नवलपुरमा रास्वपालाई समानुपातिकमा ९२ हजार बढी मत

---

नवलपुर । प्रतिनिधिसभा सदस्यको दुई वटा निर्वाचन क्षेत्र रहेको नवलपरासी (बर्दघाट–सुस्तापूर्व)मा राष्ट्रिय स्वतन्त्र पार्टी (रास्वपा)ले समानुपातिकतर्फ ९२ हजार बढी मत प्राप्त गरेको छ । फागुन २१ मा सम्पन्न निर्वाचनबाट दुवै क्षेत्रमा गरी रास्वपाले समानुपातिकतर्फ ९२ हजार ३५८ मत प्राप्त गर्दै रास्वपा पहिलो पार्टी बनेको हो । यो सङ्ख्या कुल सदर मतको ५६ दशमलव ५१ प्रतिशत हुन आउँछ ।

जिल्लामा समानुपातिकतर्फ जम्मा एक लाख ६५ हजार ६२५ मत खसेको थियो । समानुपातिकतर्फ खसेको मतमध्ये तीन दशमलव ०२ प्रतिशत अर्थात पाँच हजार तीन मत बदर भएको थियो । जिल्लामा कुल सदर मत एक लाख ६० हजार ६२२ रहेको छ ।

त्यसैगरी, जिल्लाको दुवै क्षेत्रमा गरी नेपाली काँग्रेसले २९ हजार २७ प्राप्त गर्दै दोस्रो, नेकपा (एमाले) २४ हजार ७६९ मत प्राप्त गर्दै तेस्रो, श्रम संस्कृति पार्टी चार हजार २२९ मत प्राप्त गर्दै चौथो, राष्ट्रिय प्रजातन्त्र पार्टीले तीन हजार ९८७ मत प्राप्त गर्दै पाँचौं तथा नेपाली कम्युनिष्ट पार्टीले तीन हजार १५३ मत प्राप्त गर्दै छैठौँ भएको छ ।

रास्वपाले समानुपातिकतर्फ सबैभन्दा बढी मत निर्वाचन क्षेत्र नम्बर १ मा प्राप्त गरेको छ । मुख्य निर्वाचन अधिकृतको कार्यालयका सूचना अधिकारी प्रेम प्रसाद पौडेलकाअनुसार यस क्षेत्रमा रास्वपाले ५० हजार ८४६ मत पाएको छ । रास्वपाले पाएको मत कुल सदर मतको ६१ दशमलव ४८ प्रतिशत हुन आउने पौडेलले बताउनुभयो ।

यस क्षेत्रमा नेपाली काँग्रेसले १५ हजार ९०, नेकपा (एमाले)ले आठ हजार ८६६, राष्ट्रिय प्रजातन्त्र पार्टीले दुई हजार ४०२, श्रम संस्कृति पार्टीले दुई हजार २५३ तथा नेपाली कम्युनिष्ट पार्टीले एक हजार ६३० मत प्राप्त गरेको पौडेलको भनाइ छ । यस क्षेत्रमा ८५ हजार ७०३ मत खसेकोमा ८२ हजार ७०३ मत सदर भएको थियो । निर्वाचन क्षेत्र नम्बर १ मा समानुपातितर्फ दुई दशमलव ७८ प्रतिशत अर्थात दुई हजार ३७० मत बदर भएको थियो सूचना अधिकारी पौडेलले जानकारी दिनुभयो ।

प्रतिनिधिसभा सदस्य निर्वाचन क्षेत्र नम्बर २ मा पनि समानुपातिकतर्फ रास्वपा नै पहिलो पार्टी बनेको छ । यहाँ रास्वपाले समानुपातिमा ४१ हजार ५१२ मत प्राप्त गरेको निर्वाचन क्षेत्र नम्बर २ का सूना अधिकारी युवराज पन्थीले जानकारी दिनुभयो । यस क्षेत्रमा समानुपातिकतर्फ रास्वपाले कुल सदर मतको ५१ दशमलव ५४ प्रतिशत मत प्राप्त गरेको पन्थीको भनाइ छ ।

निर्वाचन क्षेत्र नम्बर २ मा समानुपातिकतर्फ १५ हजार ९०७ मत प्राप्त गर्दै नेकपा (एमाले) दोस्रो पार्टी बनेको छ । त्यस्तै यस क्षेत्रमा नेपाली काँग्रेसले १३ हजार ९३७, श्रम संस्कृति पार्टीले एक हजार ९७६, राष्ट्रिय प्रजातन्त्र पार्टीले एक हजार ५८५ तथा नेपाली कम्युनिष्ट पार्टीले एक हजार ५२३ मत प्राप्त गरेको पन्थीले बताउनुभयो । यस क्षेत्रमा ८० हजार ५५२ मत खसेकोमा ७७ हजार ९१९ मत सदर भएको थियो ।

यहाँ कुल खसेको मतको तीन दशमलव २६ प्रतिशत अर्थात दुई हजार ६३३ मत बदर भएको पन्थीले जानकारी दिनुभयो । जिल्लाको निर्वाचन क्षेत्र नम्बर १ मा एक लाख ३८ हजार २०६ तथा क्षेत्र नम्बर २ मा एक लाख ३१ हजार ४४५ मतदाता रहेका थिए ।