१० माघ २०८२, शनिबार ०९:१२
चितवन । नारायणघाटस्थित नारायणी नदी किनारको प्रदर्शनीस्थलमा जारी नारायणी एक्स्पो २०८२ मा आज विभिन्न कलाकारहरुले प्रस्तुती दिने भएका छन् ।
आज शनिबार चर्चित गायिका टीका प्रसाईसहित गायक सञ्जित सिं राना र सुगम सङ्गीतकी गायिका सपना रोक्काले प्रस्तुती दिने एक्स्पो आयोजक संस्था रेड रक इभेन्ट एण्ड म्यानेजमेन्ट प्रालिका अध्यक्ष विकल क्षेत्रीले जानकारी दिए । एक्स्पोमा कृषि प्रदर्शनी, व्यापारिक स्टल, रेष्टुरेन्ट तथा बाल उद्यानसहित २५० बढी स्टल रहेका छन् । एक्सपोमा दैनिक रुपमा अवलोकनकर्ताको संख्यामा वृद्धि हुँदै गएको छ ।
एक्सपोमा अमेरिकामा रहेको स्ट्याचु अफ लिभर्टीको राखिएको छ । लिभर्टीमा फोटो खिच्नेको आकर्षण बढ्दै गएको अध्यक्ष क्षेत्रीले बताए । एक्स्पोमा लण्डन ब्रिजसहित लण्डन सिटी, पेरिसको आइफिल टावार एवम् पेरिस सिटी र कश्मिर भ्याली आकर्षणको रुपमा रहेको उनको भनाइ छ ।
एक्स्पोमा बाल उद्यान विभिन्न प्रकारका खानेकुराका परिकारसहितका रेष्टुरेण्ट रहेका भन्दै क्षेत्रीले एक्स्पोमा आज शनिबारबाट दर्शकको संख्यामा भारी वृद्धि भएर जाने अपेक्षा गरिएको बताए । चितवनमा सञ्चालन भएको अन्य महोत्सव सकिएकाले नारायणी किनारमा भीड बढ्ने अपेक्षा रहेको उनले बताए ।
स्थानीय कृषि र स्थानीय उत्पादनको प्रवर्ध्दन एवम् बजारीकरण गर्ने उद्देश्यले एक्स्पो आयोजना गरिएको एक्स्पोका संयोजक पाल्देन लामाले बताए । महोत्सव अवलोकनका लागि १०० रुपैयाँको टिकटको व्यवस्था गरिएको छ । विद्यार्थीका लागि ७० रुपैयाँको टिकटको व्यवस्था गरिएको र ज्येष्ठ नागरिक र अशक्तलाई निःशुल्क प्रवेशको व्यवस्था गरिएको लामाले बताए । पुस ३० देखि सुरु भएको एक्स्पोको सहआयोजकको रुपमा नेपाल आदिवासी जनजाति महासंघ जिल्ला समन्वय परिषद् चितवन रहेको छ ।
प्रतिकृया दिनुहोस्