नारायणी नदीको बाढी, खतराको तह नजिक

---

नवलपुर । नवलपरासी (बर्दघाट–सुस्तापूर्व) हुँदै बग्ने नारायणी नदीमा आएको बाढी खतराको तह नजिक पुगेको छ । नारायणी नदीको देवघाटस्थित जलमापन केन्द्रकाअनुसार नदीमा शनिबार दिउँसो १ः३० बजे पानीको सतह ८ दशमलव ९ मिटर पुगेको छ ।

नदीले देवघाटस्थित जल मापन केन्द्रमा पानीको सतह ९ मिटर पुगेपछि खतराको तह मानिन्छ । केन्द्रकाअनुसार देवघाटमा पानीको सतह निरन्तर बढ्दो क्रममा रहेको छ । नदीमा ७ दशमलव तीन मिटर पानीको सतह पुग्दा चेतावनीको तह मानिन्छ ।

नदीले शुक्रबार राति नै चेतावनीको तह पार गरेको केन्द्रले जनाएको छ । नदीमा पानीको बहाब बढ्दो क्रममा रहेकाले नदीको तटीय क्षेत्रका बासिन्दाहरुलाई सुरक्षित स्थानमा सार्ने काम भइरहेको नवलपरासी (बर्दघाट–सुस्तापूर्व)का प्रमुख जिल्ला अधिकारी जगदिश्वर उपाध्यायले जानकारी दिनुभयो । “बाढीको जोखिममा रहेका मानिसहरुलाई सुरक्षित स्थानमा सार्ने, नदी किनारमा नजान माइकिङ गर्नेलगायतका कामहरु भइरहेका छन्” उहाँले भन्नुभयो, “जिल्लाको गैँडाकोट, देवचुली, कावासोती, मध्यविन्दु नगरपालिका र विनयी त्रिवेणी गाउँपालिका नारायणी नदीको बाढीको जोखिममा रहेका पालिका हुन् ।”

त्यस्तै, बौदिकाली र बुलिङटार गाउँपालिकासमेत कालीगण्डकी नदीको बाढी तथा पहिराको जोखिममा रहेका भन्दै प्रजिअ उपाध्यायले प्रभावितहरुलाई सुरक्षित स्थानमा राख्ने काम भएको बताउनुभयो । बाढी र पहिराबाट प्रभावितहरुको उद्धार तथा राहतका लागि जिल्लाका सुरक्षा नियकायलाई ‘हाइ अलर्ट’मा राखिएको उपाध्यायले जानकारी दिनुभयो । “हामीले जिल्लामा विपद्का घटनाबाट हुने क्षति न्यूनीकरणका सबै प्रयास गरेका छौँ” उहाँले भन्नुभयो, “विपद् आइहालेमा उद्धार र राहतका लागि सुरक्षा निकायलाई सतर्क अवस्थामा राखेका छौँ ।”