‘विपद् आउँदा समुदाय नै अगाडि आउनुपर्छ’

---

मध्यविन्दु । नवलपरासी (बर्दघाट–सुस्तापूर्व)को विनयी त्रिवेणी गाउँपालिकामा विपद् जोखिम न्यूनीकरण गर्नका लागि २५ जना स्वयंसेवक तयार गरिएको छ । विपद् प्रतिकार्यका लागि समुदायको तयारीलाई सुदृढ बनाउने उद्देश्यले गाउँपालिकामा समुदाय विपद् स्वयंसेवक तयार गरिएको हो ।

सशस्त्र प्रहरी बल नेपाल नं ३१ गुल्म हेडक्वार्टर पूर्वी नवलपरासीसँगको सहकार्यमा विनयी त्रिवेणी गाउँपालिकाले विपद् स्वयंसेवक तालिम सञ्चालन गरी स्वयंसेवक तयार गरिएको गाउँपालिका अध्यक्ष घनश्याम गिरीले बताउनुभयो ।

“विपद् आउँदा सबैभन्दा पहिले समुदाय नै अगाडि आउनुपर्छ”, उहाँले भन्नुभयो, “विपद्का समयमा समुदाय नै पहिलो उद्धारकर्ता बन्ने भएकाले तालिममार्फत गाउँस्तरसम्मको स्वयंसेवक तयार गरिएको हो ।”

विनयी त्रिवेणी गाउँपालिका विभिन्न प्रकारका विपद्को जोखिम क्षेत्रमा रहेकाले त्यसको पूर्वतयारीस्वरूप २५ जना स्वयंसेवक तयार गरिएको अध्यक्ष गिरीले जानकारी दिनुभयो । यस आर्थिक वर्षमा विनयी त्रिवेणी गाउँपालिकाका सातवटा वडामध्य चारवटा वडामा मात्र स्वयंसेवक तयार गरिएको छ ।

नेपाल–भारत सीमा क्षेत्रसँग जोडिएको संवेदनशील भौगोलिक अवस्थालाई मध्यनजर गर्दै विपद् स्वयंसेवक तालिममार्फत स्वयंसेवक तयार गरिएको सशस्त्र प्रहरी बल नेपाल नं ३१ गुल्म हेडक्वार्टर पूर्वीनवलपरासीका गुल्मपति सशस्त्र प्रहरी नायब उपरीक्षक लक्ष्मण बरालले बताउनुभयो ।

“तालिमले स्थानीय स्वयंसेवकहरूको क्षमता अभिवृद्धि गरी विपद् व्यवस्थापन, उद्धार तथा सहजीकरणमा प्रभावकारी भूमिका खेल्नेछ”, उहाँले भन्नुभयो, “सुरक्षा निकायमात्र पर्याप्त हुँदैन, प्रशिक्षित समुदाय भएमा विपद्को क्षति न्यून गर्न सकिन्छ ।”

विनयी त्रिवेणी गाउँपालिकाभित्रका २५ जना युवालाई १८ दिनसम्म विपद् प्रतिकार्यसम्बन्धी तालिम सञ्चालन गरेर स्वयंसेवक तयार गरिएको हो । विपद् व्यवस्थापनमा सुरक्षा निकाय र समुदायबीचको सहकार्य अपरिहार्य रहेकाले समुदायसँग सहकार्य गर्नेगरी प्रशिक्षित स्वयंसेवक तयार गरिएको सशस्त्र प्रहरी नायब उपरीक्षक बरालले बताउनुभयो ।

“प्रशिक्षित स्वयंसेवक तयार पार्नुको उद्देश्य विपद् प्रकोपको अवस्थामा समुदायलाई तत्काल सहयोग पुर्याउन सक्ने जनशक्ति तयार गर्नु, आपत्कालीन सतर्कता, प्राथमिक उपचार, उद्धार सीप तथा स्थानीय तहमा विपद् पूर्वतयारी योजना निर्माणमा सहयोग पुर्याउनु रहेको छ”, उहाँले भन्नुभयो ।

स्वयंसेवकहरूलाई सैद्धान्तिक ज्ञानसँगै व्यावहारिक अभ्यासमार्फत प्राथमिक उद्धार, प्राथमिक उपचार, आपत्कालीन सतर्कता र विपद्को समयमा आफू सुरक्षित रहने तथा अरूलाई सुरक्षित बनाउने सीप प्रदान गरी प्रशिक्षित गरिएको सशस्त्र प्रहरी निरीक्षक गोरख भण्डारीले जानकारी दिनुभयो ।