२४ चैत्र २०८२, मङ्गलबार १८:१७
चितवन । चितवनको भरतपुरमा सञ्चालनमा रहेको होटल पौवाले आफ्नो १०औँ वार्षिकोत्सवको अवसरमा विभिन्न खानाका परिकार चखाउन स्वाद उत्सव गर्ने भएको छ । भरतपुर–१० क्यान्सर रोडमा रहेको होटलले यही चैत २७, २८ र २९ गते सेवाग्राहीहरुलाई निःशुल्करुपमा विभिन्न खानाका परिकार चखाउँदै वार्षिकोत्सवको कार्यक्रम मनाउन लागेको मंगलबार आयोजित पत्रकार सम्मेलनमा जानकारी दिइएको छ ।
पत्रकार सम्मेलनमा शाखाका महाप्रबन्धक रामप्रसाद रेग्मीले तीन दिनसम्म सेवाग्राहीहरुलाई हरेक दिन फरक फरक परिकारहरुको स्वाद चखाउने जानकारी दिए । उनकाअनुसार २६ गते मसरुम टकाटक र फिस तावा, २७ गते पुदिना चिकन र पनिर अकबरे तथा २८ गते बटर चिकन र हनी चिल्ली पोटाटोको स्वाद चखाइनेछ । स्वाद उत्सवमा सहभागी हुनका लागि जिल्लाका आठ हजार बढी व्यक्तिहरुलाई निमन्त्रणा पठाइएको उल्लेख गर्दै उनले तीन दिनमा कम्तिमा ६ हजार जनाको सहभागिता रहने विश्वास व्यक्त गरे ।
स्वाद उत्सवमा चखाइएको परिकारलाई सेवाग्राहीले मन पराएको अवस्थामा होटल पौवाको नियमित मेन्युमा समेत ती खानालाई समावेश गरिने रेग्मीको भनाइ छ । यस अघि कात्तिकमा आयोजना गरिएको कार्यक्रममा १२ हजार सेवाग्राहीलाई खानाका परिकारको स्वाद चखाइएको उनले बताए । त्यस्तै होटलले चैत २५ गते बुधबार नारायणघाटमा रहेको मानव सेवा आश्रममा रहेका सहयोगापेक्षी व्यक्तिहरुलाई खाना खुवाएर दशौँ वार्षिकोत्सवको कार्यक्रम शुभारम्भ गर्न लागेको मंगलबार आयोजित पत्रकार सम्मेलनमा जानकारी दिइएको छ ।
यसैबीच, होटलले नेपाली नयाँ वर्षलाई स्वागत गर्नका लागि चैत ३० गते ‘शुभकामना साँझ’ कार्यक्रम राखेको छ । नयाँवर्षको स्वागतमा चैत्र ३० गतेको साँझ स्थानीय तथा ख्यातिप्राप्त राष्ट्रिय कलाकारहरुबाट सांगीतिक कार्यक्रम सहित ‘शुभकामना साँझ–२०८३’ आयोजना गर्न लागिएको जनाइएको छ । शुभकामना साँझमा कलाकारहरु शिशिर देवकोटा, सलिना बिक तथा अमित बराल एण्ड द ब्याण्ड सहित राष्ट्रिय कलाकार र रत्ननगर कला मन्दिरको प्रस्तुति रहने जनाइएको छ ।
दश वर्ष अघि चैत २५ गते नेपाली हस्पिटालिटीको घोषणा गर्दै रुपन्देहीको सालझण्डीस्थित सानो घरको सात कोठाबाट प्रारम्भ भएको चेन होटलको सेवा भैरहवाबाट होटल पौवाको नामले देशका बिभिन्न क्षेत्रमा विस्तार हुँदै गएको थियो । छोटो अवधिमै नेपाली आतिथ्य क्षेत्रमा आफ्नो छुट्टै पहिचान स्थापित गर्दै हाल देशका विभिन्न स्थानमा २० वटा शाखा मार्फत पौवाले सेवा प्रदान गर्दै आएको बताइएको छ । नेपाली भाषा, संस्कृति तथा रैथाने खानाको संरक्षण र प्रवद्र्धनमा विशेष जोड दिँदै स्वदेशी लगानी, सामूहिक स्वामित्व र नेपाली आतिथ्य संस्कृतिलाई आधार बनाएर अघि बढिरहेको होटल पौवा प्रालीले आफ्नो गौरवमय १० वर्ष पूरा गरेको अवसरमा देशभरका शाखामा स्वाद उत्सव मनाउने जनाइएको छ ।
दुई सय ५० जना बढी लगानीकर्ता रहेको होटल पौवाले हाल झण्डै एक हजार भन्दा व्यक्तिलाई रोजगारी दिएको होटल पौवाको ब्राण्डिङ विभाग प्रमुख विष्णुप्रसाद भण्डारीले जानकारी दिए । कम्पनीले आगामी दिनमा देशका विभिन्न स्थानमा थप शाखा विस्तार गर्दै नेपाली आतिथ्य क्षेत्रलाई अझ व्यापक रुपमा प्रवद्र्धन गर्ने योजना अघि बढाएको भण्डारीको भनाइ छ ।
प्रतिकृया दिनुहोस्