२० चैत्र २०८२, शुक्रबार २०:४५
चितवन । चितवनमा अन्तर्राष्ट्रिय मौरी विज्ञ सम्मेलन हुने भएको छ । यही चैत २३ देखि २७ गतेसम्म चितवनको भरतपुरमा रहेको कृषि तथा वन विज्ञान विश्वविद्यालयमा सम्मेलन हुने भएको हो ।
कृषि तथा वन विज्ञान विश्वविद्यालयको कृषि संकाय, कृषि तथा पशुपन्छी विकास ः वन तथा वातावरण मन्त्रालयको कृषि विभाग र नेपाल मौरीपालक महासंघको संयुक्त आयोजनामा मौरी विज्ञ सम्मेलन गर्न लागिएको हो । सम्मेलनका अध्यक्ष विश्वविद्यालयका कृषि संकाय डिन प्राडा अर्जुन श्रेष्ठकाअनुसार पाँच दिनसम्म सञ्चालन हुने सम्मेलनमा चार विधामा करिब ५० वटा कार्यपत्र प्रस्तुत गरिने छन् ।
उहाँका अनुसार सम्मेलनमा मौरीपालन, एपी थेरापी, परागसेचन र मौरीसँग सम्बन्धित रोग र किरा व्यवस्थापनको विषयमा कार्यपत्र प्रस्तुतीकरण एवं छलफल हुने छ । सम्मेलनमा नेपालसहित भारत, थाइल्यान्ड, चीन, कोरिया, अमेरिका क्यानाडा, ग्रिस, हंगेरी, स्विडेन, स्टोनिया, बंगलादेश, श्रीलंकलगायतका गरी १९ देशबाट विषयविज्ञ तथा कृषकको सहभागिता रहने जनाइएको छ ।
सम्मेलनमा मह प्रदर्शनी तथा मेलासमेत आयोजना गरिने छ । जसमा आठ वटा स्टल रहने छन् । सम्मेलनमा हनी बार सञ्चालन गरिने आयोजकको भनाइ छ । नेपालमा पाइने मह चखाउन पनि बार सञ्चालन गर्न लागिएको हो ।
सम्मेलनबारे जानकारी दिन आज आयोजित पत्रकार सम्मेलनमा कृषि तथा पशुपन्छी विकास ः वन तथा वातावरण मन्त्रालयको कृषि विभागका उपमहा निर्देशक राजेन्द्र कोइरालाले कृषि क्षेत्रमा नवीन प्रविधिबारे जानकारी र छलफल भइरहेको बताउनुभयो । कार्यक्रममा करिब ६० जना अन्तर्राष्ट्रिय विषय विज्ञहरु सहभागी रहने उहाँले जानकारी दिनुभयो ।
प्रतिकृया दिनुहोस्