भरतपुरमा सन अटोमोबाइल्सले सार्वजनिक गर्यो रोयल इन्फिल्ड हन्टर ३५०

---

चितवन । युवाहरुको मागबमोजिम भरतपुरको सन अटो मोबाइल्सले रोयल इन्फिल्डको नयाँ रङ र नयाँ भेरियन्टको हन्टर ३५० सार्वजनिक गरेको छ । आज बुधबार भव्य कार्यक्रमकाबीच शोरुममा नयाँ टर्माक ब्ल्याक भेरियन्टसँगै टप भेरियन्टमा मुम्बै यल्लो र मनसुट ह्वाइट गरी दुई नयाँ रङमा हन्टर ३५० सार्वजनिक गरिएको हो ।

कार्यक्रममा प्रमुख अतिथि चितवन अटो मोबाइल्स एसोसियसनका अध्यक्ष मोहन केसीले नयाँ भेरियन्टको बुलेट मोटरसाइकललाई युवाहरुले मन पराउनेमा विश्वस्त रहेको बताउनुभयो । यो नयाँ मोडल अझ उत्कृष्ट हुने विश्वास व्यक्त गर्दै केसीले यसअघि आफूहरु रोयल इन्फिल्ड मोटरसाइकल लिएर चितवनदेखि डोल्पाको यात्रा गरेको उल्लेख गर्नुभयो ।

करिब एक हजार २८० किलोमिटर यात्राको अनुभव बटुल्दै उहाँले रोमाञ्चक र अविष्मरणीय यात्रा रहेको बताउनुभयो । वार्षिक २० हजार मोटरसाइकल उत्पादन गर्नेगरी रोयल इन्फिल्डले सन् २०२३ बाट नेपालमा एसेम्बल सुरु गरेको छ ।

कार्यक्रममा सन अटोमोबाइल्सका सञ्चालक गोविन्द श्रेष्ठले दैनिक प्रयोगमा सहज र पहुँचयोग्य बनाउने उद्देश्यले ल्याइएको हन्टर ३५० को नयाँ भेरियन्ट ल्याइएको बताउनुभयो । हन्टर ३५० नेपालमा नयाँ पुस्ताका राइडरको रोजाइ बन्दै गएको श्रेष्ठले बताउनुभयो ।

रोयल इन्फिल्ड हन्टर ३५० को नयाँ टर्माक ब्ल्याक भेरियन्टको मूल्य चार लाख ८७ हजार रुपैयाँ तथा मुम्बै यल्लो र मनसुट ह्वाइट रङमा उपलब्ध भेरियन्टको मूल्य पाँच लाख ११ हजार रुपैयाँ रहेको श्रेष्ठले बताउनुभयो । सन अटो मोबाइल्सका सञ्चाल श्रेष्ठसँगै चितवन अटोमोबाइल्स एसोसिएसनका अध्यक्ष मोहन केसी, उपाध्यक्ष विवस पिया, एसबिआई बैंक नारायणघाटका प्रबन्धक रविन कुइँकेल, भरतपुर शाखाका प्रबन्धक रवि खनाल तथा टाँडी शाखाकी प्रबन्धक रिमा श्रीवास्तवले नयाँ भेरियन्टको सार्वजनिक गर्नुभएको थियो ।