चितवनको भरतपुरमा वैशाख १७ देखि अटो शो हुँदै

---

चितवन । चितवनको भरतपुरमा यही वैशाख १७ देखि दोस्रो संस्करणको ‘चितवन अटो शो २०२६’ आयोजना हुने भएको छ । चितवन अटोमोबाइल डिलर्स एशोसियसन र चितवन अटोमोबाइल्स एशोसिएसनको संयुक्त आयोजनामा हुन लागेको अटो शो वैशाख २१ गतेसम्म सञ्चालन हुने मंगलबार आयोजित पत्रकार सम्मेलनमा जानकारी दिइएको छ ।

 

अटोमोबाइल व्यवसायको प्रवद्र्धन, सुरक्षित व्यवसाय सञ्चालन तथा सडकमा हुने सवारीसाधन दुर्घटना न्यूनीकरणका लागि जनचेतनामूलक कार्यक्रमलाई जोड दिँदै अटो शो आयोजना गर्न लागिएको कार्यक्रमका संयोजक राजन पियाले जानकारी दिए । पाँच दिसम्म सञ्चालन हुने अटो शोमा विभिन्न कम्पनीका नयाँ प्रविधियुक्त सवारीसाधन, विशेषगरी विद्युतीय सवारी (ईभी) र स्मार्ट मोबिलिटी समाधानहरू प्रदर्शनीमा राखिने पियाको भनाइ छ । पियाका अनुसार अटो शोमार्फत उपभोक्तालाई सवारीसाधन खरिदमा उत्साह बढाउनुका साथै नयाँ प्रविधिबारे जानकारी दिने लक्ष्य राखिएको छ ।

 

विभिन्न समयमा आयोजना गरिने अटो शोहरूले नयाँ प्रविधि, सवारीसाधन र विशेष अफरहरू एकै ठाउँमा ल्याएर अटोमोबाइल बजारलाई चलायमान बनाउन सहयोग पुग्ने पियाको भनाइ छ । पियाले अटो शोको माध्यमबाट सवारीसाधनको खरिद बिक्रीमा उत्साह थप्दै, विशेष गरी विद्युतीय सवारीसाधन र नवीन प्रविधिहरूबारे उपभोक्तालाई जानकारी दिने र आकर्षित गर्न महत्वपूर्ण भूमिका खेल्ने विश्वास व्यक्त गरे । अटो शोका क्रममा सवारीसाधन खरिदमा विशेष छुट, आकर्षक स्किम, फाइनान्स तथा इन्स्योरेन्स सेवा समेत उपलब्ध गराइने पत्रकार सम्मेलनमा जानकारी दिइएको छ ।

 

अटो शोमा साना–ठूला गरी विभिन्न ब्रान्डका कार, जिप, मोटरसाइकल र स्कुटरका करिब ७५ स्टल रहने चितवन अटोमोबाइल्स एशोसिएसनका अध्यक्ष मोहन केसीेले बताए । अटो शो मार्फत एक सय वटा विद्युतीय गाडी र तीन सय वटा विद्युतीय मोटरसाइकल तथा स्कुटर बुकिङ हुने विश्वास लिइएको केसीको भनाइ छ । उक्त शोमा पुराना ‘भिन्टेज’ गाडी र महँगा ‘बिग बाइक’ को प्रदर्शनी, मोटरसाइकल स्टन्ट, जिमखाना तथा टीडीएस ¥यालीजस्ता खेलकुद कार्यक्रमसमेत समावेश गरिने केसीले बताए ।

 

तेस्रो दिन ‘अटो सेमिनार’ तथा चौथो दिन विद्यालयस्तरीय विद्यार्थीलाई लक्षित गरी हेल्मेट प्रयोगसम्बन्धी सचेतना कार्यक्रम सञ्चालन गरिने केसीले बताए । कक्षा ४ देखि कक्षा ८ सम्म अध्ययन गर्ने विद्यार्थी तथा विद्यार्थीका अभिभावकहरुको उपस्थितिमा हेल्मेट प्रयोग सम्बन्धी सेचतना एवम् अन्तर्राष्ट्रिय स्तरको हेल्मेट वितरण समेत गरिने केसीको भनाइ छ । कार्यक्रम अवलोकन गर्ने दर्शकहरुमध्ये केही दर्शकलाई लक्की ड्रमार्फत पुरस्कार प्रदान गरिने पत्रकार सम्मेलनमा मार्फत जानकारी दिइएको छ ।

 

कार्यक्रम संयोजक पियाले चितवनमा वार्षिक करिब एक हजार १०० गाडीहरु बिक्री हुने गरेकोमा त्यसको ७० प्रतिशत हिस्सा विद्युतीय गाडीको रहेको जानकारी दिए । करिब १० हजार दर्शकले अवलोकन गर्ने लक्ष्य राखिएको अटो शोमा करिब ५० करोड रुपैयाँ बराबरको कारोबार हुने अनुमान गरिएको संयोजक पियाले बताए ।

 

चितवन अटोमोबाइल डिलर्स एशोसियसनका अध्यक्ष इन्द्रप्रसाद रेग्मीका अनुसार अटो शोमा गाडी किन्ने ग्राहकहरुलाई गाडी कम्पनीहरुले आकर्षक स्कीम तथा छुटको व्यवस्था गरेका छन् । त्यस्तै अटो शोको अवलोकन गर्ने अवलोकनकर्ताहरु मध्येबाट तीन जनालाई लक्की ड्र मार्फत आकर्षक उपहारको व्यवस्था गरिने रेग्मीको भनाइ छ । भरतपुर महानगरपालिका, चितवन उद्योग संघ एवम् चितवन उद्योग वाणिज्य संघको सहकार्यमा अटोमोबाइल्स व्यवसायहरुको चाहना र अटोमोबाइल्स व्यवसायको प्रवद्र्धन गर्ने उद्देश्यका साथ आयोजना गरिएको अटो शो चितवनको भरतपुरस्थित चितवन प्रदर्शनी केन्द्रमा आयोजना हुँदैछ ।