चितवन । जिल्ला प्रहरी कार्यालय चितवनका प्रहरी प्रमुख प्रहरी उपरीक्षक रामेश्वर पौडेलले जिल्लामा काम गर्ने क्रममा शून्य सहनशीलता कायम गर्दै काम गर्ने बताउनुभएको छ । जेठ ६ गतेबाट जिल्लाको प्रहरी प्रमुखको नेतृत्व सम्हानुभएका पौडेलले सोमबार पत्रकारहरुसँग अन्तरक्रिया गर्दै गर्दै कानुनी सर्वोच्चता कायम गर्दै काम गर्ने बताउनुभयो ।
अपराधको रोकथाम र नियन्त्रण, अपराधको अनुसन्धान, शान्ति सुरक्षा कायम गर्ने र जनता केन्द्रित काम गर्नका लागि नेपाल सरकारले नेपाल प्रहरीलाई जिम्मेवारी दिएको उहाँले बताउनुभयो । सरकारले नेपाल प्रहरीलाई दिएको जिम्मेवारी पूरा गर्नका लागि प्रहरी ऐन र प्रहरी नियमावली अनुसार काम गर्न आफू प्रतिबद्ध रहेको पौडेलको भनाइ छ । “सरकारले चितवन प्रहरी प्रमुखलाई दिएको जिम्मेवारीलाई पूर्णरूपमा पालना गरी मैले ती कामहरू पूरा गर्ने प्रतिबद्धता व्यक्त गर्दछु” उहाँले भन्नुभयो ।
कानूनी सर्वोच्चतालाई पालना गर्दै काम गर्ने आफूहरुको जिम्मेवारी भएको उहाँले बताउनुभयो । कानूनले गर भनेको कुरा गर्ने नगर भनेको कुरा नगर्ने अथवा निर्देशित गरेका कामलाई गर्ने र निषेधित गरेको कामलाई रोक्न प्रहरीको समान प्राथमिकता हुनेमा उहाँले जोड दिनुभयो । “हरेक कुरामा शून्य सहनशीलता भन्ने सिद्धान्तका साथ काम गर्ने क्रममा पारदर्शिता कायम गर्नेछौँ” उहाँले भन्नुभयो, “काम गर्ने क्रममा कतै कमजोरी भएमा जिल्लावासीले घच्घच्याउनु हुनेछ भन्ने आशा लिएको छु ।”
प्रहरी उपरीक्षक पौडेलले काम गर्ने क्रममा प्रहरीले सुधार गर्नुपर्ने कुरा भएमा स्थानीय सेवाग्राहीको सुझावको आधारमा सुधार गरेर अगाडि बढ्ने प्रतिबद्धता व्यक्त गर्नुभयो । नागरिकलाई सेवा प्रवाह गर्ने क्रममा दिनरात नभनिकन शून्य सहनशीलता कायम गर्दै सेवाग्राहीलाई सेवा प्रदान उहाँको भनाइ छ । “सेवा प्रवाहको क्रममा कहीँकतै प्रहरी नपुगेको ठाउँमा हामीलाई घच्घच्याइ दिनुहोला” उहाँले भन्नुभयो ।
पुलिसङ गर्ने दुईवटा तरिका हुने भन्दै उहाँले एउटा प्रोएक्टिभ र अर्को रिएक्टिभ हुने बताउनुभयो । चितवनमा प्रोएक्टिभ तरिका अपनाउँदै सकभर रामराज्य बनाउन खोज्ने र अपराधै नहोस् भन्ने आफूहरुको चाहना भएको उहाँले बताउनुभयो । उहाँले हरेक घर तथा सार्वजनिक क्षेत्रमा सिसि क्यामेरा जोड्न सकेमा त्यसले सुरक्षित बनाउने बताउनुभयो ।
अपराध भइहाल्यो भने अनुसन्धान गर्नुपर्ने भन्दै पौडेलले सेवाग्राहीको घरमा सिसि क्यामेरा भयो भने अनुसन्धानमा त्यसले लिडको काम गर्ने बताउनुभयो । विशेषगरी चोरीको घटना, सडक दुर्घटना गरेर भाग्ने घटना तथा लुप्त अपराधका घटनामा सिसिटिभी क्यामेराले प्रहरीलाई सहायकको भूमिका निर्वाह गर्ने उहाँले बताउनुभयो ।
सम्वन्धित समाचारहरु
प्रतिकृया दिनुहोस्