको छ” उहाँले भन्नुभयो, “बाँकी विषय कहिल्यै प्राथमिकतामा परेको हामीले पाएका छैनौँ ।”

मुख्य समस्याबाहेक यहाँ स्वास्थ्य, शिक्षा, रोजगारी, सडकलगायतका पूर्वाधारको विकास हुन नसकेको भन्दै उहाँले स्वास्थ्य क्षेत्रमा केही सुधार देखिएको भए पनि अन्य समस्या सम्बोधन हुन नसकेको गुनासो गर्नुभयो । “गरिबीको रेखामुनि रहेका समुदायले गुणस्तरीय शिक्षा पाउन कठिन छ, रोजगारी नहुँदा हरेक घरबाट सक्नेहरु ऋणधन गरी खाडी गएका छन्, नसक्नेहरु भारत जानुपर्ने बाध्यता छ” उहाँले भन्नुभयो, “यस क्षेत्रमा सिँचाइको सुविधा छैन, उत्पादन भएको खाद्य बाली पनि वन्यजन्तु आएर नष्ट गरिदिन्छ ।” अब फेरि चुनाव नजिकिदै गर्दा उम्मेदवारहरु गाउँ आएर गर्ने बाचा यिनै भएका भन्दै यहाँको समस्या सधैँ चुनावी नारा र मतदाताहरु ‘भोेट बैंक’को रुपमा लिने गरिएको पौडेलले बताउनुभयो ।

कावासोती नगरपालिका–१७ की बासिन्दा अनिताकुमारी थनेतले भोट माग्न आउँदा जङ्गली जनावरहरु गाउँ पस्न रोक्ने बताउने गरेका तर अझैसम्म यो काम पूरा नभएको बताउनुभयो । “भोट माग्न आउँदा जनावरलाई गाउँ आउन नदिन तारबार गर्छौँ भनेर जान्छन्” उहाँले भन्नुभयो, “खै अझै पनि जनावर आएर हामीले लगाएको धान, मकै खाने गरेको छ ।” नेताहरुले बाटो बनाउँछम् भनेर गएकोमा बाटो भने पक्की बनेकोमा उहाँले खुशी व्यक्त गर्नुभयो । “बाटो बनेको छ, धूलो उडाउँदै हिड्नु पर्दैन” उहाँले भन्नुभयो, “काम गर्छु भनेर भोट माग्छन्, जितेर गएपछि खै के के गर्छन् हामीलाई भेट्न पनि आउँदैनन् ।”

विनयी त्रिवेणी गाउँपालिका–१ दुम्कीबासका २२ वर्षीय जेनजी मतदाता आदित्य विश्वकर्माले युवाहरुलाई स्वेदशमै रोजगारीको व्यवस्था हुनुपर्ने बताउनुभयो । “हामी युवाले परिवर्तन चाहेका छौँ, त्यस्तो परिवर्तन जुन परिवर्तनले युवाहरु देशमै बसेर रोजगार गर्ने वातावरण बनोस्” उहाँले भन्नुभयो, “गाँस, बास, कपास, शिक्षा, स्वास्थ्य जस्ता आधारभूत आवश्यकता पूरा गर्न विदेश जानुपर्ने अवस्थाको अन्त्य होस् ।” उहाँले अगाडि थप्नुभयो, “मुलुकमा धेरै परिवर्तन भएको सुन्दै पढ्दै आयौँ, भदौ २३ र २४ को परिवर्तनले त आफ्नै आँखाले देख्यौँ, अब हाम्रो अवस्था परिवर्तन हुनुगरी काम हुनुपर्छ ।”

मुलुकमा धेरैपटक व्यवस्था परिवर्तन भए पनि जनताको अवस्था उस्तै रहेको भन्दै जसले जितेर सरकार बनाए पनि अब जनतालाई ढाँट्ने छुट नभएको विश्वकर्माको भनाइ छ । युवाहरुलाई उनीहरुको चाहनाअनुसारको सीप दिएर उद्यमशील बनाउने गरी नीति तथा बजेट तयार पार्नुपर्ने उहाँले बताउनुभयो । “यो निर्वाचन विकास गर्ने भन्दा पनि विकास गर्नका लागि आवश्यक पर्ने नीति निर्माण र ऐन, कानुन बनाउने भन्ने मैले बुझेको छु” उहाँले भन्नुभयो, “हाम्रो जिल्लामा व्यप्त सुकुमबासी समस्या, मानव वन्यजन्तु द्वन्द्व, बाढी तथा कटान समस्या समाधान गर्नेगरी कानुन बनाएर काम गर्नुपर्छ ।”

नवलपुरको प्रतिनिधिसभा सदस्य निर्वाचन क्षेत्र नम्बर २ मा १८ जना उम्मेदवारहरु चुनावी मैदानमा छन् । यस क्षेत्रमा १२ जना राजनीतिक पार्टीबाट तथा ६ जनाले स्वतन्त्र उम्मेदवारी दिएका छन् । यस क्षेत्रमा १८ जना उम्मेदवारहरु चुनावी मैदानमा देखिए पनि यहाँ दलहरुको राजनीतिक बिरासत तथा नयाँ आएको लहरलाई विश्लेषण गर्दा नेकपा एमाले, नेपाली काँग्रेस, नेपाली कम्युनिष्ट पार्टी, रास्ट्रिय स्वतन्त्र पार्टी र राष्ट्रिय प्रजातन्त्र पार्टीका उम्मेदवारबीच प्रतिस्पर्धा हुने देखिन्छ ।

जिल्लाको निर्वाचन क्षेत्र नम्बर २ मा मध्यविन्दु नगरपालिका, हुप्सेकोट गाउँपालिका, बौदिकाली गाउँपालिका र विनयी त्रिवेणी गाउँपालिकाको पूरै वडा एवम् कावासोती नगरपालिकाको वडा नम्बर ३, ४ र १४ देखि १७ नम्बर सम्मका वडाहरु पर्दछन् । यहाँ यहाँ ६३ हजार ७२ महिला, ६८ हजार तीन सय ७० पुरुष एवम् तीन जना यौनिक तथा लैङ्गिक अल्पसङ्ख्यक गरी जम्मा एक लाख ३१ हजार चार सय ४५ मतदाता रहेका जिल्ला निर्वाचनत अधिकारी लालप्रसाद शर्मा भुसालले जानकारी दिनुभयो । यस क्षेत्रको ५६ वटा मतदानस्थलका एक सय ५४ मतदान केन्द्रबाट मतदान हुने भुसालको भनाइ छ ।