१८ फाल्गुन २०८२, सोमबार १८:०८
नवलपुर । नवलपुरमा १८ जना उम्मेदवारले मात्रै बैंक खाता खोलेका छन् । जिल्ला निर्वाचन कार्यालय नवलपुरका जिल्ला निर्वाचन अधिकारी लालप्रसाद शर्मा भुसालकाअनुसार बैंक खाता खोल्ने भनेर ३२ जना उम्मेदवारले सिफारिस लगेका भए पनि फागुन १७ गतेसम्म १८ जना उम्मेदवारले मात्रै बैंक खाता खोलेको जानकारी गराएका हुन् ।
प्रतिनिधिसभा सदस्य निर्वाचनका लागि दुई वटा क्षेत्र रहेको जिल्लामा राजनीतिक पार्टी र स्वतन्त्र गरी ३४ जना उम्मेदवार छन् । सबै उम्मेदवारलाई टेलिफोन गरी खाता खोल्न आग्रह गरिएको भुसालले जानकारी दिनुभयो । उहाँका अनुसार आसन्न निर्वाचनका लागि बैंकिङ खाता अनिवार्य गरिएसँगै यसका बारेमा बुझ्न र सिफारिसका लागि आवश्यक प्रक्रियाबारे जानकारी लिन उम्मेदवार र उम्मेदवारका प्रतिनिधिहरू कार्यालय आउने गरेका थिए ।
निर्वाचन आयोगले राजनीतिक दल एवं उम्मेदवारबाट हुने निर्वाचन प्रचारप्रसारका लागि प्राप्त हुने स्वेच्छिक आर्थिक सहयोगको रकम र त्यसको प्रचारप्रसारका लागि गर्ने खर्चलाई मितव्ययी, पारदर्शी बनाइ निर्वाचनमा सुशासन कायम गर्न बैंकिङ खाता खोल्नुपर्ने प्रावधान ल्याएको थियो । कार्यालयले निर्वाचनमा खटिने कर्मचारीलाई आइतबारदेखि नै मतदान सामग्री दिएर मतदान केन्द्रमा खटाउन सुरु गरेको उहाँले बताउनुभयो । “आइतबार हामीले १९ जना कर्मचारीलाई मतदानस्थलमा खटाइसकेका छौँ” उहाँले भन्नुभयो, “बाँकी कर्मचारी आज सबै सामग्री बुझेर मतदान केन्द्रमा पुग्नुहुन्छ ।”
जिल्लामा मतदानका लागि एक हजार ८६९ जना कर्मचारी परिचालन गरिएको भन्दै भुसालले जगेडा कर्मचारीसहित दुई हजार ५६ जना तयारी अवस्थामा राखिएको जानकारी दिनुभयो । आज राति १२ बजेपछि मौन अवधि सुरु हुने भएकाले आज साँझसम्म सबै कर्मचारीहरु मतदान केन्द्रमा पुगिसक्ने उहाँले बताउनुभयो । जिल्लाको क्षेत्र नम्बर १ मा एक लाख ३७ हजार ८० तथा क्षेत्र नम्बर २ मा एक लाख ३१ हजार ४४५ मतदाता रहेका छन् ।
प्रतिकृया दिनुहोस्