पानी खान जाँदा दलदलमा परेर गैँडाको मृत्यु

---

नवलपुर । नवलपरासी (बर्दघाट–सुस्तापूर्व)मा दलदलमा परेर आज बिहान एउटा पोथी गैँडाको मृत्यु भएको छ । जिल्लाको कावासोती–१५ स्थित गुन्द्रही ढकाहा मध्यवर्ती सामुदायिक वन नजिकै बाणखोलाको दलदलमा परेर गैँडाको मृत्यु भएको चितवन राष्ट्रिय निकुञ्जले जनाएको छ ।

निकुञ्जका सूचना अधिकारी एवम् संरक्षण अधिकृत अविनाश थापामगरकाअनुसार खोलामा पानी खान गएको गैँडा दलदलमा फसेको थियो । सोमबार साँझदेखि दलदलमा फसेको गैँडालाई आज बिहान निकालेपछि मृत्यु भएको भन्दै थापामगरले गैँडाको खाग र खुर सुरक्षित भएको जानकारी दिनुभयो । मृत पोथी गैँडा करिब २५ देखि ३० वर्षको रहेको भन्दै घटनाबारे थप अनुसन्धान भइरहेको उहाँले बताउनुभयो ।

पछिल्लो राष्ट्रिय गैँडा गणना सन् २०२१ अनुसार नेपालमा रहेका ७५२ वटा गैँडामध्ये चितवन राष्ट्रिय निकुञ्जमा मात्रै ६९४ गैँडा छन् ।