चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले आफू नेपाली जनतालाई जिताउने यात्रामा अगाडि बढेको बताएका छन् । शनिबार भरतपुरमा आफ्नो स्वागतमा आयोजित विशेष सभालाई सम्बोधन गर्दै रास्वपा सभापति लामिछानेले भने, “नेपाली जनताले जित्दा क–कसले हार्छन् मलाई पर्वाह छैन, त्यो जित व्यक्तिगतरुपमा आफ्नो नभई जनताको हुनेछ ।”
कार्यक्रमलाई सम्बोधन गर्दै लामिछानेले अब देश बनाउने जिम्मा आफ्नो पार्टीको भएको पनि जिकिर गरे । जेनजीको साथ लिएर आफूहरु देश बनाउन लाग्ने लामिछानेको भनाइ छ । रास्वपा २०८४ को चुनाव कुरिरहेको बेला जेनजीले बीचमै सरकारमाथि हस्तक्षेप गरेर सत्ता पल्टाइदिएको भन्दै रास्वपा सभापति लामिछानेले खुसी व्यक्त गरे । देशको संरचना जलेको देखेर आफूलाई दुःख लागेको बताउँदै उनले भने, “सिंहदरबार पनि बनाउँला, न्यायालय पनि बनाउँला तर वर्षौँदेखि खोसिएको हाम्रो सपना कसले बनाउँछ ? हामी बनाउँछौँ । जेनजीको साथ लिएर अब देश बनाउन हामी लाग्छौँ । रास्वपा लाग्छ ।”
उनले जेनजी भाइबहिनीको साथमा अब रवि दाइ थपिएको बताए । चौबीसकोठीमा पुगेर नेपालको झन्डा फहराउँदै विशेष सम्बोधन गरेका थिए । “चितवनको चौबीसकोठीले हाम्रो लागि इतिहास बोकेको छ । “चितवनले मलाई होइन, देशलाई न्याय गर्नेछ” उनले भने, “मलाई अन्याय पर्दा तपाईँहरुले साथ दिनुभएको छ ।”
पूर्व गृहमन्त्रीसवमेत रहेका सभापति लामिछानेले आफूलाई मान्छे मात्रै बन्न पाए पुग्ने बताएका छन् । थुनामुक्त भएपछि पहिलो सम्बोधन चितवनमा गर्दै लामिछानेले आफूलाई सांसद, मन्त्री नचाहिएको बताए । “म मान्छे मात्रै भएछु भने पनि भ्रष्टाचारीको महललाई खरानी बनाउन पर्याप्त छ । सांसद, मन्त्री बन्न त रोकौला मान्छे बन्न त दिन्छौ होला नि ?” लामिछानेले प्रश्न गर्दै अगाडि भने, “मलाई अनागरिक बनायौ, जबरजस्ती झुटा मुद्दा लगाएर संसद्बाट निकाल्यौं । तर जनताको मनबाट बाहिर निकाल्न सक्यौ ? सक्छौ भने जनताको मनबाट बाहिर निकाल । म तयार छु ।’
उनले आफूमाथि झुटा मुद्दा लगाउने सरकार अपदस्त भएर हेलिकप्टर चढी भागेको बताए । अहिलेको सरकारले जेन–जी आन्दोलनको एजेण्डलाई बोकेर गए जनताको समर्थन मिल्ने दाबी पनि उनले गरे । “अघिल्ला सरकारबाट मप्रति प्रतिशोध साँधियो । ढुक्क हुनु मबाट प्रतिशोधपूर्ण राजनीति हुँदैन” उनले भने, “जेन–जीले जुन कामका लागि बलिदानी दिएको थियो त्यसमा अडिक बन्यो भने अहिलेको सरकारलाई हामी सघाउनेछौँ । रास्वपा सतिसाल बनेर खडा हुनेछ । म काठमाडौँ गएर प्रधानमन्त्रीज्यूलाई पनि भेट्नेछु ।”
लामिछानेले भदौ २३ गतेका दिन मान्छे मार्नेका विरुद्ध जनता सडकमा निस्किएको बताए । तर त्यतिखेर सरकारमा रहनेहरुले २३ गतेको कुरा नगरी २४ गतेको मात्रै कुरा गरिरहेको उनले बताए ।
बुटवल उच्च अदालत तुलसीपुर इजलासको आदेशमा थुनामुक्त भएका रास्वपा सभापति लामिछानेलाई चितवनमा पार्टी नेता, कार्यकर्ता र शुभचिन्तकले स्वागत गरेको थिए । रविलाई स्वागत गर्न कार्यकर्ता र शुभचिन्तकहरु भरतपुर चौबिसकोठी चोकमा ठूलो संख्यामा भेला भएका थिए । चितवनमा विशेष सम्बोधन लगत्तै रविले जेनजी आन्दोलनका शहीद परिवार र घाइतेलाई भेट्न काठमाडौँ गएका छन् ।
सहकारीको रकम अपचलन मुद्दा खेपिरहेका रवि उच्च अदालतको आदेशले शुक्रबार साँझ धरौटीमा भैरहवाबाट रिहा भई सोही दिन बेलुकी चितवन आइपुगेका थिए ।
प्रतिकृया दिनुहोस्