नवलपुरमा बसको ठक्करबाट स्कुटर चालकको मृत्यु

---

नवलपुर । पूर्वपश्चिम राजमार्ग अन्तर्गत नवलपरासी (बर्दघाट–सुस्तापूर्व)को देवचुली–१७ झराही खोलामा यात्रु बसले ठक्कर दिँदा स्कुटर चालकको मृत्यु भएको छ ।

डण्डाबाट नारायणघाटतर्फ जाँदै गरेको ना६ख २३०३ नम्बरको यात्रु बसले डण्डातर्फ जाँदै गरेको ग.प्र.०४००२ प.४१७६ नम्बरको स्कुटरलाई आज दिउँसो ठक्कर दिदाँ स्कुटर चालकको मृत्यु भएको प्रहरीले जनाएको छ । जिल्ला प्रहरी कार्यालय नवलपरासी (बर्दघाट–सुस्तापूर्व)का निमित्त सूचना अधिकारी प्रहरी निरीक्षक मोहनकुमार खड्काकाअनुसार बसले ठक्कर दिँदा स्कुटर चालक नवलपरासी (बर्दघाट–सुस्तापूर्व)को कावासोती–१२ का ३५ वर्षीय हेमलाल लामिछानेको मृत्यु भएको हो । बसको ठक्करबाट गम्भीर घाइते भएका लामिछानेको चितवनको भरतपुरस्थित चितवन मेडिकल कलेजमा उपचारको क्रममा मृत्यु भएको खड्काले जानकारी दिनुभयो ।

उक्त दुर्घटनामा स्कुटरको पछाडि सवार स्याङ्जाको रापाकोट घर भएका ६७ वर्षीय लिलाधर चापागाईको गम्भीर अवस्थामा भरतपुरको चितवन मेडिकल कलेजमा उपचार भइरहेको खड्काले बताउनुभयो । उहाँकाअनुसार ठक्कर दिने बस र बस चालक देवचुली–१४ का ४२ वर्षीय ध्रुव नारायण श्रेष्ठलाई प्रहरीले नियन्त्रणमा लिएर घटनाको सम्बन्धमा थप अनुसन्धान अगाडि बढाएको छ ।