राइनो क्रुजलाई बाढीले बगाउँदा १० करोड रुपैयाँ क्षति

---

नवलपुर । असोज ११ गते नारायणी नदीमा आएको बाढीले गैँडाकोटबाट ‘राइनो क्रुज’ बगाउँदा करिब १० करोड रुपैयाँ क्षति भएको जनाइएको छ । गैँडाकोट–२ स्थित नारायणी नदी किनारको रुखमा बाँधेर राखिएको अवस्थामा क्रुजलाई बाढीले बगाएर करिब पाँच सय मिटर तल लगेर पुलको पिल्लरमा अड्काएको थियो ।

गैँडाकोट–२ को नारायणी नदी किनारमा रहेको होटल रिभर क्राउनले गत माघ १९ गते उद्घाटन गरी क्रुज सञ्चालनमा ल्याएको थियो । होटल रिभर क्राउन सञ्चालन गर्दै आएका नवलपुर तथा चितवनका विभिन्न ३० जना साझेदारहरुले १५ करोड रुपैयाँ लगानी गरी क्रुज सञ्चालनमा ल्याएको संस्थाका प्रबन्ध निर्देशक दिपक ढुङ्गेलले बताए । ‘नारायणीको बाढीले क्रुज बगाउँदा हामीले क्रुजमा गरेको लगानीमध्ये १० करोड रुपैयाँ भन्दा बढीको क्षति पुगेको छ’ ढुङ्गेलले भने ।

बाढीले बगाएर पुलमुनि पु¥याएको क्रुज यथावस्थामा सञ्चालन गर्न सकिने अवस्था नरहेको उनले बताए । ‘ठूलो जेनेरेटरसहित क्रुजलाई बाढीले बगायो’ उनले भने, ‘क्रुज बाढीले बगाएको चार दिनसम्म निकाल्न सकिएको छैन ।’ पुलमा अड्किएको क्रुजले पुललाई क्षति नपु¥याओस् भन्ने उद्देश्यले क्रेनको सहायताले क्रुज तान्ने क्रममा क्रुज घोप्टो परेर नदीकिनारमै रहेको छ ।

क्रुजलाई क्रेनले तानेर पिल्लरबाट केही मिटर उत्तरतर्फ तानेर सम्भावित खतरा टारिएको भए पनि क्रुज पानीमै अड्किएर बसेको छ । नदीको बाढीले बगाएर पुलमुनि अड्किएको क्रुज सञ्चालन राष्ट्रिय गौरवको आयोजना भएकाले पूर्ववत् अवस्थामा सञ्चालन गर्न सरकारी सहयोग आवश्यकपर्ने ढुङ्गेलले बताए ।

ढुङ्गेलले क्रुज सञ्चालनका लागि पवित्र धार्मिक तीर्थस्थल देवघाटदेखि दक्षिणतर्फ नारायणी नदीमा ४० किलोमिटर यात्राको अनुमति पाएको बताए । साढे दुई तले क्रुजको लम्बाई ९५ फिट एवम् चौडाई २१ फिट रहेको भन्दै ढुङ्गेलले क्रुजबाट एकसाथ १५० जनालाई सेवासुविधा उपलब्ध गराउनेगरी गैँडाकोटबाट सञ्चालनमा आएको बताए । ढुङ्गेलकाअनुसार क्रुजिङको समय बढीमा एक घण्टाको भए पनि कार्यक्रम तथा प्याकेजअनुसार थपघट गर्न सकिने गरी सञ्चालनमा ल्याइएको थियो ।

क्रुजभित्र नै ब्रेकफास्ट क्रुजिङ, लन्च क्रुजिङ, डिनर क्रुजिङ, विवाह, व्रतबन्ध, पास्नी, जन्मोत्सव जस्ता शुभकार्य क्रुजिङ एवम् अन्य स्पेसल बुकिङका आधारमा क्रुजिङ हुँदै आएको उनको भनाइ छ । क्रुज सञ्चालनमा आएपछि गैँडाकोट र चितवनमा जलपर्यटनका लागि आउने आन्तरिक पर्यटकहरुको बृद्धि भएको ढुङ्गेलले दाबी गरे । क्रुजिङका लागि पाँच सय रुपैयाँदेखि तीन हजार रुपैयाँसम्मको टिकट शुल्क निर्धारण गरिएको थियो ।

नारायणी नदीको राष्ट्रिय जलयात्रा सम्भावना, धार्मिक पर्यटन, दिगो पर्यटन र राष्ट्रिय प्राथमिकता प्राप्त आयोजनासँग प्रत्यक्षरुपमा जोडिएको परियोजना ढुङ्गेलले बताए । क्रुजलाई वर्षभरी सञ्चालन गर्ने योजनासहित गैँडाकोटबाट सञ्चालनमा ल्याइएको क्रुजले ठूलो हावा तथा पानीको वहावमा पनि यात्रा गर्न सक्ने क्षमता राखेको थियो । देवघाटधाम, मौलाकालिका, वाल्मीकि आश्रम, चितवनको सौराहा, लुम्बिनीलाई यस परियोजनाले प्रमुख गन्तव्यको रुपमा एउटै पर्यटकीय करिडोरमा जोड्ने सञ्चालनमा ल्याएको क्रुजलाई पुनःनिर्माण गरी सञ्चालन गरिने ढुङ्गेलको भनाइ छ ।

विसं २०७९ माघ १ गते चितवनको भरतपुर–१६ स्थित काभ्रेघाटमा सञ्चालन गरिएको क्रुज विभिन्न कारणले बन्द भएपछि पुनःनिर्माणसँगै गतवर्षको माघदेखि गैँडाकोटबाट सञ्चालनमा आएको थियो । काभ्रेघाट वरिपरी नारायणी नदीको बहाब, अवस्थिति लगायतका धेरै कारणले त्यहाँ क्रुज यात्रा सहज नहुँदा गत असारमा विभिन्न उपकरण प्रयोग गरी क्रुजलाई गैँडाकोटसम्म ल्याइएको थियो । गैँडाकोटमा नारायणी नदीमाथि निर्माण हुने नयाँ सिग्नेचर पुलसँगै राइनो क्रुजले यस क्षेत्रमा पर्यटनको नयाँ ढोका खोल्ने विश्वास गरिएको थियो ।