नारायणीको पुलमा सवारीसाधन सञ्चालनमा रोक, पानीको सतह १२ मिटर नजिक

---

नवलपुर । नारायणी नदीमा हालसम्मकै सबैभन्दा ठूलो बाढी आएपछि नारायणी नदीमा निर्माण भएको पुलमा सवारीसाधन सञ्चालनमा रोक लगाइएको छ ।

नदीमा पानीको सतह बढेपछि चितवन र नवलपरासी (बर्दघाट–सुस्तापूर्व) जोड्ने पूर्वपश्चिम राजमार्गको नारायणी नदीमा निर्मित पुलमा सवारीसाधन सञ्चालनमा रोक लगाइएको प्रहरीले जनाएको छ । आज दिउँसो १ः१५ बजेबाट १ः४० बजेसम्म पुलमा पूर्णरुपमा सवारीसाधन सञ्चालनमा रोक लगाइएकोमा अहिले मोटरसाइकललाई मात्र छोडिएको प्रहरीले जनाएको छ । जिल्ला प्रहरी कार्यालय नवलपरासी (बर्दघाट–सुस्तापूर्व)का सूचना अधिकारी प्रहरी नायब उपरीक्षक अनिल पण्डितले पुल पुरानो भएको र अत्यधिक हल्लिएपछि सवारीसाधन पूर्णरुपमा रोक लगाइएको बताउनुभयो ।

जोखिम न्यूनीकरण गर्ने उद्देश्यले पुलमाथि रोकिएर पैदलयात्रीलाई फोटो, भिडियो खिच्नसमेत रोक लगाइएको पण्डितले जानकारी दिनुभयो । नवलपुरबाट चितवनतर्फ जाने मोटरसाइकल बाहेकका सवारीसाधनलाई गैँडाकोटमा र नवलपुरतर्फ आउने सवारीसाधनलाई चितवनको नारायणघाटमा रोकिएको पण्डितको भनाइ छ । नदीमा पानीको बहाव घटेपछि सवारीसाधन पूर्णरुपमा सञ्चालन गर्न दिइने उहाँले बताउनुभयो ।

देवघाटस्थित जल मापन केन्द्रका अनुसार अहिले २ः१० बजेको समयमा नारायणी नदीमा पानीको सतह ११ दशमलव ९४ मिटर पुगेको छ । नदीमा पानीको बहाव बढ्ने क्रममा रहेको केन्द्रले जनाएको छ । केन्द्रमा ७ दशमलव ३ मिटर पानीको सतहलाई चेतावनीको तह र ९ मिटरलाई खतराको तह मानिन्छ ।

नारायणीमा पानीको बहाव बढ्दै गएपछि गैँडाकोट, कावासोती, मध्यविन्दु नगरपालिका र विनयी त्रिवेणी गाउँपालिकामा पर्ने नारायणी नदी तटीय क्षेत्रका बस्तीहरु डुबानमा परेका छन् ।