२७ पुष २०८२, आइतबार १४:३२
नवलपुर । नवलपुरको गैँडाकोटमा महिला तथा पुरुष फुटबल प्रतियोगिता हुने भएको छ । गैँडाकोट फुटबल क्लबको आयोजनामा यही पुस २९ देखि माघ ५ गतेसम्म वडास्तरीय महिला तथा पुरुष फुटबल प्रतियोगिता आयोजना हुन लागेको हो ।
युवाहरुलाई फुटबलको माध्यमबाट अनुशासित बनाउँदै धुमपान, मध्यपान तथा लागुपदार्थ दुव्र्यसनीबाट जोगाइ सक्षम नागरिक तयार पार्ने उद्देश्यले प्रतियोगिता आयोजना गरिएको आज (आइतबार) आयोजित पत्रकार सम्मेलनमा जानकारी दिइएको छ । क्लबका अध्यक्ष सुधन पराजुलीले प्रतियोगिताबाट वडामा भएका दक्ष पुरुष तथा महिला फुटबल खेलाडी छनौट गरी नगरपालिकाको पुरुष तथा महिला फुटबल टिम तयार पारिने बताउनुभयो । युवा खेलाडीहरुलाई छनौट गरी व्यावसायिक खेलाडी उत्पादन गर्न प्रेरित गर्नसमेत प्रतियोगिता आयोजना गरिएको पराजुलीको भनाइ छ ।
गैँडाकोट–९ थुम्सीस्थित नवजागर खेलकुद मैदानमा सञ्चालन हुने प्रतियोगितामा पुरुषतर्फ १५ टिम तथा महिलातर्फ आठ टिम सहभागी रहने पराजुलीले जानकारी दिनुभयो । प्रतियोगितामा पुरुषतर्फको विजेता टिमलाई रु ५५ हजार नगदसहित ट्रफी, मेडल र प्रमाणपत्र तथा महिलातर्फ विजेता हुने टिमलाई रु २५ हजार नगदसहित ट्रफी, मेडल र प्रमाणपत्र प्रदान गरिनेछ । त्यस्तै पुरुषतर्फ दोस्रो हुने टिमलाई रु ३३ हजार तथा महिलातर्फको दोस्रो हुने टिमलाई रु १५ हजार पुरस्कार प्रदान गरिने पत्रकार सम्मेलनमा जानकारी दिइएको छ ।
प्रतियोगितामा महिला तथा पुरुषतर्फ प्रत्येक खेलको म्यान अफ दी म्याचलाई रु दुई हजार ५५०, प्रतियोगिताको उत्कृष्ट खेलाडी, उत्कृष्ट डिफेन्स, उत्कृष्ट गोल रक्षक, उच्च गोलकर्तालाई समेत पुरस्कृत गरिने पराजुलीले बताउनुभयो । पत्रकार सम्मेलनमा गैँडाकोट खेलकुद विकास समितिका अध्यक्ष धामनाथ सापकोटाले नगरपालिकाभित्रको खेलकुदको विकासका लागि समितिले काम गर्दै आएको बताउनुभयो । आफूहरुले चाँडै नै गैँडाकोटमा राष्ट्रिय टी–२० क्रिकेट प्रतियोगिताको आयोजना गर्ने तयारी गरिरहेको समेत सापकोटाले जानकारी दिनुभयो ।
प्रतिकृया दिनुहोस्