नवलपुर । पश्चिमाञ्चल विश्वविद्यालयद्वारा सम्बन्धन लिई नवलपुरको गैँडाकोटमा सञ्चालनमा आएको वेस्टर्न एडभान्स कलेज अफ इन्जिनियरिङ एण्ड म्यानेजमेन्टले विशेष छात्रवृत्तिसहित नयाँ भर्ना खुला गरेको छ ।
कलेजले बीई सिभिल इन्जिनियरिङ तथा बिबिए अध्यापन गराउँदै आएकोमा नयाँ शैक्षिक सत्रका लागि विशेष छात्रवृत्तिमा भर्ना खुला गरेको जनाएको हो । विश्वविद्यालयद्वारा प्रदान गरिने पूर्ण छात्रवृत्ति सहित विद्यार्थीलाई थप १५ प्रतिशत छात्रवृत्ति दिने आज आयोजित पत्रकार सम्मेलनमार्फत घोषणा गरेको हो । क्याम्पस प्रमुख इन्जिनियर राजन सापकोटाले विश्वविद्यालयको सिफारिसमा कलेजले बिबिएमा तीन जना तथा इन्जिनियरिङमा पाँच जना विद्यार्थीलाई पूर्ण छात्रवृत्तिमा अध्ययन गराउँदै आएको छ ।
“अब स्नातक तहमा भर्ना हुने विद्यार्थीका लागि हामीले विश्वविद्यालयको पूर्ण छात्रवृत्तिबाहेक सिफरिस लिएर आउने विद्यार्थीलाई कूल शुल्कमा १५ प्रतिशत छात्रवृत्ति दिनेछौँ” उहाँले भन्नुभयो, “यस बाहेक पनि आवश्यकताका आधारमा सिफारिस भई आएमा विद्यार्थीलाई थप छुटमा अध्यापन गराउने छौँ ।” कलेजले बिबिएतर्फको पाठ्यक्रम व्यवस्थापन, वित्त, मार्केटिङ, मानव संशाधन, उद्यमशीलतालगायतका विषयमा आधारित भएको सापकोटाले बताउनुभयो । बिबिएको प्रवेश परीक्षा कलेजमै हुने उल्लेख गर्दै उहाँले म्याटमा आधारित भएर प्रवेश परीक्षा लिइने तथा ‘निड कम मेरिट’ आधारमा छात्रवृत्ति उपलब्ध गराइने बताउनुभयो ।
त्यस्तै बीई सिभिल इन्जिनियरिङतर्फको पाठ्यक्रम संरचनात्मक डिजाइन, निर्माण व्यवस्थापन, परियोजना आधारित व्यवहारिक शिक्षामा केन्द्रित रहेको क्याम्पस प्रमुख सापकोटाले बताउनुभयो । पश्चिमाञ्चल विश्वविद्यालयद्वारा आयोजित बिई प्रवेश परीक्षा हुने भन्दै उहाँले ‘निड कम मेरिट’को आधारमा छात्रवृत्ति दिने उल्लेख गर्नुभयो ।
दुवै संकायमा अध्ययन गर्ने विद्यार्थीलाई कलेजले विद्यार्थीहरुको पेसागत विकासमा जोड दिँदै उद्योगसँगको सहकार्यमा पेड इन्टर्नशीप र रोजगारीको व्यवस्था गर्ने उहाँको भनाइ छ । कलेजले प्रदान गर्ने १५ प्रतिशत छात्रवृत्तिका लागि स्थानीय तहको सिफारिसमा तल्लो तहको शैक्षिक प्रमाणपत्र, नागरिकताको प्रमाणपत्र र पासपोर्ट साइजको फोटो आवश्यक पर्ने सापकोटाले बताउनुभयो ।
पत्रकार सम्मेलनका क्रममा कलेजका शैक्षिक संयोजक कमल तिवारीले कलेजमा आधुनिक प्रविधिसँग सुसज्जित कक्षाहरु, आवश्यक प्रयोगशालाहरु, व्यवस्थित पुस्तकालय रहेको बताउनुभयो । विद्यार्थीहरुको शारीरिक र मानसिक विकासका लागि विभिन्न खेलकुद र सह पाठ्यक्रमका गतिविधिहरु रहेका तिवारीले बताउनुभयो । नवलपुर र चितवनका लागि कलेजले बस सेवा सञ्चालन गरेको भन्दै तिवारीले विद्यार्थीहरुका लागि अनुकुल र सहयोगात्मक अध्ययन वातावरण उपलब्ध गराइएको बताउनुभयो ।
कलेजले चाँडै नै बिएससी सिएसआईटी, बिएचएम, बिआईटी, एमबिए का कार्यक्रहरु सञ्चालनको तयारी गरिरहेको तिवारीको भनाइ छ । कलेजमा चार वर्षे (आठ सेमिस्टर) भएको बिबिएको पूर्ण शुल्क चार लाख ५५ हजार रुपैयाँ तथा बिईको पूर्ण शुल्क सात लाख रुपैयाँ रहेको तिवारीले बताउनुभयो ।
सम्वन्धित समाचारहरु
प्रतिकृया दिनुहोस्