नवलपुरमा महिला र पुरुष मतदाता बराबर

---

आनन्द पोखरेल
नवलपुर । नेपालकै कान्छो जिल्लाको रुपमा रहेको गण्डकी प्रदेशको नवलपुरमा पुरुष र महिला मतदाता बराबर रहेका छन् । आगामी फागुन २१ गते हुने निर्वाचनका लागि निर्वाचन आयोगले सार्वजनिक गरेको अन्तिम नामावलीअनुसार जिल्लामा महिला पुरुष मतदाता लगभग बराबरी अवस्थामा रहेका छन् ।

नवलपुरका जिल्ला निर्वाचन अधिकारी लालप्रसाद शर्मा भुसालकाअनुसार नवलपुरमा एक लाख ३४ हजार एक सय ७० महिला तथा एक लाख ३४ हजार तीन सय ५२ पुरुष मतदाता रहेका छन् । शर्माकाअनुसार जिल्लामा जम्मा दुई लाख ६८ हजार पाँच सय २६ मतदाता रहेका छन् जसमा चार जना यौनिक तथा लैङ्गिक अल्पसङ्ख्यक मतदाता रहेका छन् । फागुन २१ मा हुने निर्वाचनमा जिल्लाको एक सय १४ मतदानस्थलको तीन सय ११ मतदान केन्द्रबाट मतदान हुने भुसालले जानकारी दिए ।

अघिल्लो निर्वाचन २०७९ मा जिल्लामा एक लाख ३६ हजार एक सय २१ महिला तथा एक लाख २४ हजार तीन सय ३६ पुरुष मतदाता एवम् चार जना यौनिक तथा लैङ्गिक अल्पसङ्ख्यक गरी जम्मा दुई लाख ६० हजार चार सय ६१ मतदाता रहेका भुसालले बताए । उनकाअनुसार जिल्लामा आठ हजार ६५ नयाँ मतदाता थपिँदा महिला मतदाताको सङ्ख्या भने अघिल्लो निर्वाचनको भन्दा पनि घटेको छ । अघिल्लो निर्वाचनमा भन्दा आगामी निर्वाचनका लागि जिल्लामा करिब दुई हजार महिला मतदाता कमी भएको उनले बताए ।

जिल्लामा प्रतिनिधिसभा सदस्यको निर्वाचन क्षेत्र दुई वटा रहेका छन् । निर्वाचन क्षेत्र नम्बर १ मा महिला मतदाता धेरै देखिएका छन् । यहाँ ७१ हजार ९८ महिला, ६५ हजार नौ सय ८२ पुरुष तथा एक जना यौनिक तथा लैङ्गिक अल्पसङ्ख्यक मतदाता गरी कुल एक लाख ३ हजार ८१ मतदाता रहेका भुसालले जानकारी दिए । यस क्षेत्रमा ५८ मतदान स्थलको एक सय ५७ मतदान केन्द्रबाट मतदान हुने भुसालको भनाइ छ ।

त्यस्तै, जिल्लाको प्रतिनिधि सभा सदस्यको निर्वाचन क्षेत्र नम्बर २ मा महिला मतदाताको तुलनामा पुरुष मतदाता धेरै रहेका छन् । यहाँ ६३ हजार ७२ महिला, ६८ हजार तीन सय ७० पुरुष एवम् तीन जना यौनिक तथा लैङ्गिक अल्पसङ्ख्यक गरी जम्मा एक लाख ३१ हजार चार सय ४५ मतदाता रहेका छन् । यस क्षेत्रको ५६ वटा मतदानस्थलका एक सय ५४ मतदान केन्द्रबाट मतदान हुने भुसालले बताए ।

अघिल्लो निर्वाचनको तुलनामा आगामी निर्वाचनका लागि जिल्लामा नौ वटा मतदान केन्द्र थप भएका भुसालले बताए । उनकाअनुसार निर्वाचन क्षेत्र नम्बर १ मा चार वटा मतदान केन्द्र थप गरिएको छ । गैँडाकोट–४ को सानो जनक आधारभूत विद्यालय झपर्दी, गैँडाकोट–१८ को बालज्योति आधारभूत विद्यालय दमार, देवचुली–४ को शान्ति सृजना आधारभूत विद्यालय झाक्रे र बुलिङटार–३ को त्रिभुवन माध्यमिक विद्यालय बाझगरा मतदान केन्द्र थप गरिएको भुसालले बताए ।

त्यस्तै निर्वाचन क्षेत्र नम्बर २ मा पाँच वटा मतदान केन्द्रहरु थप भएका भुसालले जानकारी दिए । भुसालकाअनुसार यस क्षेत्रमा मध्यविन्दु–१ को नवज्योति आधारभूत विद्यालय पतवारी, मध्यविन्दु–४ को जनसिद्ध माध्यमिक विद्यालय लसलहरी, मध्यविन्दु–७ को नवजागरण मावि चोरमारा, विनयी त्रिवेणी–२ को जनजागृति आधारभूत विद्यालय ज्यामिरे र विनयी त्रिवेणी–४ को दीपेन्द्र माध्यमिक विद्यालय सर्दीमा मतदान केन्द्र थप गरिएको छ ।

आठ वटा स्थानीय तह रहेको जिल्लामा गैँडाकोट र देवचुली नगरपालिका तथा बुलिङटार गाउँपालिकाको पूरै वडा एवम् कावासोती नगरपालिकाको वडा नम्बर १, २, ५ देखि १३ सम्म निर्वाचन क्षेत्र नम्बर १ मा पर्दछ । त्यस्तै निर्वाचन क्षेत्र नम्बर २ मा मध्यविन्दु नगरपालिका, हुप्सेकोट गाउँपालिका, बौदिकाली गाउँपालिका, विनयी त्रिवेणी गाउँपालिकाको पूरै वडा तथा कावासोतीको वडा नम्बर ३, ४, १४ देखि १७ सम्मका वडाहरु पर्दछन् ।