नवलपुर । नवलपुरको गैँडाकोटस्थित अक्सफोर्ड कलेज अफ इन्जिनियरिङ एण्ड म्यानेजमेन्ट (अक्सफोर्ड सेकेन्डरी स्कुल)ले कक्षा १२ का विद्यार्थीहरूलाई बिदाइ गरेको छ ।
राष्ट्रिय परीक्षा बोर्डतर्फ कक्षा १२ को परीक्षा दिएर बसेका कलेजका विद्यार्थीहरुलाई शनिबार बिदाइ तथा दीक्षित गरिएको हो । समारोहमा कलेजका सञ्चालक समिति, प्राध्यापक, कर्मचारी तथा कक्षा ११ र कक्षा १२ का विद्यार्थीहरूको उत्साहजनक सहभागिता रहेको थियो ।
कार्यक्रममा अक्सफोर्ड कलेज अफ इन्जिनियरिङ एण्ड म्यानेजमेन्ट तथा अक्सफोर्ड सेकेन्डरी स्कुलका प्रचार्य प्राध्यापक डा इ हरि भण्डारीले विद्यार्थीहरूको उज्ज्वल भविष्यको कामना गर्नुभयो । उहाँले अक्सफोर्डले केवल शैक्षिक उपलब्धिमा मात्र नभई नेतृत्व क्षमता, नैतिक मूल्य, व्यक्तित्व विकास तथा व्यावहारिक ज्ञान विकासमा समेत विशेष जोड दिँदै आएको बताउनुभयो । भण्डारीले आधुनिक प्रविधि र दक्ष शिक्षकहरुमार्फत विद्यार्थीको उज्ज्वल भविष्य निर्माणमा विद्यालय निरन्तर सक्रिय रहेको उल्लेख गर्नुभयो।
कक्षा १२ को परीक्षा दिएर बसेका सहभागी विद्यार्थीहरूले मन्तव्य राख्दै विद्यालयको शैक्षिक गुणस्तर, अनुशासन र विद्यार्थीमैत्री वातावरणको उच्च प्रशंसा गरेका थिए । विद्यालय प्रशासनले विद्यार्थीहरूलाई उच्च शिक्षाको आगामी यात्रामा सफलताको शुभकामना दिँदै समाज र राष्ट्रप्रति जिम्मेवार नागरिक बन्न प्रेरित गरेको जनाएको छ ।
दीक्षान्त समारोहमा विद्यार्थीहरूले मनोरञ्जनात्मक कार्यक्रमहरु गीत–संगीत, सांस्कृतिक प्रस्तुति गरेका थिए । उक्त कार्यक्रम कलेजका सहायक प्रचार्य कृष्णहरि पौडेलले सञ्चालन गर्नुभएको थियो ।
यसैबीच, विद्यालयले शैक्षिक सत्र २०८३ का लागि कक्षा ११ मा विज्ञान, व्यवस्थापन तथा होटल व्यवस्थापन संकायमा भर्ना खुला रहेको जानकारी दिएको छ । अनुभवी शिक्षक टोली, आधुनिक प्रयोगशाला, स्मार्ट कक्षा, अतिरिक्त क्रियाकलाप तथा उत्कृष्ट नतिजासहित गुणस्तरीय शिक्षा प्रदान गर्ने प्रतिबद्धता विद्यालयले जनाएको छ ।
सम्वन्धित समाचारहरु
प्रतिकृया दिनुहोस्