नवलपुरको गैँडाकोटमा धुमधामसँग हनुमान् जयन्ती मनाइँदै

---

नवलपुर । नवलपुरको गैँडाकोटस्थित हनुमान् मन्दिरमा धुमधामसँग हनुमान जयन्ती मनाइँदैछ । चैत्र शुक्ल पूर्णिमाका दिन मनाइने यस पर्वमा मन्दिरमा आज बिहानैदेखि विभिन्न धार्मिक अनुष्ठानसहित हनुमान् जयन्ती मनाइँदैछ ।

हनुमान् जयन्तीका अवसरमा आज बिहानैदेखि मन्दिर परिसरमा अखण्ड श्रीहरिनाम सङ्कीर्तन, हनुमान् चालीसा पाठपरायण, वैदिक विधिअनुसार श्रीहनुमत पूजनसहित पूजाआज सुरु भएको छ । हनुमान् जयन्तीकै अवसरमा आज साँझ मन्दिरमा लक्ष्यदीप प्रज्ज्वलन, तथा विशेष सन्ध्या आरतीको कार्यक्रम रहेको मन्दिरका अध्यक्ष हनुमान् मन्दिर समिति चक्रघाटका अध्यक्ष लिलाधर कँडेलले जानकारी दिनुभयो । कँडेलकाअनुसार आज बिहानैदेखि मन्दिरमा पूजाआजाका लागि नवलपुरसहित चितवन, तनहुँ र भारतबाटसमेत तीर्थयात्रीहरु आएका छन् ।

नेपालकै एकमात्र शिखरखजुराव शैलीको यस मन्दिरमा रामभक्त हनुमान्लाई आज ५१ किलोको लड्डु अर्पण गरिने तयारी भएको अध्यक्ष कँडेलले बताउनुभयो । आजका दिन हनुममान्को पूजाआराधना गरेमा बल, बुद्धि, विद्या मिल्ने, दुःख र सङ्कटबाट मुक्ति पाइने विश्वास छ । यस अवसरमा नवलपुरसहित देशका विभिन्न स्थानमा रामभक्त हनुमानको विशेष पूजाआराधना गरिँदैछ ।

यस अवसमरमा आज स्त्री पुरुष बाल वृद्ध सबैले पवित्र नदीमा स्नान गरी हनुमान्को व्रत एवं पूजाआराधना गर्ने गरेका मन्दिरका सचिव उमाकुमारी पाण्डेले बताउनुभयो । पाँचमुखी, अत्यन्त तेजस्वी पराक्रमी, पञ्चतत्व र पञ्चरुद्र स्वरूपी, अति भयानक रौद्ररूपी हनुमानको ध्यान गर्नाले सबै काम पूर्ण हुन्छन् भनी शास्त्रीय ग्रन्थमा उल्लेख गरिएको उहाँको भनाइ छ । हनुमानको पूजाआराधना गरेमा रोगव्याधि, बाधा, राजाको भय, प्राकृतिक शक्तिको बाधा, पिचासी शक्ति, भूत, नकारात्मक तत्व, बतास, खोला, आगो, राक्षसी शक्तिको प्रकोप र बेतालबाट पनि मुक्ति पाइन्छ भन्ने मान्यता रहेको उहाँको भनाइ छ ।

नवलपुरको गैँडाकोटमा रहेको यस मन्दिर विसं २०४२ चैत ३० गते स्थापना भएको हो । नारायणी नदीकिनारको पूर्वपश्चिम राजमार्गसँगै सालको जङ्गलमा करिब १८.५ हेक्टर क्षेत्रफलमा फैलिएको मन्दिर विसं २०७९ वैशाख ३ गते पुनःनिर्माण गरी हनुमानको मूर्तिको प्राण प्रतिष्ठा गरिएको थियो ।