गैँडाकोटमा सवारी दुर्घटना हुँदा आठ जना घाइते

---

नवलपुर । पूर्व–पश्चिम राजमार्गअन्तर्गत नवलपरासी (बर्दघाट–सुस्तापूर्व)को गैँडाकोट–१० पितौजीमा सोमबार साँझ इभी हाइस दुर्घटना हुँदा आठ जना घाइते भएका छन् । घाइतेमध्ये दुई जनाको अवस्था गम्भीर रहेको छ ।

पोखराबाट कपिलबस्तुको कृष्णनगरतर्फ जाँदै गरेको बागमती प्रदेश ०२–०३ च १२०५ नम्बरको विद्युतीय सवारी (इभी) हाइस अनियन्त्रित भई सडकमा पल्टिएको थियो । दुर्घटनापछि सशस्त्र प्रहरी बलको टोली तत्काल घटनास्थल पुगेर उद्धार कार्य गरेको सशस्त्र प्रहरी बल नम्बर ३१ गुल्म हेडक्वाटर पितौजीका सशस्त्र प्रहरी निरीक्षक रामचन्द्र खड्काले बताउनुभयो । सशस्त्र प्रहरी नायब उपरीक्षक लक्ष्मण बरालको नेतृत्वमा खटिएको १५ सदस्यीय टोलीले हाइसमा सवार नौ जनामध्ये आठ जना घाइतेको उद्धार गरी उपचारका लागि चितवनको भरतपुरमा रहेको चितवन मेडिकल कलेजमा पठाइएको उहाँको भनाइ छ ।

दुर्घटनामा कपिलवस्तुको कृष्णनगर नगरपालिका–२ निवासी २७ वर्षीया श्रद्धा अग्रवाल र १५ महिनाका नौसद रिसिङ अग्रवाल गम्भीर घाइते भएका खड्काले जानकारी दिनुभयो । उहाँका अनुसार सवारी चालक कपिलवस्तुको मायादेवी गाउँपालिका–२ निवासी २४ वर्षीय विष्णु घर्ती, कृष्णनगर नगरपालिका–२ का २६ वर्षीय ऋषभ अग्रवाल, २५ वर्षीया रिद्धिसिंह सिंहनिया, २३ वर्षीया सेरी सिंह, २७ वर्षीया शिवानी अग्रवाल र ३१ वर्षीय अरविन्द अग्रवाल घाइते भएका छन् ।

घटनास्थलमा अस्थायी प्रहरी पोष्ट बेल्डियाबाट प्रहरीको टोली खटिई दुर्घटनाग्रस्त सवारीसाधन नियन्त्रणमा लिएको खड्काले जानकारी दिनुभयो । दुर्घटनाको कारणबारे प्रहरीले थप अनुसन्धान गरिरहेको जनाएको छ ।