जेन–जी प्रदर्शनमा नवलपुरमा ५८ करोड क्षति

---

नवलपुर । जेन–जी प्रदर्शनको क्रममा भदौ २४ गते भएको आगजनी तथा तोडफोडका कारण नवलपुरमा करिब ५८ करोड रुपैयाँ बराबरको क्षति भएको छ ।

प्रदर्शनका क्रममा जिल्लास्थित सरकारी र निजी सम्पत्तिमा भएको आगजनी र तोडफोडबाट अनुमानित ५८ करोड रुपैयाँ बराबरको क्षति भएको प्रारम्भिक विवरण सङ्कलन गरिएको नवलपरासी (बर्दघाट–सुस्तापूर्व)का प्रमुख जिल्ला अधिकारी भविश्वर पाण्डेले बताउनुभयो । पाण्डेकाअनुसार आन्दोलनका क्रममा जिल्लामा ४० वटा सवारीसाधन र ५३ वटा अन्य भौतिक संरचनामा क्षति पुगेको थियो ।

जिल्लास्थित सरकारी कार्यालयका एउटा चार पाङ्ग्रे सवारीसाधन र चार वटा मोटरसाइकलमा क्षति पुगेको पाण्डेले बताउनुभयो । “आन्दोलनको क्रममा सरकारी कार्यालयको एउटा मोटरसाइलक पूर्णरुपमा क्षति भएको छ भने एउटा चार पाङ्ग्रे सवारीसाधनमा आंशिक क्षति पुगेको छ” उहाँले भन्नुभयो, “क्षति भएका भनिएका तीनवटा मोटरसाइकल भने अनुसन्धानको क्रममा रहेका छन् ।” त्यसैगरी स्थानीय तहका २१ वटा सवारीसाधनमा क्षति पुगेको भन्दै पाण्डेले जसमध्ये नौ वटा मोटरसाइकल, पाँच वटा चार पाङ्ग्रे सवारीसाधन र सात वटा साइकल रहेका जानकारी दिनुभयो ।

उहाँकाअनुसार स्थानीय तहका नौ वटा मोटरसाइकलमा पूर्णरुपमा क्षति पुगेको छ । त्यस्तै, दुई वटा चार पाङ्ग्रे सवारीसाधनमा पूर्ण तथा तीनवटामा आंशिकरुपमा क्षति पुगेको पाण्डेले जानकारी दिनुभयो । त्यसैगरी, निजी सवारीसाधनतर्फ १४ वटा सवारीसाधनमा क्षति पुगेको प्रमुख जिल्ला अधिकारी पाण्डेले बताउनुभयो ।

पाण्डेकाअनुसार निजी मोटरसाइकल सातवटा पूर्णरुपमा क्षति तथा पाँच वटा आंशिक भएका छन् । त्यसैगरी दुई वटा चार पाङ्ग्रे सवारीसाधन पूर्णरुपमा क्षति भएका उहाँले बताउनुभयो । प्रदर्शनका क्रममा जिल्लामा क्षति पुगेका ४० वटा सवारीसाधनमध्ये १७ वटा मोटरसाइकल पूर्ण क्षति, पाँच वटा आंशिक क्षति तथा चार पाङ्ग्रे सवारीसाधनतर्फ चार÷चार वटा सवारीसाधन पूर्ण र आंशिक क्षति भएका छन् । बाँकी १० वटा सवारीसाधनमा सात वटा साइकल रहेका भन्दै तीनवटा मोटरसाइकलबारे अनुसन्धान भइरहेको प्रमुख जिल्ला अधिकारी पाण्डेले जानकारी दिनुभयो ।

प्रदर्शनका क्रममा जिल्लामा ५३ वटा भौतिक संरचनामा क्षति पुगेकोमा पाँच वटा निजी आवास पूर्णरुपमा क्षति भएका उहाँले जानकारी दिनुभयो । जिल्लामा दुई वटा प्रहरी इकाइ, तीन वटा प्रहरी बिट र गण्डकी प्रदेश अन्तर्गतको एउटा सरकारी कार्यालयमा आगजनी तथा तोडफोड भएको छ । त्यस्तै, तीन वटा पालिका कार्यालय र छ वटा वडा कार्यालयमा आगजनी भएको पाण्डेले बताउनुभयो ।

जिल्लामा राजनीतिक दल र जनप्रतिनिधिहरुको निजी घरमा आगजनी र तोडफोड भएका भन्दै उहाँले जम्मा १५ वटामा क्षति पुगेको जानकारी दिनुभयो । त्यसैगरी आईएमई ग्रुपको मौलाकाली केबलकार र बाबुराम सुनचाँदी पसलमा समेत आगजनी र तोडफोड भएको उहाँको भनाइ छ । आन्दोलनका क्रममा जिल्लास्थित चार वटा राजनीतिक पार्टीका जिल्ला पार्टी कार्यालय र १२ वटा नगर पार्टी कार्यालयमा आगजनी र तोडफोड भएका उहाँले बताउनुभयो ।

प्ररम्भिक विवरण सङ्कलन गर्दा करिब ५८ करोड रुपैयाँ बराबरको क्षति भएको अनुमान गरिएको भए पनि यो रकम बढ्न सक्ने उहाँले बताउनुभयो । आगजनी र तोडफोडमा परेका सरकारी कार्यालय तथा स्थानीय तहले सेवा प्रवाह सुचारु गरिसकेका भए पनि राजनीतिक पार्टीका जिल्ला र नगरस्थित कार्यालयहरु भने सञ्चालन भएका छैनन् । त्यस्तै, तोडफोडमा परेको मौलाकाली केबलकारमा समेत मर्मतको काम भइरहेकाले सञ्चालनमा आउन नसकेको जनाइएको छ ।