एसइईमा चार जीपीए ल्याउने पन्तलाई जीइएसद्वारा एक लाख पुरस्कार (भिडियोसहित)

---

नवलपुर । माध्यमिक शिक्षा परीक्षा (एसइई)मा चार जीपीए ल्याएर उत्तीर्ण हुने विद्यार्थीलाई नवलपरासी (बर्दघाट–सुस्तापूर्व)को गैँडाकोटस्थित गैँडाकोट इङ्गलिस स्कूल (जीइएस)ले नगदसहित सम्मान गरेको छ ।

विद्यालयबाट चार जीपीए ल्याई उत्तीर्ण हुने विद्यार्थी तेजस्वी पन्तलाई गैँडाकोट नगरपालिका नगर शिक्षा अधिकारी खेमप्रसाद आचार्य, विद्यालय व्यवस्थापन समितिका अध्यक्ष कृष्णप्रसाद कोइराला तथा विद्यालयका प्रधानाध्यापक हीरालाल अर्यालले रु एक लाख नगदसहित सम्मान गर्नुभएको हो । आज भएको नगद पुरस्कार हस्तान्तरण तथा सम्मान कार्यक्रममा नगर शिक्षा अधिकारी कोइरालाले विद्यालय तहको पाठ्यक्रमले धेरै जीपीए ल्याउन मद्दत गरेको भए पनि नम्रता, अनुसासन र सामाजिक मूल्य र मान्यतामा विद्यार्थी कमजोर रहेको बताउनुभयो । जीपीए मात्रै सबै कुरा नभएको भन्दै आचार्यले गुणस्तरीय शिक्षा प्राप्त गर्ने प्रकृयामा विद्यालय, शिक्षक, विद्यार्थी र अभिभावकले जोड दिनुपर्ने बताउनुभयो ।

अहिले विद्यार्थीहरु शिक्षामा अब्बल हुँदै गएको भए पनि नैतिकता, सदाचारी, अनुसासित विद्यार्थी उत्पादन हुन नसकेको आचार्यले बताउनुभयो । कार्यक्रममा विद्यालयका प्रधानाध्यापक अर्यालले विद्यालयको पछिल्लो पाँच वर्षे शैक्षिक गतिविधिको समीक्षा गर्दै विद्यालयले निरन्तर उत्कृष्ट नतिजा हासिल गर्दै आएको बताउनुभयो । उहाँले यस विद्यालय आफ्नो विद्यालयबाट एसइई उत्तीर्ण विद्यार्थीहरुको औषत जीपीए ३ दशमलव ४५ रहेको भन्दै सबैभन्दा बढी औषत जीपीए अङ्ग्रेजीमा ३ दशमलव ८० रहेको जानकारी दिनुभयो ।

विद्यार्थीले उच्च जीपीएसहित एसइई उत्तीर्ण रहेको भन्दै आगामी वर्षहरुमा यसलाई निरन्तरता दिन सक्नुपर्नेमा प्रधानाध्यापक अर्यालले जोड दिनुभयो । उक्त कार्यक्रममा जीपीए चार ल्याउने विद्यार्थी तेजस्वी पन्तले आफ्नो नियमित पढाइसँगै शिक्षक र अभिभावकको सहकार्यले उत्कृष्ट नतिजा ल्याउन सफल भएको बताउनुभयो । अध्ययनका क्रममा पाठ घोकेर भन्दा पनि विषयवस्तुलाई राम्रोसँग बुझेर पढ्न सकेमा उत्कृष्ट नतिजा प्राप्त गर्न सकिने पन्तले बतउनुभयो ।

विद्यार्थी पन्तका पिता कृष्णप्रसाद पन्तले छोरीको खुसीमा परिवारका सबैजनाको मेहनत रहेकाे बताउनुभयो । छोरीलाई पढाइको दवाब दिनुभन्दा पनि नबुझेको विषयमा सहजीकरण गर्दै पढ्न सहयोग गर्दा यो नतिजा प्राप्त भएको उहाँको भनाइ छ ।

आइतबार सार्वजनिक भएको २०८२ को एसइईको नतिजाअनुसार जिल्लाबाट १९ जना विद्यार्थीले जीपीए ४ प्राप्त गरेका छन् । प्राविधिक सहित सामुदायिक र संस्थागत गरी जिल्लाका १४३ विद्यालयबाट पाँच हजार ६९७ विद्यार्थी एसइईमा सहभागी भएमा चार हजार १३० जना उत्तीर्ण भएका छन् । जिल्लाबाट ७२ दशमलव ४९ प्रतिशत विद्यार्थी उत्तीर्ण भएका शिक्षा विकास तथा समन्वय इकाइ नवलपुरले जनाएको छ ।