चितवनमा ५०२ कैदीबन्दी मतदानबाट बञ्चित

---

चितवन । फागुन २१ मा हुने निर्वाचनमा कारागार कार्यालय चितवनमा रहेका ५०२ जना कैदीबन्दीहरुले मतदान गर्न नपाउने भएका छन् । जिल्ला निर्वाचन कार्यालय चितवनले उनीहरुको नाम मतदाता नामावलीमा दर्ता गराउन ध्यान नदिँदा कैदीबन्दी मतदानमा सहभागी हुनबाट बञ्चित भएका हुन् ।

कारागार कार्यालय चितवनमा ६१७ जना कैदीबन्दी रहेकामा जम्मा ११५ जनाले मात्रै मतदान गर्न पाउने भएका छन् । जिल्ला निर्वाचन कार्यालय चितवनका जिल्ला निर्वाचन अधिकारी भीमसेन कार्कीका अनुसार कारागार कार्यालय चितवनमा रहेका ११५ जना कैदीबन्दीले अस्थायी मतदान केन्द्र कारागारबाट मतदान गर्न पाउनेछन् । “हामीले निर्वाचन आयोगको मतदाता नामावलीमा भएको नाम र कैदीबन्दीको नाम भिडाएर हेर्दा ११५ जनाको मात्रै नाम भोटर लिस्टमा भेटायौँ” उनले भने, “कारागार कार्यालय गएर हामीले मतदाता नामावलीमा नाम सङ्कलन गरेनौँ ।”

भदौ २३ र २४ को आन्दोलनपछि आयोगको निर्णयअनुसार नै मतदाता नामावलीमा नाम सङ्कलन काम चलेको थियो । तर, त्यसबेला कारागार कार्यालयमा रहेका कैदीबन्दीको नाम मतदाता नामावलीमा दर्ता गर्नेबारे सरोकारवालाहरुको ध्यान नजाँदा अधिकांश कैदीबन्दी मतदानबाट बञ्चित भएका हुन् । निर्वाचन आयोगबाट कार्याक्रम नआउँदा कारागारमा रहेका कैदीबन्दीको नाम मतदाता नामावलीमा सङ्कलन नगरिएको जिल्ला निर्वाचन अधिकारी कार्कीले बताए ।

जिल्लामा दुईवटा अस्थायी मतदान केन्द्र रहेका छन् । जिल्ला समन्वय समितिको मतदान केन्द्रबाट निर्वाचनमा खटिने कर्मचारी तथा सुरक्षाकर्मीले मतदान गर्नेछन् भने कारागार कार्यालय मतदान केन्द्रमा कैदीबन्दीले मतदान गर्न पाउनेछन् । चितवनमा जम्मा तीन हजार १८५ अस्थायी मतदाता रहेका छन् ।