उद्योग वाणिज्य संघका सदस्यलाई छुटसम्बन्धी सम्झौतामा हस्ताक्षर

---

चितवन । चितवन उद्योग वाणिज्य संघका सदस्यहरुले भरतपुर महानगरपालिका–२ मा रहेको राइनो फिटनेश हव प्रालि र सौराहा स्थित सौराहा रोयल टाइगर रिसोर्ट प्रालिमा छुट पाउने भएका छन् । संघमा आबद्ध भएका सदस्यहरुले सदस्यताको आधारमा राइनो फिटनेश हव प्रालि र सौराहा रोयल टाइगर रिसोर्ट प्रालिमा २० प्रतिशत छुट पाउने गरी सम्झौता भएको छ ।

चितवन उद्योग वाणिज्य संघका सदस्यलाई छुट दिने सम्बन्धी राइनो फिटनेश हव प्रालि, सौराहा रोयल टाइगर रिसोर्ट प्रालि र चितवन उद्योग वाणिज्य संघबीच सोमबार सम्झौता भएको हो । सम्झौता पत्रमा हस्ताक्षर गर्ने कार्यक्रममा चितवन उद्योग वाणिज्य संघका अध्यक्ष सुमनकुमार श्रेष्ठले संस्थागत उत्तरदायित्व अन्तरगत रहेर संघमा आबद्ध सदस्य व्यवसायीलाई उक्त छुट दिने व्यवस्था गरिएको बताउनुभयो । उहाँले अन्य सेवा उपलब्ध गराउने संस्थाहरुसँग पनि छुट गराउन पहल गरिरहेको बताउनुभयो ।

राइनो फिटनेश हव प्रालि एवम् सौराहा रोयल टाइगर रिसोर्ट प्रालिका अध्यक्ष रामप्रसाद गजुरेलले चितवन उद्योग वाणिज्य संघमा आबद्ध सदस्यलाई सेवा सुविधा दिन पाउँदा खुसी लागेको बताउनुभयो । उहाँले आगामी दिनमा पनि यस किसिमका छुट उपलब्ध गराउँदै लैजाने बताउनुभयो । सहुलियत सुविधा प्राप्त गर्नको लागि चितवन उद्योग वाणिज्य संघमा आबद्ध सदस्यहरूले संघबाट उपलब्ध गराएको सदस्यता परिचयपत्र देखाउनु पर्ने संघका कार्यकारी निर्देशक निलबहादुर के.सीले जानकारी दिनुभयो ।

सम्झौता पत्रमा संघको तर्फबाट संघका अध्यक्ष सुमनकुमार श्रेष्ठ, कार्यकारी निर्देशक निलबहादुर के.सी तथा राइनो फिटनेश हव प्रालि एवम् सौराहा रोयल टाइगर रिसोर्ट प्रालिका तर्फबाट अध्यक्ष रामप्रसाद गजुरेलले हस्ताक्षर गर्नुभएको थियो ।

यस अगाडि नै सम्झौता पत्रमा हस्तक्षर भई एन. पि. आई. नारायणी सामुदायिक हस्पिटल, चितवन मेडिकल कलेज, कलेज अफ मेडिकल साइन्स शिक्षण अस्पताल, चितवन मुटु हस्पिटल प्रालि, निको चिल्ड्रेन हस्पिटल, पुष्पाञ्जली हस्पिटल प्रालि, मौलाकालिका अस्पताल प्रालि, भरोसा हस्पिटल चितवन प्रालि चितवन मिड टाउन रिसोर्ट प्रालि, ग्यालेक्सी गार्डेन रिसोर्ट प्रालि, भरतपुर गार्डेन होटल प्रालि, अशोका रिसोर्ट प्रालि, रोज गार्डेन रिसोर्ट, होटल सिराइचुली, कविलास रिसोर्ट प्रालि, पोखरा स्थित होटल बाराही र गन्तव्य रिसोर्ट, इटहरी स्थित होटल इनटुरिष्ट, मनकामना दर्शन प्रालि, मौलाकालिका केवलकार लिमिटेड, ओपन स्काइ प्याराग्लाइडिङ प्रालिले पनि संघका सदस्यहरुलाई छुट सुविधा उपलब्ध गराउँदै आएका संघका कार्यक्रम अधिकृत गणेश सुवेदीले जानकारी दिनुभयो ।