साहारा सहकारीलाई समस्याग्रस्त सहकारी घोषणा गर्न सदस्यहरुको माग

---

चितवन, ३१ साउन । साहारा चितवन बहुद्देश्य सहकारी संस्था लिमिटेडलाई समस्याग्रस्त सहकारीको रुपमा घोषणा गर्न बचतकर्ताले माग गरेका छन् । बागमती प्रदेशकी सहकारी तथा गरिबी निवारण मन्त्री बिनु रायमाझी पौडेललाई भेटगरी उनीहरुले चितवनमा सञ्चालित तीन वटा शाखालाई समस्याग्रस्त सहकारी घोषणा गर्न माग गरेका हुन् ।

साहारा चितवन संघर्ष समितिका संयोजक शालिकराम दुवाडीले चितवनमा सञ्चालित साहारा सहकारी ३ वर्षदेखि बचतकर्ताको रकम फिर्ता नगरी मुख्य सञ्चालक जिबी राईसहित केही सञ्चालक फरार रहेकाले यसलाई समस्याग्रस्त सूचिमा राख्नुपर्ने बताउनुभयो । उहाँले चितवन जिल्ला अदालतमा सहकारीको मुद्दा विचाराधीन अवस्थामा रहेको र उक्त सहकारी संस्था अब पुनःस्थापित हुने अवस्था नरहेकाले सम्पूर्ण सदस्यहरुले समस्याग्रस्त घोषणा गर्न माग गरेको बताउनुभयो । सहकारीका सदस्यहरुले यसअघि चैत्र ५ गते सहकारी तथा गरिबी निवारण मन्त्रालय बागमती प्रदेश हेटौँडामा पुगेर समेत निवेदन दिएका थिए । त्यतिखेर मन्त्रीले तोक लगाएर अगाडि बढेको काम बीचमा रोकिएकाले त्यसलाई निराकरण गर्नका लागि नवनियुक्त मन्त्रीलाई भेट गरेर अनुरोध गरिएको दुवाडीले बताउनुभयो ।

नवनियुक्त मन्त्री रायमाझीले ज्ञापनपत्र बुझ्दै बचतकर्ताका माग अनुसार अगाडि बढ्ने बताउनुभयो । ‘एक दुईदिन म मन्त्रालयमा हुदिनँ । त्यसपछि मन्त्रालय गएर काम अगाडि बढाउन निर्देशन दिन्छु’ उहाँले भन्नुभयो, ‘मेरो प्राथमिकता सहकारी पीडितको बचत फिर्ता गराउने हुनेछ ।’ चितवनको सहकारीको अवस्थाबारे आफू धेरै जानाकार रहेको बताउँदै उहाँले कानुनले मिलेअनुसार समस्याग्रस्त सहकारी घोषणा गर्ने प्रतिबद्धता जनाउनुभयो ।

यस सहकारीको रकम अपचलन गरेको आरोपमा राष्ट्रिय स्वतन्त्र पार्टीका सभापति रवि लामिछाने सहित ३२ जनाविरुद्ध जिल्ला अदालत चितवनमा मुद्दा छ । सहकारीले ३८ करोड ९ लाख ७९ हजार रुपैयाँ हिनामिना गरेको प्रहरीले अनुसन्धान गरेको प्रतिवेदनमा उल्लेख छ । यसरी हालसम्म साहरा सहकारीले उठाउनुपर्ने ऋण ५६ करोड २२ लाख ५० हजार हाराहारीमा रकम बिगो रहेको देखाइएको जनाइएको छ ।

प्रहरीका अनुसार साहाराको कुल पुँजी दायित्व ६५ करोड १६ लाख ७१ हजार ७ सय १२ रुपैयाँ देखिन्छ । त्यसमध्ये बचतकर्तालाई फिर्ता गर्नुपर्ने रकम ५२ करोड ३२ लाख ८५ हजार रहेको छ । कर्जा लिएका व्यक्ति र कम्पनीले भुक्तानी गर्नुपर्ने रकम ५६ करोड २२ लाख ५० हजार रुपैयाँ देखिएको प्रहरीले जानकारी दिएको छ ।

अनुसन्धान प्रतिवेदनअनुसार कम्पनीमा ४३ करोड १४ लाख ४९ हजार लगानी भएको पाइएको छ । त्यसैगरी प्रतिवादीले ५ करोड ७९ लाख ८३ हजार ८ सय ७३ रुपैयाँ एकआपसमा रकम ऋण लिएका छन् । अन्य बचतकर्ता १ सय १८ जनामा मात्र ऋण लगानी भएको प्रहरी प्रतिवेदनमा उल्लेख छ । सहकारीमा करिब ७ हजार बचतकर्ता छन् ।