उद्यमी महिला सहकारीद्वारा “चन्द्रसूर्य” बेसार ब्रान्डको शुभारम्भ 

---

चितवन । चितवनको सफल सामाजिक उद्यमी महिला सहकारी संस्थाले ‘चन्द्रसूर्य’ नामक बेसार ब्रान्ड सार्वजनिक गरेको छ । महिला नेतृत्वमा सञ्चालित उद्यमलाई सबल बनाउने, कृषि उपजको मूल्य अभिवृद्धि गर्ने तथा साना किसानका लागि दिगो बजारको अवसर सिर्जना गर्ने उद्देश्यसहित उक्त ब्रान्डको शुभारम्भ गरिएको हो ।

चितवनमा आयोजित विशेष समारोहमा बागमती प्रदेशका मुख्यमन्त्री इन्द्रबहादुर बानियाँ र बागमती प्रदेशकी सहकारी मन्त्री बिनु रायमाझी पौडेलले संयुक्त रूपमा ‘चन्द्रसूर्य’ ब्रान्डको उद्घाटन गर्नुभयो ।

चन्द्र सूर्य बेसारको शुभारम्भ गर्दै बागमती प्रदेशका मुख्यमन्त्री इन्द्रबहादुर बानियाँले चन्द्रसूर्यको शुभारम्भ महिलाको नेतृत्वमा सञ्चालित सहकारीहरुले उद्यमशीलता र मूल्य अभिवृद्धिमार्फत स्थानीय अर्थतन्त्रको विकासमा महत्वपूर्ण योग्दान दिन सक्ने प्रेरणादायी उदाहरण भएको बताउनुभयो । ‘जब, किसानहरू उत्पादनभन्दा अगाडि बढेर आफ्नै ब्राण्ड निर्माण गर्छन्, उनीहरूले आफ्नो उत्पादनबाट बढी लाभ लिन सक्छन्’ उहाँले भन्नुभयो, ‘उनीहरुले समुदायका लागि नयाँ अवसरहरू सिर्जना गर्छन् । बागमती प्रदेश सरकार ग्रामीण उद्यमको विकास गर्न, स्थानीय उत्पादनलाई प्रवद्र्धन गर्न र आर्थिक रूपान्तरणमा महिलाको नेतृत्वलाई सशक्त बनाउन सधैं प्रतिबद्ध छ ।”

कार्यक्रममा बागमती प्रदेशकी सहकारी मन्त्री बिनु रायमाझी पौडेलले किसान, सहकारी, विकास साझेदार र निजी क्षेत्रको संयुक्त उत्पादनको रुपमा चन्द्रसूर्य एक उदाहरण भएको बताउनुभयो । ‘मूल्य अभिवृद्धि र बजार पहुँचमा लगानी गरेर हामीले कृषि समुदायलाई दीर्घकालीन फाइदा पु¥याउने उद्यमहरू निर्माण गर्न सक्छौँ’ उहाँले भन्नुभयो ।

हेफर नेपालका राष्ट्रिय निर्देशक, डा. तीर्थराज रेग्मीले चन्द्रसूर्यको शुभारम्भले महिला किसान र सहकारी सदस्यहरूको नेतृत्व, उद्यमशीलताको भावनालाई उजागर गरेको बताउनुभयो । उहाँले भन्नुभयो, ‘यसले सामूहिक प्रयास र बजारसँगको प्रभावकारी पहुँचमार्फत ग्रामीण समुदायका लागि दिगो आर्थिक अवसरहरू सिर्जना गर्न सक्ने सम्भावना देखाएको छ ।’

‘चन्द्रसूर्य’ बेसार सफल सामाजिक उद्यमी महिला सहकारीमा आबद्ध महिला उद्यमी तथा किसानहरूको सामूहिक प्रयासको प्रतिफल हो । यस ब्रान्डमार्फत उपभोक्तालाई उच्च गुणस्तरको बेसार उपलब्ध गराउने, स्थानीय उत्पादकहरूको आम्दानी वृद्धि गर्ने तथा बजार पहुँच विस्तार गर्ने लक्ष्य राखिएको सहकारीले जनाएको छ ।

सहकारीका अनुसार ‘चन्द्रसूर्य’ ब्रान्डले नेपालको स्थानीय कृषि मूल्य शृंखलालाई सुदृढ बनाउनुका साथै गुणस्तरीय नेपाली कृषि उत्पादनको उत्पादन र बजारीकरणमा महत्वपूर्ण योगदान पु¥याउने अपेक्षा गरिएको छ । हेफर नेपालले महिला नेतृत्वका उद्यमीहरू र साना किसानहरूको जीविकोपार्जनमा सुधार ल्याउन सहकारीलाई निरन्तर सहयोग गर्दै आएको जनाएको छ । ‘चन्द्रसूर्य’ ब्रान्डको सुरुआतले महिला नेतृत्वका सहकारीहरू उत्पादनसँगै कृषि अर्थतन्त्रको बढी मूल्य प्राप्त हुने क्षेत्रमा पनि सक्रिय रूपमा योगदान पु¥याउने अपेक्षा गरिएको छ ।

सफल सामाजिक उद्यमी महिला सहकारीले यस अभियानलाई सफल बनाउन सहयोग गर्ने आफ्ना सम्पूर्ण सदस्य, साझेदार, सरकारी निकाय तथा अन्य शुभेच्छुकहरूप्रति आभार व्यक्त गरेको छ ।

हेफर इन्टरनेसनल नेपालले सन् १९९७ देखि साना किसानहरूसँग मिलेर समावेशी, उत्थानशील र दिगो खाद्य प्रणाली निर्माणका लागि काम गर्दै आएको छ । समुदाय, सरकार, सहकारी र निजी क्षेत्रसँगको सहकार्यमा हेफरले किसानहरूको उत्पादकत्व बढाउन, बजार तथा वित्तीय पहुँच विस्तार गर्न, जलवायु–मैत्री कृषि अभ्यास अपनाउन तथा जीविकोपार्जनमा सुधार ल्याउन सहयोग गर्दै आएको हेफर इन्टरनेशनल नेपालका ज्ञान व्यवस्थापन तथा सञ्चार प्रबन्धक प्रविन गुरुङले बताउनुभयो ।

हालसम्म हेफरले नेपालका चार लाखभन्दा बढी परिवारसँग सहकार्य गर्दै कृषिलाई दिगो आम्दानी, खाद्य सुरक्षा र समृद्धिको आधार बनाउन सहयोग गरेको उहाँको भनाइ छ । हेफरले भोकमरी र गरिबीको अन्त्य गर्दै पृथ्वीको संरक्षण गर्ने उद्देश्यअनुसार हेफरले महिला, युवा तथा सीमान्तकृत समुदायलाई प्राथमिकतामा राखेर काम गर्दै आएको उहाँले बताउनुभयो ।