३ फाल्गुन २०८२, आइतबार १४:३६
नवलपुर । महाशिवरात्रि पर्वको अवसरमा नवलपरासी (बर्दघाट–सुस्तापूर्व)मा रहेका शिव मन्दिरमा श्रद्धालु भक्तजनहरुको घुइँचो लागेको छ । पर्वको अवसरमा आज बिहानैदेखि जिल्लामा रहेका गोपेश्वर महादेव मन्दिर, हरिहर संन्यास आश्रम, कैलाश संन्यास आश्रम, ॐकारेश्वर महादेव मन्दिर, गंगेश्वर महादेव महादेव मन्दिरलगायत शिवालय मन्दिरहरुमा दर्शनार्थी तथा साधुसन्तहरुको चहलपहल बढेको छ ।
महाशिवरात्रिको पूर्वसन्ध्यामा शनिबार रातिदेखि नै यहाँका शिवालय मन्दिरमा भजनकीर्तन गरिएको थियो । वैदिक सनातन हिन्दू धर्मावलम्बीहरू आज बिहानैदेखि नदी, कुण्ड र तलाउमा स्नान गरी शिवालयमा गई श्रद्धाभक्तिपूर्वक पूजाआराधना गरिरहेका छन् । शिवजी उत्पत्ति हुनुभएको रातका नामबाट नामकरण भएको यो पर्वलाई पवित्र पर्वका रुपमा लिने गरिएको छ ।
फागुन कृष्ण चतुर्दशीका दिन मनाइने यस पर्वलाई दीनदुःखी र कष्टपूर्ण अवस्थामा रहेका प्राणीको हृदयमा धर्मको उदय गराउने भगवान् शिवको अतिप्यारो दिनका रूपमा पनि लिइन्छ । व्रतमध्ये सर्वोत्तम कहलिएको महाशिवरात्रिका दिन आज भक्तजनले शुद्ध भई शिव मन्दिरमा पूजाअर्चना गरी व्रत बस्ने र भगवान् शिवको प्रिय वस्तु दूध, धतुरो र बेलपत्र चढाउने गर्छन् । यस पर्वका दिन उपवास गरी रातभर जाग्राम बसे सर्वसिद्धि लाभ भई यमलोक जानु नपर्ने धार्मिक विश्वास रहेको छ ।
दर्शनार्थीहरुको बढी भीड हुने ठाउँका शिवालय मन्दिरमा प्रहरीले ट्राफिक व्यवस्थापन र लाइन व्यवस्थापनको काम गरिरहेको जिल्ला प्रहरी कार्यालय नवलपरासी (बर्दघाट–सुस्तापूर्व)ले जनाएको छ । कार्यालयका सूचना अधिकारी एवम् प्रहरी नायब उपरीक्षक अनिल पण्डितले भीड व्यवस्थापन र सवारीसाधन व्यवस्थापनका लागि जनपद प्रहरी र ट्राफिक प्रहरी परिचालन गरिएको जानकारी दिनुभयो । महाशिवरात्रि पर्वलाई लक्षित गर्दै सुरक्षा व्यवस्थालाई थप सुदृढ बनाएको उहाँले बताउनुभयो ।
“पर्वको अवसरमा हामीले भीडभाड बढी हुने मन्दिरहरुमा अफिसरको नेतृत्वमा टिम परिचालन गरेका छौँ” उहाँले भन्नुभयो, “अन्य स्थानमा पनि मोबाइल गस्ती तथा पैदल गस्तीलाई परिचालन गरेका छौँ ।” प्रहरीले महाशिवरात्रि पर्वलाई सभ्य र सुरक्षित बनाउन सुक्ष्मरुपमा काम गरिरहेको भन्दै पण्डितले गाँजासहितका लागु पदार्थ सेवन गरी उच्छृङ्खल गतिविधि गर्ने जोकोहीलाई पनि तुरुन्त पक्राउ गरिने पण्डितले बताउनुभयो ।
प्रतिकृया दिनुहोस्