६ माघ २०८२, मङ्गलबार २२:३१
नवलपुर । नवलपुरको प्रतिनिधिसभा सदस्य निर्वाचन क्षेत्र नम्बर १ मा नेपाली काँग्रेसबाट दुई जनाले उम्मेदवारी मनोनयन दर्ता गरेका छन् ।
फागुन २१ मा हुने प्रतिनिधिसभा सदस्य निर्वाचनका लागि मङ्गलबार भएको उम्मेदवार मनोनयन दर्ताका क्रममा यहाँबाट काँग्रेसका दुई जनाको उम्मेदवारी परेको मुख्य निर्वाचन अधिकृतको कार्यालयका सूचना अधिकारी प्रेमप्रसाद पौडेलले जानकारी दिनुभयो । उहाँकाअनुसार काँग्रेसबाट नवलपुर–१ मा गजेन्द्र आले मगर र बालकृष्ण घिमिरेको उम्मेदवारी मनोनयन दर्ता भएको छ । गजेन्द्र आले मगरले यहाँको उम्मेदवारीका लागि सोमबार पार्टीबाट टिकट पाउनुभएको थियो भने बालकृष्ण घिमिरेले मङ्गलबार टिकट पाउनुभएको थियो ।
मङ्गलबार टिकट प्राप्त गरेपश्चात घिमिरे आफै निर्वाचन अधिकृतको कार्यालयमा पुगेर उम्मेदवारी मनोनयन दर्ता गराउनुभएको थियो । सूचना अधिकारी पौडेलकाअनुसार आलेमगरले वारेसनामा मार्फत उम्मेदवारी मनोनयन दर्ता गराउनुभएको थियो । एउटै राजनीतिक दलबाट दुई जना व्यक्तिको उम्मेदवारी परेकाले बिहीबार दुवैलाई छलफलमा बोलाएर उम्मेदवार टुङ्गो लगाउने उहाँले बताउनुभयो ।
यसैबीच, दुई वटा निर्वाचन क्षेत्र रहेको नवलपुरबाट फागुन २१ मा हुने प्रतिनिधिसभा सदस्य निर्वाचनका लागि ३७ जनाले उम्मेदवारी मनोनयन दर्ता गरेका छन् । मङ्गलबार भएको उम्मेदवार मनोनयन दर्ताका क्रममा जिल्लामा ११ जना स्वतन्त्रसहित ३७ जनाको उम्मेदवारी परेको हो । यहाँ निर्वाचन क्षेत्र नम्बर १ मा १९ र २ मा १८ जनाको उम्मेदवारी परेको छ ।
नवलपुर–१ मा चार जना स्वतन्त्र उम्मेदवारसहित १९ जनाको उम्मेदवारी परेको मुख्य निर्वाचन अधिकृतको कार्यालयले जनाएको छ । त्यस्तै क्षेत्र नम्बर २ मा ६ जना स्वतन्त्र उम्मेदवारसहित १८ जनाको उम्मेदवारी परेको जनाइएको छ । नवलपुरमा नेपाली काँग्रेस, नेकपा एमाले, नेपाली कम्युनिस्ट पार्टी, राष्ट्रिय स्वतन्त्र पार्टी, राष्ट्रिय प्रजातन्त्र पार्टीसहितका दलबाट उम्मेदवारी परेको मुख्य निर्वाचन अधिकृतको कार्यालयका सूचना अधिकारी प्रेम प्रसाद पौडेलले जानकारी दिनुभयो ।
नवलपुर क्षेत्र नम्बर १ मा नेपाली काँग्रेसबाट गजेन्द्र आले मगर र बालकृष्ण घिमिरे, नेकपा एमालेबाट भागीरथ सापकोटा, नेपाली कम्युनिस्ट पार्टीबाट लोकप्रसाद भुर्तेल, राष्ट्रिय स्वतन्त्र पार्टीको तर्फबाट राजन गौतम, राष्ट्रिय प्रजातन्त्र पार्टीको तर्फबाट दीपक बस्ताकोटी, श्रम संस्कृती पार्टीबाट भीमचन्द्र गुरुङ, प्रगतिशील लोकतान्त्रिक पार्टीबाट सौगात महतो, नेकपा (माओवादी)बाट बेलबहादुर सारुको उम्मेदवारी परेको पौडेलले जानकारी दिनुभयो ।
निर्वाचन अधिकृतको कार्यालय नवलपुर क्षेत्र नम्बर २ का सूचना अधिकारी युवराज पन्थीकाअनुसार यहाँबाट नेपाली काँग्रेसबाट ओमप्रकाश घर्ती, नेकपा एमालेका तिलकबहादुर महत क्षेत्री, नेपाली कम्युनिस्ट पार्टीका गणेशमान महतो, राष्ट्रिय स्वतन्त्र पार्टीका मनिष खनाल, राष्ट्रिय प्रजातन्त्र पार्टीका रुनकुमारी महतो, श्रम संस्कृती पार्टीका कमल चापागाईं, नेकपा (माओवादी)को गंगाप्रसाद ज्ञवालीको उम्मेदवारी परेको छ ।
प्रतिकृया दिनुहोस्