चितवनमा रास्वपाले ‘क्लिन स्वीप’ गर्दा काँग्रेस–एमालेको जमानत जफल

---

आनन्द पोखरेल
चितवन । प्रतिनिधिसभा सदस्यको तीन वटा निर्वाचन क्षेत्र रहेको चितवनका सबै क्षेत्र राष्ट्रिय स्वतन्त्र पार्टीले ‘क्लिन स्वीप’ गरेको छ । चितवन–१ बाट हरि ढकाल दोस्रोपटक निर्वाचित हुँदा पार्टी सभापति रवि लामिछाने चितवन–२ बाट तेस्रो तथा चितवन–३ बाट सोबिता गौतम पहिलोपटक निर्वाचित भएकी छिन् ।

सभापति लामिछाने २०७९ को निर्वाचनमा चितवन–२ बाट प्रतिनिधिसभा प्रवेश गरेको केही समयमै नागरिकता मुद्दामा उनको पद निलम्बनमा परेको थियो । त्यसपछि भएको उपनिर्वाचनमा पुनः लामिछाने यही क्षेत्रबाट दोस्रोपटक निर्वाचित भएका थिए । शनिबार सार्वजनिक भएको अन्तिम मत परिणामअनुसार रवि निर्वाचित हुँदा यस क्षेत्रका अन्य २१ उम्मेदवारको जमानत समेत जफत हुने भएको छ ।

नेपाली काँग्रेसकी उम्मेदवार मीना कुमारी खरेलले भने जमानत जोगाएकी छिन् । बिहीबार भएको निर्वाचनमा चितवन–२ मा ८७ हजार २८ मत खसेकोमा दुई हजार ७९६ मत बदर हुँदा ८४ हजार २३२ मत सदर भएको थियो । अन्तिम मतपरिणामअनुसार लामिछाने ५४ हजार ४०२ मत प्राप्त गरेका छन् । उनीसँग प्रतिस्पर्धामा उत्रिएका खरेलबाहेक अन्य राजनीतिक दल र स्वतन्त्र उम्मेदवार गरी २१ जनाले सदर मतको न्यूनतम १० प्रतिशत मत समेत कटाउन सकेनन् ।

चितवन–२ मा जमानत जोगाउन आठ हजार ४२३ मत आवश्यक पर्नेमा निकटम प्रतिस्पर्धीबाहेक पराजित भएका अन्य कुनै पनि उम्मेदवारले त्यति मत ल्याउन नसकेका जिल्ला निर्वाचन अधिकारी भीमसेन कार्कीले जानकारी दिए । कार्कीका अनुसार लामिछानेको निकटम प्रतिस्पर्धी रहेकी नेपाली काँग्रेसकी उम्मेदवार मीना कुमारी खरेलले १४ हजार ५६४ मत प्राप्त गरेकी छिन् । यस क्षेत्रमा नेकपा एमालेका अस्मिन घिमिरेले ६ हजार ९९२ मत प्राप्त गर्दा नेपाली कम्युनिष्ट पार्टीका प्रताप गुरुङले चार हजार ९६९ मत प्राप्त गरे । यहाँ एक लाख ३७ हजार १५२ मतदाता रहेका थिए ।

त्यस्तै चितवन–३ मा रास्वपा नेतृ सोबिता गौतम ५९ हजार बढी ल्याएर निर्वाचित हुँदा यहाँ पनि उनको निकटम प्रतिस्पर्धी बाहेक सबैको जमानत जफत हुने भएको छ । कुल एक लाख ५५ हजार ३०९ मतदाता रहेको यस क्षेत्रमा एक लाख ३३ मत खसेको थियो । जसमा तीन हजार ३३७५ मत बदर हुँदा ९६ हजार ६५८ मत सदर भएको थियो ।

रास्वपा नेतृत्व गौतमले ५९ हजार २७७ मत ल्याएर निर्वाचित हुँदा उनकी निकटतम प्रतिस्पर्धी नेपाली कम्युनिष्ट पार्टीकी उम्मेदवार रेनु दाहालले २० हजार ६१५ मत मात्रै प्राप्त गरिन् । यहाँ तेस्रो स्थनमा आठ हजार ३४४ मत सहित नेपाली काँग्रेसका उम्मेदवार टेकप्रसाद गुरुङ तथा चौथो स्थानमा पाँच हजार चार मतसहित नेपाल कम्युनिष्ट पार्टी (एमाले)का उम्मेदवार शंकरराज थपलिया रहेका छन् ।

चितवन ३ मा जमानत जोगाउन नौ हजार ६६६ मत आवश्यक पर्नेमा रेनु दाहाल बाहेक अन्य कुनै पनि उम्मेदवारले त्यति मत प्राप्त गर्न सकेनन् । चितवन–३ मा २३ उम्मेदवार रहेकामा २१ जनाको जमानत जफत हुने भएको छ ।

त्यसैगरी, चितवन–१ मा हरि ढकालले समेत फराकिलो मतान्तरसहित जित निकालेका छन् । एक लाख ४९ हजार ६४१ मतदाता रहेको यस क्षेत्रमा ९६ हजार १५४ मत खसेको थियो । ढकालले ५८ हजार २०८ मतसहित चितवन–१ बाट दोस्रोपटक प्रतिनिधिसभाको ढोका खोलेका छन् ।

यस क्षेत्रमा भने एमाले र काँग्रेस दुवै पार्टीका उम्मेदवारले आफ्नो जमानत जोगाए पनि अन्य उम्मेदवारले भने जमानत जोगाउन सकेनन् । यहाँ नेपाली काँग्रेसका राजेन्द्रप्रसाद बुर्लाकोटीले १३ हजार ३३ मत प्राप्त गर्दा नेकपा एमालेका दावादोर्जे लामाले १० हजार ८९९ तथा नेपाली कम्युनिष्ट पार्टीका कृष्णराज पन्तले चार हजार ८१ मत प्राप्त गरेका थिए । यस क्षेत्रमा राजनीतिक दल र स्वतन्त्र गरी १८ जना उम्मेदवार रहेका थिए ।