चितवनमा निर्वाचनको तयारी पूरा, मत खसाल्नमात्रै बाँकी

---

चितवन । चितवनमा निर्वाचनको सम्पूर्ण तयारी भएको जनाइएको छ । प्रतिनिधिसभा सदस्य निर्वाचन २०८२ का सन्दर्भमा जिल्लाका पत्रकारसँग आयोजित ‘निर्वाचन र आमसञ्चार विषयक’ अन्तरक्रिया कार्यक्रममा जिल्ला निर्वाचन कार्यालय चितवनले सम्पूर्ण तयारी पूरा भएको जनाएको हो ।

जिल्ला निर्वाचन कार्यालय चितवनका जिल्ला निर्वाचन अधिकारी भीमसेन कार्कीले जिल्लाका सात वटा पालिकाका ९८ वटै वडामा सम्पर्क व्यक्ति तोकेर मतदाता शिक्षा सञ्चालन गरिएको जानकारी दिए । फागुन ३ गतेदेखि सञ्चालन भएको मतदाता शिक्षा कार्यक्रम फागुन १७ गतेसम्म सञ्चालन हुने उनले जानकारी दिए । त्यस्तै मतदान अधिकृत र सहायक मतदान अधिकृतहरुलाई फागुन १२ देखि १४ गतेसम्म प्रशिक्षण दिएर १८ गते मतदान स्थलमा खटाउने तयारी गरिएको कार्कीले बताए ।

त्यस्तै जिल्लाका ६४ जना उम्मेदवारमध्ये ३९ जनाले बैंक खाता खोल्न सिफारिस लगेका, २१ जनाले बैंक खाता खोलेको जानकारी गराएका र १२ जना उम्मेदवारले मात्रै घोषणापत्र उपलब्ध गराएका उनको भनाइ छ । चितवनका मुख्य निर्वाचन अधिकृत केदारनाथ पौडेलले जिल्लामा निर्वाचनको सम्पूर्ण तयारी पूरा भएको जानकारी गराए । पौडेलकाअनुसार निर्वाचनका लागि हरेक मतदान केन्द्रमा ६ जना कर्मचारी, तीन जना स्वयंसेवक र सुरक्षाकर्मी परिचान हुनेछन् ।

मतदानको दिन मतदानस्थलको भित्री सुरक्षा घेरामा नेपाल प्रहरी र निर्वाचन प्रहरी, त्यसपछि सशस्त्र प्रहरी र बाहिरी सुरक्षा घेरामा नेपाली सेना हुने उनले जानकारी दिए । जिल्लाको तीनवटै निर्वाचन क्षेत्रको मतगणना फरक फरक स्थानमा गरिने भन्दै उनले निर्वाचन क्षेत्र नम्बर १ को खैरहनी नगरपालिकामा रहेको भुवानी शङ्कर बहुमुखी कलेज, निर्वाचन क्षेत्र नम्बर २ को भरतपुर–१० स्थित चितवन प्रदर्शनी केन्द्र र निर्वाचन क्षेत्र नम्बर ३ को रामपुर क्याम्पसका मतगणना हुने जानकारी दिए । मतदान केन्द्रलाई सुरक्षित पार्नका लागि सिसी टिभी क्यामेरा जडान तथा तारजाली लगाउने काम भइरहेका मुख्य निर्वाचन अधिकृत पौडेलले बताए ।

अन्तरक्रियाका क्रममा चितवनका प्रमुख जिल्ला अधिकारी गणेश अर्यालले जिल्लामा निर्वाचनको सम्पूर्ण तयारी पूरा भएको उल्लेख गर्दै ढुक्क भएर मतदानमा सहभागी हुने जिल्लावासी मतदातालाई आग्रह गरे । “निर्वाचनको सम्पूर्ण तयारी पूरा भएको छ, अब भोट खसाल्न मात्रै बाँकी छ” उनले भने, “ढुक्क भएर कसैको करकाप र डरत्रासमा नबसी मतदानमा सहभागी हुनुहोला ।” मतदान केन्द्र व्यवस्थापन, कर्मचारी खटाउने, सुरक्षाकर्मी खटाउने, कर्मचारीलाई तालिम दिने सबै काम सकिएको भन्दै उनले १८ गते मतदान स्थलमा पुगिसक्ने गरी मतदान अधिकृत र सहायक मतदान अधिकृतलाई निर्वाचन केन्द्रमा खटाइने बताए ।

जिल्लामा शान्तिपूर्ण रुपमा निर्वाचन सम्पन्न गर्नका लागि आफूहरु सजग भएको भन्दै उहाँले मतदान केन्द्रमा खटिएको जनशक्ति बाहेक सुरक्षाकर्मी र अन्य कर्मचारीसमेत तयारी अवस्थामा रहेको उनले बताए । जिल्लामा नेपाल प्रहरी, सशस्त्र प्रहरी र नेपाली सेनासँगै थप दुई हजार ७६६ जना निर्वाचन प्रहरी परिचालन गरिएको प्रजिअ अर्यालले बताए । चितवनको सात पालिकामा २५ वटा मतदानस्थललाई अति संवेदनशील, ९४ मतदानस्थललाई संवेदनशील र ४३ वटा मतदान स्थललाई सामान्य गरी वर्गीकरण गरिएको उनले जानकारी दिए ।

जिल्लाका १६२ वटा मतदानस्थलका ३९४ मतदान केन्द्रबाट मतदान हुँदैछ । अघिल्लो निर्वाचनमा भन्दा यसपटक ३४ वटा मतदान केन्द्र थप भएका भन्दै जिल्ला निर्वाचन अधिकारी कार्कीले ३३ हजार ७४० जना मतदाता थपिएका बताए । यहाँको मतदान स्थलमा एउटा मतदान केन्द्रदेखि नौ वटा मतदान केन्द्रसम्म रहेका छन् । यहाँको भरतपुर–२ को बालकुमारी मतदान स्थलमा सबैभन्दा बढी आठ हजार ६५७ मतदाता तथा सबैभन्दा कम मतदाता इच्छाकामना गाउँपालिकाको इच्छाकामना मतदान केन्द्रमा ३६५ मतदाता छन् ।

आगामी फागुन २१ गते हुने निर्वाचनका लागि चितवन क्षेत्र नम्बर १ का ५६ मतदान स्थलमा १६८ मतदान केन्द्र, क्षेत्र नम्बर २ का ४३ मतदान स्थलमा १५२ मतदान केन्द्र र क्षेत्र नम्बर ३ का ३२ मतदान स्थलमा १७४ मतदान केन्द्र रहेका छन् । प्रतिनिधि सभा सदस्य निर्वाचनमा जिल्लामा चार लाख ४२ हजार ८२ मतदाता सहभागी हुँदैछन् । क्षेत्र नम्बर १ मा एक लाख ४९ हजार ६२१, क्षेत्र नम्बर २ मा एक लाख ३७ हजार १५२ र क्षेत्र नम्बर ३ मा एक लाख ५५ हजार ३०९ मतदाता रहेका जिल्ला निर्वाचन कार्यालय चितवनले जनाएको छ ।