२८ चैत्र २०८२, शनिबार ०९:१९
नवलपुर । नवलपुरको गैँडाकोट नगरपालिकाद्वारा सञ्चालित शैक्षिक सत्र २०८२ को नगरस्तरीय वार्षिक परीक्षामा गैँडाकोट नमुना माविका ६ जना विद्यार्थीले चार जिपीए ल्याएका छन् । विद्यालयले पालिकामा नै उत्कृष्ट नतिजा हासिल गर्दै आफ्नो शैक्षिक साखलाई पुनः एकपटक उँचो पारेको विद्यालयले जनाएको छ ।
गैँडाकोट नगरपालिकाद्वारा सार्वजनिक कक्षा ५ को वार्षिक नतिजाअनुसार आराध्या लम्साल, अश्मी सुवेदी, सृष्टी पोखरेल, स्मृती पौडेल, प्राञ्जल घिमिरे र रोनक थापा क्षेत्रीले चार जिपीए प्राप्त गरी विद्यालयको गरिमा बढाएका विद्यालयले जनाएको छ । यस वर्षको कक्षा ५ को परीक्षामा विद्यालयबाट ९० जना विद्यार्थी सहभागी थिए । सहभागी विद्यार्थीमध्ये ५० जनाले ३.६ देखि ४.० सम्मको उत्कृष्ट ग्रेड प्राप्त गरेका छन् ।
त्यस्तै, कक्षा ८ मा ७६ जना विद्यार्थी सहभागी भएकोमा २४ जनाले ३.६ देखि ४.० सम्मको नतिजा ल्याउन सफल भएका छन् । कक्षा ८ मा आषिका खड्का, जेनिशा श्रेष्ठ र सिवानी खड्काले ३.९७ जिपीए प्राप्त गर्दै सर्वाधिक अंक हासिल गरी विद्यालयलाई गौरवान्वित तुल्याएका विद्यालयका प्राधानाध्यापक गोपेन्द्र केशरी न्यौपानेले बताउनुभयो । बिहीबार सार्वजनिक भएको नगरस्तरीय परीक्षाको नतिजाले विद्यालयको शैक्षिक गुणस्तर र आधुनिक शिक्षण पद्धतिको प्रभावकारिता अब्बल भएको देखाएको न्यौपानेको दावी छ ।
विद्यालयले प्राप्त गरेको यस सफलताको श्रेय विद्यार्थीको लगनशीलता, शिक्षकहरूको मेहनत र विद्यालयद्वारा कार्यान्वयन गरिएको ‘सात ए’ एकेडेमिक फ्रेमवर्कलाई जाने न्यौपानेको भनाइ छ । “चार जिपीए ल्याउने हाम्रा विद्यार्थीहरूको उपलब्धिले हाम्रो प्रोजेक्ट–बेस्ड लर्निङ र फ्लिप्ड क्लासरूम मोडेलको सार्थकतालाई प्रमाणित गरेको छ” उहाँले भन्नुभयो, “विद्यालयको शैक्षिक सुधारमा शिक्षक–अभिभावक सहकार्य र सिकाइ प्रक्रियामा अभिभावकको सक्रिय संलग्नताको भूमिका महत्वपूर्ण छ ।”
आगामी शैक्षिक सत्र २०८३ को तयारीलाई थप व्यवस्थित बनाउन विद्यालयले विशेष कार्ययोजना सार्वजनिक गरेको जनाइएको छ । आगामी शैक्षिक सत्रका लागि वैशाख २ गतेदेखि सात ए एकेडेमिक फ्रेमवर्क, डिजिटल शिक्षण विधि, ’ह्यान्ड–राइटिङ ट्रेनिङ’ र शिक्षक–अभिभावक सहकार्य सम्बन्धी विशेष तालिमहरू सञ्चालन गरिने न्यौपानेले बताउनुभयो । वैशाख २ गतेबाटै अभिभावकहरूले विद्यालयको शैक्षिक गतिविधिबारे प्रत्यक्ष वा डिजिटल माध्यमबाट बुझ्न सक्ने व्यवस्था मिलाइएको उहाँको भनाइ छ ।
त्यस्तै, नयाँ शैक्षिक सत्रलाई थप प्रविधिमैत्री बनाउन विद्यालयले कक्षा ३ देखि नै सबै विद्यार्थीका लागि अनिवार्य रूपमा सूचना र प्रविधिको कोडिङ, रोबोटिक्स र कृत्रिम बुद्धिमत्ताको कक्षा सञ्चालन गर्ने न्यौपानेले जानकारी दिनुभयो । ‘स्मार्ट क्लासरूम’ को विस्तार र अनुसन्धानमा आधारित शिक्षण पद्धतिलाई अझ सुदृढ गर्दै विद्यालयले आफ्ना विद्यार्थीहरूलाई विश्वस्तरीय प्रतिस्पर्धी बनाउने प्रतिबद्धता जनाएको छ ।
प्रतिकृया दिनुहोस्