नवलपुर । नवलपुरको गैँडाकोटस्थित नारायणी नदीकिनारमा जारी चौथो गैँडाकोट महोत्सवको आज मंगलबार १५ हजार बढी दर्शकले अवलोकन गरेका छन् । महोत्सवका प्रचारप्रसार उपसमिति संयोजक शालिकराम सापकोटाकाअनुसार महोत्सवमा आज साँझ दर्शकको अत्यधिक भीड रहेको थियो ।
पुस २५ देखि सुरु भएको महोत्सवमा अवलोकनकर्ताहरुको आकर्षण बढ्दै गएको सापकोटाले बताए । अर्जुन सापकोटा जिल्लाकै कलाकार एवम् समकालीन सांगीतिक क्षेत्रमा सर्वाधिक रुचाइएका कलाकार भएकाले पनि मंगलबार महोत्सवमा धेरै दर्शकहरु आएका उनले बताए । महोत्सवमा ओपेरा हाउस, जलपरी, मुस्ताङको चौरीले समेत दर्शकहरुको मन खिचेको सापकोटाले बताए ।
मंगलबार महोत्सवको सांस्कृतिक कार्यक्रममा अर्जुन सापकोटासहित सपना रोक्का र भरत क्षेत्रीसहित स्थानीय कलाकारहरुको समेत प्रस्तुती रहेको महोत्सवका सांस्कृतिक संयोजक किशोर लम्सालले जानकारी दिए । लम्सालकाअनुसार आज पनि भजन प्रतियोगिता जारी रहेको छ । स्थानीय कला र संस्कृतिको संरक्षण र जगेर्ना गर्ने उद्देश्यले भजन प्रतियोगिता सञ्चालन गरिएको लम्सालको भनाइ छ ।
महोत्सवको सांस्कृतिक कार्यक्रम अन्तर्गत बुधबार चर्चित गायिका प्रिती आलेसहितका कलाकारहरु आउने लम्सालले बताए । लम्सालका अनुसार बुधबार प्रिती आले, वृन्दा परियार, शंकर क्षेत्री, निलम ढुंगाना, दिपेन थापाको प्रस्तुती रहनेछ । बुधबारको कार्यक्रम सञ्चालन दीपक खड्काले गर्ने लम्सालले बताए ।
स्थानीय कृषि र स्थानीय उत्पादनको प्रवद्र्धन र बजारीकरण गर्ने उद्देश्यले आयोजना गरिएको महोत्सव माघ १० गतेसम्म सञ्चालन हुनेछ । महोत्सवमा दुई लाख दर्शकले अवलोकन गर्ने तथा २५ करोड रुपैयाँ भन्दा बढीको कारोबार हुने आयोजकको अनुमान रहेको छ ।
महोत्सव अवलोकनका लागि १०० रुपैयाँको टिकटको व्यवस्था गरिएको छ । विद्यार्थीका लागि ७० रुपैयाँको टिकटको व्यवस्था गरिएको छ । आयोजक जिल्ला उद्योग वाणिज्य संघ गैँडाकोटले ज्येष्ठ नागरिक, अशक्त र अपाङ्ग एवम् शैक्षिक संस्थाबाट संस्थागत रुपमा सहभागी भएका विद्यार्थीहरुलाई महोत्सवस्थलमा निःशुल्क प्रवेशको व्यवस्था गरेको छ ।
सम्वन्धित समाचारहरु
प्रतिकृया दिनुहोस्