रास्वपा प्रथम महाधिवेशन : गैँडाकोटका होटल भरिभराउ

---

नवलपुर । राष्ट्रिय स्वतन्त्र पार्टी (रास्वपा)को प्रथम महाधिवेशनका कारण नवलपुरको गैँडाकोटका होटलहरु भरिभराउ भएका छन् ।

महाधिवेशनमा आउने प्रतिनिधि तथा पर्यवेक्षकका कारण शनिबार साँझदेखि नै गैँडाकोटका होटलका कोठाहरु ९५ प्रतिशतभन्दा बढी भरिभराउ भएका मुकुन्दसेन मौलाकालिका होटल व्यवसायी सङ्घ गैँडाकोट, नवलपुरका अध्यक्ष शिव पौडेलले बताउनुभयो । “गैँडाकोटदेखि झराही खोला, ढोडेनीसम्मका सबै होटलहरु भरिभराउ भएका छन्” उहाँले भन्नुभयो, “शनिबार रातिसम्म यहाँका होटलमा ९५ प्रतिशत भन्दा बढी अकुपेन्सी रहेको छ, आइतबार दिउँसोसम्म पूर्णरुपमा होटल भरिनेछ ।” गैँडाकोटका ठूलासाना सबै होटलमा रास्वपाको महाधिवेशनमा आउने प्रतिनिधिहरुका कारण कोठाहरु भरिभराउ भएका उहाँले बताउनुभयो ।

“शनिबारदेखि तीन दिनका लागि यहाँका सबै होटलहरु बुकिङ भइसकेका छन्” उहाँले भन्नुभयो, “यसकारण पनि महाधिवेशका कारण होटलहरु भरिभराउन भएका हुन् भनेर भन्न सकिन्छ ।” गैँडाकोटका होटलहरुबाट रास्वपाको महाधिवेशन उद्घाटनस्थल चितवनको भरतपुरस्थित गेस्ट हाउस चौर तथा बन्दसत्र स्थल चितवन प्रदर्शनी केन्द्रसम्म पाँच मिनेट २० मिनेटभित्र पुग्न सकिन्छ । गैँडाकोटमा पनि ठूला र सुविधासम्पन्न होटलका साथै सानो बजेटमा पनि बस्न सकिने कोठाहरु रहेकाले र महाधिवेशनस्थलबाट पनि नजिकै भएकाले धेरै प्रतिनिधिको रोजाइँमा गैँडाकोटका होटल परेका हुन् ।

महाधिवेशनमा आउने प्रतिनिधिलाई लक्षित गर्दै मुकुन्दसेन मौलाकालिका होटल व्यवसायी सङ्घमा आबद्ध भएका व्यवसायीहरुले आवासमा २५ प्रतिशत तथा रेष्टुरेन्टमा १० प्रतिशत र बारमा २० प्रतिशतसम्म छुट दिने निर्णय भएकोसमेत उहाँले बताउनुभयो । गैँडाकोट क्षेत्रका समितिमा आबद्ध भएका करिब ३०० होटल तथा रेष्टुरेन्ट व्यवसायीहरु रहेका उहाँले बताउनुभयो । गैँडाकोटका होटलमा ३०० भन्दा बढीको सङ्ख्या हाराहारीमा एसीसहितका स्तरीय कोठाहरु रहेका छन् । यहाँ पाँच सय भन्दा बढी मानिसहरु राख्नसक्ने क्षमता रहेको जनाइएको छ ।