देवघाटधाममा देवघाटमा माघेसङ्क्रान्ति मेलाको तयारी पूरा

---

नवलपुर । नवलपुर, तनहुँ र चितवनमा पर्ने पवित्र तीर्थस्थल देवघाटधाममा हरेक वर्ष लाग्ने माघेसङ्क्रान्ति मेलाको तयारी पूरा भएको छ ।

देवघाटमा क्रियाशील विभिन्न धार्मिक सङ्घसंस्था र देवघाट क्षेत्र विकास समितिले हरेक वर्षको माघेसङ्क्रान्तिको अवसरमा यहाँ आयोजना गरिने मेलाको तयारी पूरा भएको जनाइएका हुन् । देवघाट क्षेत्र विकास समितिका कार्यकारी निर्देशक सदन बरालले देवघाटमा माघेसङ्क्रान्तिका अवसरमा नेपालका विभिन्न जिल्लासहित विदेशी भक्तजनहरु पनि आउने बताउनुभयो । मेलामा भक्तजनको सङ्ख्या विगतको तुलनामा बढ्ने अनुमान गरिएको बरालको भनाइ छ ।

बरालका अनुसार यस वर्षको साउन महिनाको सोमबार, सद्विज छर्ने दिन र अन्य विशेष दिनमा भक्तजन बढी आएकाले माघेसङ्क्रान्तिमा पनि भक्तजन बढ्ने अनुमान गरिएको हो । गत वर्ष माघेसङ्क्रान्ति मेला भर्न तीन लाख हाराहारी भक्तजन देवघाट आएको अनुमान गरिएको थियो । गोसाईँकुण्डबाट आएकी त्रिशूली र दामोदर कुण्डबाट आएकी कालीगण्डकी नदीको मिलन एवं नारायणी नदीको मुहानको रुपमा रहेको दवघाटधामको बेणी सङ्गम भएकाले पनि माघेसङ्क्रान्तिमा देवघाटको विशेष महत्व रहेको बरालको भनाइ छ ।

माघेसङ्क्रान्तिका दिन देवघाटमा स्नान गर्न सम्पूर्ण देवी देवताहरु आउने हुनाले पनि भक्तजनहरुले अदृश्यरुपमा देवी देवतालाई भेटेर मोक्ष प्राप्त गर्न सक्छन् भन्ने जनविश्वास रहेको उहँले बताउनुभयो ।

देवघाटधामको गलेश्वर अश्रमका पीठधीश श्री अनन्तविभूषित महामण्डलेश्वर स्वामी आत्मानन्द गिरिजी महाराजले वैदिक परम्पराअनुसार माघेसङ्क्रान्ति मेलाको शुभारम्भ पुस मसान्तको दिन (पुस ३० गते बुधबार) देवघाटको बेणी सङ्गमस्थलमा बाँसको लिङ्गो गाडेर गरिने जानकारी दिनुभयो । उहाँकाअनुसार वशिष्ठ, विश्वामित्र, जनक, सीताजस्ता सयौँ ऋषि महर्षिहरु देवघाटमा आएर तपस्या गरेका, रामले अश्वमेध यज्ञ लगाएका, सीता विलय भएको भूमि तथा पाल्पाका राजा मणिमुकुन्द सेनले देवघाटमा आएर तपस्या गरेका कारण पनि देवघाटको थप ऐतिहासिक र धार्मिक महत्व रहेको छ । माघेसङ्क्रान्तिका दिन देवघाटमा गएर स्नान गरेमामात्रै पनि यस लोकबाट मोक्ष प्राप्त हुने उहाँले बताउनुभयो ।

त्रिशूली र कालीगण्डकी नदीको बेणी सङ्गममा मेला हुने भएकाले तीनवटा जिल्लासँग समन्वय गरेर तयारी गरिरहेको देवघाट क्षेत्र विकास समितिका अध्यक्ष डा इश्वरीराज लौडारीले बताउनुभयो । सुरक्षा सहजताका लागि सबैभन्दा बढी उज्यालोलाई ध्यान दिनुपर्ने हुँदा विद्युत् कार्यालयलाई पनि जगेडा ट्रान्समिटरको व्यवस्था गर्न आग्रह गरिएको लौडारीको भनाइ छ । विगतका वर्षहरुमा जस्तै भक्तजनका लागि यसवर्ष पनि बोट (डुङ्गा) को व्यवस्था मिलाइएको छ ।

देवघाटमा धेरै भक्तजन आउने अनुमानसहित आवश्यक सुरक्षा, धुनी, ट्राफिक व्यवस्थापन, पार्किङ, सरसफाइ, बत्ती, शौचालय, खानेपानीलगायत व्यवस्थापनको काम सकिएको उहाँले बताउनुभयो । नदीमा हुनसक्ने दुर्घटनाको पूर्वतयारीका लागि सशस्त्र प्रहरी बललगायतका सुरक्षा निकायका अङ्ग परिचालन गरिने लौडारीको भनाइ छ । देवघाट कालीगण्डकी र त्रिशूलीको सङ्गममा रहेको छ । एकातर्फ कालीगण्डकी नदी र अर्कातर्फ त्रिशूली नदी प्रवाहित भएर बनेको यी दुईको सङ्गमस्थल नै देवघाट हो ।

मेला भर्न आउने तीर्थालुहरुको आपत्कालीन स्वास्थ्य सेवाका लागि एम्बुलेन्सको व्यवस्था गर्ने तयारी भइरहेको लौडारीले बताउनुभयो । देवघाट जाने सवारीसाधनहरुको व्यवस्थापनका लागि जिल्ला ट्राफिक प्रहरी कार्यालय चितवनसँग सहकार्य गरेर भक्तजनलाई सहज बनाउन एकतर्फी बाटो सञ्चालन गरिने लौडारीको भनाइ छ । यसवर्ष पनि देवघाट जानका लागि रामनगर र ठिमुराबाट मात्रै प्रवेश गर्ने र आँपटारीको बाटो फर्किने गरी एकतर्फी बाटोको रूट निर्धारण गर्ने तयारी गरिएको उहाँले बताउनुभयो ।

आँपटारीको बाटो प्रयोग गरेर धेरै जना भक्तजनले पैदलयात्रा पनि गर्ने भएकोले पनि छोटो दूरी भएको बाटोलाई फर्किने रूट बनाइएको उहाँको भनाइ छ । उहाँका अनुसार मलामीका लागि भने आँपटारीबाटै प्रवेश दिइने छ । साथै देवघाट धार्मिक क्षेत्र भएकाले व्यापार गर्दा मांस÷मदिराको व्यापार गर्न निषेध गरिएको लौडारीले बताउनुभयो ।