सडक कालोपत्र गर्न नारायणघाट बुटवल खण्ड बन्द गरिने

---

नवलपुर । पूर्वपश्चिम राजमार्गको नारायणघाट बुटवल खण्ड रातिमा पाँच घण्टा बन्द गरिने भएको छ । यस खण्डको नवलपुर र चितवन जोड्ने नारायणी नदी पुलदेखि पश्चिमतर्फको भागमा सडक कालोपत्र गर्न रातिमा सडक बन्द गर्न लागिएको हो ।

नारायणघाट बुटवल सडक योजना पूर्वी खण्डका योजना प्रमुख इन्जिनियर ईश्वर बहादुर रिजालले मङ्सिर ५ गते र ६ गते राति ११ बजेदेखि भोलिपल्ट बिहान ४ बजेसम्म राजमार्ग बन्द गर्न लागिएको जानकारी दिनुभयो । “निर्माणाधीन नारायणघाट–बुटवल सडक खण्डको नारायणी पुलको गैँडाकोटतर्फको एप्रोच सडकको भागमा कालोपत्र गर्ने प्रयोजनार्थ रातिमा सडक बन्द गर्ने निर्णय गरिएको हो” रिजालले भन्नुभयो, “यस स्थानमा सवारीसाधन सञ्चालनमा रोक लगाएर काम गर्नुपर्ने भएकोले रातिमा सडक बन्द गरी कालोपत्रको काम गर्न लागिएको हो ।” रातिको समयमा सडक बन्द गरिँदा पूर्वतर्फ जाने सवारीसाधनहरु नवलपुरको विभिन्न स्थानमा र पश्चिमतर्फ आउने सवारीसाधनहरु चितवनको विभिन्न स्थानमा रोकिने रिजालले जानकारी दिनुभयो ।

रातिको समयमा ६ घण्टा सडक बन्द हुने भएकाले तोकिएको ठाउँमा सवारीसाधन रोकेर पालो पर्खेर जान वा यस सडकको वैकल्पिक सडक प्रयोग गर्न उहाँले आग्रह गर्नुभयो । बुटवलबाट नवलपुर हुँदै पूर्वतर्फ जाने सवारीसाधनहरुमध्ये बस, मिनीबस, माइक्रो बस, साना चार पाङ्ग्रेसहितका सवारीसाधनहरु थुम्सीदेखि पश्चिमतर्फ रोकिने उहाँले बताउनुभयो । त्यस्तै, ट्रक, ट्रेलर, कन्टेनर, लहरी जस्ता ठूला मालवाहक सवारीसाधन बेल्डिहादेखि पश्चिमतर्फ रोकिने उहाँको भनाइ छ ।

त्यसैगरी नवलपुर हुँदै पश्चिम जान पूर्वतर्फबाट आएका सवारीसाधनहरु नवलपुर नपुग्दै चितवनमा रोकिने भएको छ । बस, मिनीबस, माइक्रो बस, साना चार पाङ्ग्रे सवारीसाधनहरु मुग्लिन नारायणघाट सडकको रामनगरदेखि जुगेडीसम्म र पूर्वपश्चिम राजमार्गको केन्द्रीय बसपार्कदेखि गोन्द्राङसम्म रोकिने रिजालले बताउनुभयो । त्यस्तै ट्रक, ट्रेलर, कन्टेनर, लहरी जस्ता मालवाहक सवारीसाधनहरु भने जुगेडीदेखि दासढुङ्गासम्म र गोन्द्राङदेखि टिकौलीसम्म रोकिने रिजालको भनाइ छ ।

सडक विस्तार सुरु भएदेखि नै यस खण्डमा भएको खाल्डाखुल्डी कारण यात्रुहरुले दुःख पाउँदै आएका थिए । नारायणी नदीको पुलदेखि पश्चिमतर्फ १७० मिटर सडक कालोपत्र भएपछि नारायणघाट बुटवल खण्डको दाउन्नेसम्म करिब ६० किलोमिटर सडक कालोपत्रले जोडिनेछ ।