७ असार २०८३, आइतबार १२:४०
चितवन । सत्तारूढ राष्ट्रिय स्वतन्त्र पार्टी (रास्वपा) ले विधान संशोधन गरी वैधानिकता दिएको ‘वरिष्ठ नेता’ पदमा भने चुनाव नहुने भएको छ । फागुन २१ को चुनावअघि काठमाडौं महानगरपालिकाका मेयर बालेन शाहलाई पार्टीमा समाहित गर्न उक्त पद सिर्जना गरिएको थियो ।
त्यति बेला विधानमा वरिष्ठ नेता पद नभए पनि पहिलो महाधिवेशनको पूर्वसन्ध्यामा प्रस्तावित विधान संशोधन गरेर उक्त पद राखिएको हो । यसलाई महाधिवेशनले पारित गर्न भने बाँकी छ । वरिष्ठ नेतामा प्रधानमन्त्री बालेन शाहलाई नै निरन्तरता दिने भए पनि यो पदमा चुनाव भने नहुने पार्टी निर्वाचन आयोगका उपप्रमुख राम गुरूङले जानकारी दिए ।
उनका अनुसार वरिष्ठ नेता पदकै निर्वाचन नहुने भएपछि उनले केन्द्रीय सदस्यका लागि पनि प्रतिस्पर्धा गर्नुपर्ने छैन । चितवनको भतरपुरमा आजदेखि सुरू हुने पहिलो महाधिवेशनमा अहिलेसम्मको स्थिति हेर्दा वरिष्ठ नेताबाहेक केन्द्रीय समितिका सदस्य र पदाधिकारीहरूका लागि निर्वाचन हुने देखिएको छ ।
महाधिवेशनको उद्घाटन सत्र सकिएपछि आज साँझदेखि नै निर्वाचन कार्यक्रम सुरू हुनेछ । रास्वपाको विधान अनुसार निर्वाचन दुई चरणमा हुनेछ । पहिलो चरणमा सभापति र केन्द्रीय समितिका सदस्यहरूको चुनाव हुनेछ । सभापतिका निकट प्रतिद्वन्द्वीले पनि १० प्रतिशतभन्दा बढी मत ल्याए स्वत: केन्द्रीय सदस्य हुनेछन् ।
दोस्रो चरणमा केन्द्रीय सदस्यका विजेतामध्येबाट पदाधिकारीका लागि चुनाव हुनेछ । विधान संशोधनपछि रास्वपाको केन्द्रीय समितिको आकार १५८ सदस्य र पदाधिकारी संख्या १९ सदस्य पुगेको छ । पदाधिकारीमध्ये वरिष्ठ नेता मात्र यस्तो पद हो, जसका लागि चुनाव हुने छैन। प्रधानमन्त्री बालेन शाहलाई पार्टी पदाधिकारीमा स्थान सुनिश्चित गर्न यस्तो प्रावधान राखिएको पार्टी स्रोतहरू बताउँछन् ।
विसं २०७९ असार ७ गते स्थापना भएको रास्वपाले चार वर्षमा पहिलो पटक महाधिवेशन गर्न लागेको हो । स्थापनाको चार महिनामै भएको प्रतिनिधिसभा चुनाव २१ (उपचुनावपछि १ थप) सिट जितेको रास्वपाले पछिल्लो चुनावमा झन्डै दुई-तिहाइ बहुमत ल्याएर सरकार बनाएको छ ।
प्रतिकृया दिनुहोस्