आज दमौलीमा श्रीकृष्ण जन्माष्टमीको अवसरमा रथयात्रा

---

तनहुँ, ३१ साउन । श्रीकृष्ण जन्माष्टमीको अवसरमा नेपाल अन्तरराष्ट्रिय कृष्ण भावनामृत सङ्घ (इस्कोन) तनहुँले आज दमौलीमा आज रथयात्रा निकालेको छ । समुदायमा धार्मिक भावना अभिवृद्धि गर्ने, संस्कृति जगेर्ना गर्ने र सामाजिक एकता कायम गर्ने उद्देश्यका साथ रथयात्रा निकालिएको इस्कोन तनहुँका प्रमुख निरन्तर दासले जानकारी दिनुभयो ।

इस्कोन तनहुँले श्रीकृष्ण जन्माष्टमीको अवसरमा आज झाँकी प्रदर्शन, भजन किर्तन, कृष्णलिला, राधा कृष्ण झुला, कृष्ण कथा, राधाकृष्ण महाअभिषेक, महाप्रसाद वितरण लगायतका कार्यक्रम आयोजना गरेको छ ।

इस्कोन तनहुँले प्रत्येक दिन बिहान ५ बजेदेखि साँझ ७ बजेसम्म दैनिक आरती, श्रीमद्भागवत प्रवचन तथा प्रत्येक शनिबार दिउँसो १ बजेदेखि ४ः३० बजेसम्म शनिवारीय सत्सङ्ग कार्यक्रम साथै समुदायमा नियमित हरिनाम सङ्किर्तन, विद्यालय÷क्याम्पसहरुमा सात दिवसीय आत्म साक्षात्कारको विज्ञान, मन नियन्त्रण गर्ने कला, तनाव व्यवस्थापन, रिस सन्तुलन गर्ने कला, समय व्यवस्थापन गर्ने कला जस्ता विषयहरुमा सेमिनार तथा अन्य विभिन्न आध्यात्मिक कार्यक्रमहरु आयोजना गर्दै आइरहेको छ ।