जेन–जी प्रदर्शन : नवलपुरमा पार्टी कार्यालय र नेताको घरमा आगजनी

---

नवलपुर । जेन–जी प्रदर्शनका क्रममा मङ्गलबार नवलपरासी (बर्दघाट–सुस्ता)मा रहेका विभिन्न राजनीतिक पार्टी र नेताहरुको घरमा तोडफोड र आगजनी भएको प्रहरीले जनाएको छ ।

जिल्ला प्रहरी कार्यालयका सूचना अधिकारी प्रहरी नायब उपरीक्षक मधु नेपालकाअनुसार जिल्लामा रहेका नेपाली कांग्रेस, नेकपा (एमाले) तथा नेकपा (माओवादी केन्द्र)का पार्टी कार्यालयमा आगजनी भएको छ । त्यस्तै यी राजनीतिक दलका नेताहरुको घरमा समेत आगजनी र तोडफोड भएको नेपालले जानकारी दिनुभयो । “जिल्लामा सरकारी कार्यालयभन्दा पनि बढी राजनीतिक पार्टी र उनीहरुको घरमा तोडफोड र आगजनी भएको छ” उहाँले भन्नुभयो, “त्यस्तै कावासोती नगरपालिका, गैँडाकोट नगरपालिकामा समेत आगजनी र तोडफोड भएको छ ।”

नवलपुरको गैँडाकोटमा रहेको आईएमई ग्रुपको मौलाकाली केबलकारको तल्लो स्टेशनमा समेत प्रदर्शनकारीले आगजनी गरेका नेपालको भनाइ छ । “जिल्लामा भएका क्षतिहरुको विवरण हामीले सङ्कलन गर्ने क्रम जारी छ” उहाँले भन्नुभयो, “अहिले जिल्ला अवस्थामा नियन्त्रणमा छ ।” जिल्लामा निषेधाज्ञा जारी रहेको र प्रदर्शनकारीहरु आज अहिलेसम्म सडकमा नउत्रिएका उहाँले बताउनुभयो ।