शाइनिङ स्कुलले बनायो जिल्लाकै पहिलो फुटसल मैदान (भिडियो)

---

नवलपुर । नवलपुरको गैँडाकोटस्थित शाइनिङ इङ्गलिस माध्यमिक विद्यालयले जिल्लामै पहिलोपटक विद्यालयमा फुटसल मैदान निर्माण गरेको छ । नवलपुरको कुनै पनि विद्यालयमा फुटसल मैदान नभएको अवस्थामा शाइनिङले रु ६५ लाख खर्च गरेर फुटसल मैदान बनाएका पत्रकार सम्मेलनमा जानकारी दिएको छ ।

विद्यालयका प्रधानाध्यापक डा लक्ष्मीप्रसाद दवाडीले विद्यार्थीहरुलाई पढाइसँगै खेलकुदमा पनि सहभागी बनाउनुपर्छ भनेर फुटसल मैदान निर्माण गरेको बताउनुभयो । “फुटसलका लागि आवश्यक सम्पूर्ण मापदण्ड पूरा गरेर हामीले यो मैदान बनाएका छौँ” उहाँले भन्नुभयो, “यो मैदान विशेषगरी हाम्रा विद्यार्थीहरुको लागि निर्माण गरिएको भए पनि विद्यालयमा शैक्षिक क्रियाकलाप नभएका बेला समुदायलाई पनि प्रयोग गर्न दिने नीति बनाएका छौँ ।” नवनिर्मित फुटसल मैदानमा चाँडै नै जिल्लास्तरीय अन्तरविद्यालय फुटसल प्रतियोगिता गर्ने तयारी गरिएको उहाँले बताउनुभयो ।

अनुशासन, नैतिकता, गतिशीलता र गुणस्तरीयता भन्ने मूल नाराका साथ विशेष गरी विद्यार्थीको स्वास्थ्य र सुरक्षालाई ध्यानमा राखी शाइनिङ फुटसलको अवधारणा ल्याइएको उहाँले बताउनुभयो । स्वस्थ शरीर नै स्वस्थ मष्तिष्क हुन्छ भन्ने भनाइलाई आत्मसात गर्दै हाल विद्यालयमा अध्ययनरत ८०० विद्यार्थीहरुको पढाइमा खेलकुदको माध्यमबाट गुणस्तरीयता ल्याउनका लागि मैदान तयार भएको उहाँको भनाइ छ । शिक्षा केवल किताब, परीक्षा र प्रमाणपत्रमा मात्रै सीमित नहुने भन्दै उहाँले शिक्षा जीवन जिउने कला भएकाले विद्यार्थीको शारीरिक, मानसिक, बौद्धिक र सामाजिक सबै पक्ष स्वस्थ राख्न खेलकुद आवश्यक पर्ने दवाडीको भनाइ छ ।

जिल्ला खेलकुद विकास समितिका अध्यक्ष लक्ष्मण कार्कीले विद्यालयमा जिल्लाकै पहिलो फुटसल मैदान तयार हुनुले सकारात्मक सन्देश दिने बताउनुभयो । खेलकुदले विद्यार्थीहरुलाई समूह कार्य, नेतृत्व क्षमता, समय व्यवस्थापन, अनुशासन तथा हारजीतलाई स्वीकार गर्ने क्षमताको विकास गराउन महत्वपूर्ण शिक्षा दिने कार्कीको भनाइ छ । विद्यालयसँग सहकार्य गरेर जिल्लामा हुने ठूला फुटसल प्रतियोगिता शाइनिङ फुटसलमा गरिने उहाँले बताउनुभयो ।