१६ असार २०८३, मङ्गलबार १८:४३
चितवन । चितवनमा पर्यापर्यटनसँगै धार्मिक पर्यटनलाई पनि जोड दिनुपर्ने सरोकारवालाले बताएका छन् ।
बागमती प्रदेश सरकार पर्यटन मन्त्रालय र भरतपुर धार्मिक तथा पर्यापर्यटन विकास समितिले आयोजना गरेको धार्मिक पर्यटन प्रवर्द्धनात्मक अन्तरक्रियामा बोल्दै सरोकारवालाले चितवनमा पर्यापर्यटनसँगै धार्मिक पर्यटनको प्रचुर संभावना भएकाले दुवै क्षेत्रलाई सँगै लैजानुपर्नेमा जोड दिएका हुन् ।
बागमती प्रदेश पर्यटन मन्त्रालयका सचिव दीपेन्द्र सुवेदीले आगामि वर्ष चितवनलाई माइस टुरिजमको रुपमा प्रदेश सरकारले प्रवर्द्धन गर्ने भन्दै धार्मिक र पर्यापर्यटनलाईसँगै लैजानुपर्ने बताउनुभो । बागमती प्रदेशका पूर्वमन्त्री उत्तम जोशीले पर्यटकहरुलाई नयाँ ठाउँ देखाउनका लागि धार्मिक पर्यटनलाई जोड्नुपर्ने बताउनुभयो । उहाँले प्रदेश सरकारले सन् २०२५ देखि २०४० सम्मको रणनीति तयार पारेर पर्यटनको क्षेत्रमा काम गरिरहेको बताउनुभयो ।
भरतपुर महानगरपालिकाका पर्यटन विज्ञ विश्व सुवेदीले चितवनको पर्यटनको संभावना र गर्नुपर्ने कामबारे कार्यपत्र प्रस्तुत गर्नुभएको थियो । उहाँले देवघाटमा मात्रै पनि धेरै मठमन्दिर रहेको भन्दै देवघाट, भरतपुरको जखडीमाई, गणेशधाम, धनगढा, माडीको अयोध्यामधाम, वाल्मीकि आश्रमलगायतलाई जोडेर धार्मिक कोरिडोर निर्माण गर्नुपर्ने बताउनुभयो ।
भरतपुर धार्मिक तथा पर्यापर्यटन विकास समितिका अध्यक्ष दिनेश चुकेले धार्मिक पर्यटनलाई बढाउन प्रचार–प्रसार र तीनै तहका सरकारको विशेष लगानी आवश्यक रहेको बताउनुभयो । उहाँले आफू सुरुआतदेखि नै धार्मिक पर्यटनलाई प्रवर्द्धन गर्न जोड गर्दै आएकोमा अब त्यसलाई वृहत बनाउन आवश्यक रहेको बताउनुभयो ।
कार्यक्रममा भरतपुर–१ का वडाध्यक्ष केशव महर्जनले प्रदेश सरकारबाट प्राप्त हुने आयोजनाहरुमा स्थानीय सरकारलाई समेत समेट्दै लैजानुपर्ने बताउनुभयो । उहाँले धेरैजसो प्रदेशको आयोजना बारे स्थानीय सरकार बेखबर हुने भएकाले गुणस्तरीय काम हुन नसकेकोमा चिन्ता प्रकट गर्नुभयो । उहाँले पर्यटन प्रवर्द्धनका लागि सबै संयन्त्रले हातेमालो गर्नुपर्ने बताउनुभयो । उहाँले नारायणी नदीलाई अझै सी बीच मोडलमा व्यवस्थित गर्दै लैजानुपर्ने धारणा राख्नुभयो । कार्यक्रममा बागमती प्रदेश सभा सदस्य माया श्रेष्ठ, ईश्वर सापकोटालगायतले मन्तव्य व्यक्त गर्नुभएको थियो ।
प्रतिकृया दिनुहोस्