चितवन । चितवनको भरतपुर–१ मा रहेको वागीश्वरी आध्यात्मिक परिषद्, योगी नरहरिनाथ आश्रममा जारी कोटिहोम महायज्ञमा शनिबार भक्तजनको उत्साहजनक सहभागिता रहेको छ ।
महायज्ञमा शनिबार बिहानैदेखि भागवत कथा सुन्न एवम् संगीतमय शैलीमा भजनकीर्तन गर्ने भक्तजनको भीड लागेको हो । शनिबार महायज्ञ सुरु भएयताकै धेरै भक्तजन पुगेको आयोजकले बताएको छ । कोटिहोम महायज्ञमा गोरक्ष बिज मन्त्रद्वारा नियमित हवन भइरहेको छ ।
विभिन्न कारणले मृत्युवरण गरेका गाईहरुको मोक्षको कामना गर्दै शुक्रबार रुद्री पूजा गरिएको थियो । आश्रमको गौशालामा स्थानीय जातका गाईहरुको संरक्षण गरेर राखिएको छ । गौशालामा मृत्यु वरण गरेका गाईहरुको धार्मिक विधिअनुसार काजकिरिया गर्नुपर्नेमा त्यसो हुन सकेको थिएन ।
वैशाख १७ गतेदेखि सुरु भएको श्रीशिवगोरक्ष–योगीनरहरिनाथ–साङ्ग–कोटिहोम महायज्ञमा आर्थिक, चरु र फलफूल तथा तरकारी सहयोग गर्ने मनकारीको संख्या बढ्दै गएको छ । सामाजिक तथा धार्मिक व्यक्तित्व देखि विभिन्न संघसंस्थाहरुले सहयोग गरिरहेको महायज्ञका संयोजक एवम् मूलकर्ता प्रेमनिधि भारद्वाजले बताए ।
महायज्ञमा प्रमुख वाचकमा ज्योतिष पण्डित परशुराम पाण्डेयले भागवत कथा वाचन गरिरहेका छन् । राष्ट्रगुरु योगी नरहरिनाथको संकल्पमा भएको १३०औँ महायज्ञ आगामी असार १३ गतेसम्म सञ्चालन हुनेछ । कोटिहोममा नियमित हवन, गायत्री मन्त्रद्वारा लक्ष हवन, अति रुद्री, सहस्र चण्डी, वेदपाठ र भागवत पाठ परायण भइरहेको छ ।
वागीश्वरी आध्यात्मिक परिषद्, योगी नरहरिनाथ आश्रम र सनातन सांस्कृतिक सम्पदा संरक्षण संघको संयुक्त आयोजनामा महायज्ञ सञ्चालन भएको हो । महायज्ञमा नौ वर्षमुनिका एक हजार आठ बालिकाहरुको सामुहिक पूजा गरिने छ । पुरुषोत्तम महात्म्य प्रवचन, हिमवत् खण्ड, शिखरिणी यात्रा लगायतका धार्मिक ग्रन्थहरुको पाठपरायण, गौकथा प्रवचन हुनेछ भने पाँचसरे सवा करोड दीप प्रज्वलन गरिने छ ।
सम्वन्धित समाचारहरु
प्रतिकृया दिनुहोस्